བོད་བཙན་པོའི་དུས་རབས་ནས་བཟུང་དུས་རབས་ཉི་ཤུ་པའི་ལོ་རབས་བཞི་བཅུའི་ནང་བར་ཆབ་སྲིད་དང་། འཛིན་སྐྱོང་། ཁྲིམས་ལུགས་དང་དམག་དོན་བཅས་པ་བོད་མི་རང་གིས་དོ་དམ་སྟངས་འཛིན་བྱས་ནས་ཡོང་ཡོད་པ་ལས། རྒྱལ་ཁབ་དང་ཡུལ་ལུང་གཞན་གྱི་བཙན་འོག་ཏུ་གཏན་ནས་བསྡད་མེད་ལ། བོད་རང་དབང་རང་བཙན་གཙང་མའི་རྒྱལ་ཁབ་ཅིག་ཡིན་པ་སྨོས་མེད་ཡིན། ཕྱི་ལོ་༡༩༤༩ ལོ་ནས་བཟུང་རྒྱ་ནག་དམར་པོའི་གཞུང་གིས་དྲག་མཚོན་དང་གཡོ་ཇུས་ཀྱི་སྟོབས་ཤུགས་ལ་བརྟེན་ནས་རིམ་པས་བོད་ས་ཡོངས་སུ་བཙན་འཛུལ་བྱས་པའི་བརྒྱུད་རིམ་ཁྲོད་བོད་མི་འབུམ་ཕྲག་བཅུ་གཉིས་ལྷག་དུས་མིན་རྐྱེན་ལམ་དུ་བཏང་ཡོད་པ་དང་། དགོན་སྡེ་སྟོང་ཕྲག་མང་པོ་རྩ་གཏོར་བཏང་ནས་བོད་མིའི་ཆོས་དང་རིག་གཞུང་གི་བསྟི་གནས་རྣམས་རྨང་མེད་བཟོས་ཡོད་པ་ཙམ་དུ་མ་ཟད། བོད་གངས་ཅན་ལྗོངས་ཀྱི་ཕ་མེས་ཡང་མེས་ཚོས་མི་ལོར་སྟོང་ཕྲག་མང་པོར་བསགས་པའི་རྩ་ཆེའི་ཤུལ་བཞག་རིག་གནས་དང་རྒྱུ་ནོར་ལོངས་སྤྱོད་ཡོངས་རྒྱ་ནག་དམར་པོའི་གཞུང་གིས་བཙན་ཤེད་ཀྱིས་རྐུ་འཕྲོག་བཅོམ་གསུམ་བྱས་ཏེ་བོད་ཀྱི་སྣོད་བཅུད་གཉིས་ཀར་གནོད་སྐྱོན་དང་གཏོར་བཤིག་ཚད་མེད་བཏང་སྟེ་བོད་མི་རིགས་ཀྱི་འཚོ་གནས་ལ་སྒོ་ཀུན་ནས་བརྡབ་གསིག་འཕྲད་ཡོད་པའི་ཉེར་ལེན་ལ་བརྟེན། བོད་ཀྱི་བླ་ན་མེད་པའི་མགོན་སྐྱབས་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་དབུས་རིས་སུ་མ་ཆད་པའི་བླ་ཆེན་རྣམ་པ་དང་། བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་གྱི་གཞུང་འཛིན་བཀའ་ཤག་གི་དབུས་བོད་མི་སེར་སྐྱ་འབུམ་ལ་ཉེ་བ་བཙན་བྱོལ་དུ་རིམ་པས་སྐྱབས་བཅོལ་བའི་འཚོ་གནས་བྱེད་དགོས་བྱུང་ཡོད་པ་དང་། དུས་དེ་ནས་བཟུང་བོད་ནང་གི་གཞིས་ལུས་སྤུན་ཟླ་ཚོའི་མགོ་ཐོག་ཏུ་དམྱལ་བ་མི་ཡུལ་དུ་འཕོས་འདྲའི་དཀའ་ངལ་ཚད་མེད་མྱངས་དང་མྱོང་བཞིན་ཡོད་པ་འདི་དག་བོད་མི་རིགས་འདི་ཤ་ཟད་རུས་ལ་མ་ཐུག་བར་དྲན་ངོར་ནས་དུས་ནམ་ཡང་བརྗེད་མི་རུང་བ་ནི་མི་རིགས་ཤིག་དང་རྒྱལ་ཁབ་ཅིག་གིས་འཐབ་རྩོད་ཀྱི་གཞི་རྩའམ་མ་རྩ་གཙོ་བོ་དེ་ཡིན་པ་ངེས་ཤེས་རྙེད་དགོས།
དུས་ཀྱི་འགྱུར་འགྲོས་དང་བསྟུན་ནས་འཛམ་གླིང་འདིའི་ཐོག་ཁྲིམས་ལུགས་ཀྱི་དབང་བསྒྱུར་འོག་ཆབ་སྲིད་ཀྱི་འགྱུར་བ་སྣ་ཚོགས་ཤིག་འགྲོ་བཞིན་ཡོད་ན་ཡང་ངོ་ཚ་དང་ཁྲེལ་གཞུང་སྤུ་རྩེ་ཙམ་མེད་པའི་རྒྱ་ནག་དམར་པོའི་གཞུང་གིས་ངོས་ནས་ད་དུང་བོད་མི་རིགས་ཀྱི་ངོ་བོ་མཚོན་བྱེད་ཆོས་དང་། རིག་གཞུང་། སྐད་ཡིག་དང་ཡུལ་སྲོལ་གོམ་གཤིས་སོགས་རྩ་མེད་བཟོ་རྒྱུའི་ངན་ཇུས་རྒྱུན་མ་ཆད་པར་འཐེན་བཞིན་ཡོད་པ་དང་། ལྷག་པར་དུ་མི་རིགས་དབྱེ་འབྱེད་དང་བོད་ནང་མི་སེར་སྤེལ་ཡུལ་གྱི་སྲིད་བྱུས་འོག་བོད་ཡུལ་རྒྱ་ཡུལ་དུ་སྒྱུར་བཞིན་པའི་གནས་སྟངས་ཧ་ཅང་ཛ་དྲག་ཆགས་ཀྱི་ཡོད་པར་བརྟེན། བོད་མི་རིགས་རིག་གཞུང་དང་བཅས་པ་རྩ་མེད་འགྲོ་རྒྱུའི་ཉེན་ཁ་འདི་ལ་ང་ཚོ་རང་དབང་ལུང་པར་སྡོད་མཁན་ཚོའི་ངོས་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱི་མཚོན་རྒྱལ་སྤྱིའི་ཁྱོན་ཡོངས་སུ་བོད་དང་བོད་མིའི་ངོ་བོ་མཚོན་བྱེད་ཆོས་དང་རིག་གཞུང་། སྐད་དང་ཡི་གེ། འཁོར་ཡུག་དང་བཅས་པ་སྲུང་སྐྱོབ་ཡོང་སླད་དུ་ལས་འགུལ་སྣ་མང་མུ་མཐུད་ནས་སྤེལ་ཡོད་ཀྱང་། ནུས་པ་དང་ཁྱབ་ཚད་ཀྱི་ཐོག་ནས་བཤད་ན་དེ་ཙམ་ཕན་ནུས་ཐོན་གྱི་མེད་པ་གསལ་བོ་རེད། རྒྱུ་མཚན་ནི་རྒྱ་ནག་དམར་གཞུང་ལ་གནམ་ས་བླ་འོག་བསྒྱུར་བའི་ནུས་པ་ཁྱད་པར་བ་ཞིག་ཡོད་པས་མ་ཡིན་དེ། ང་ཚོར་གཞན་བརྟེན་གྱི་བསམ་བློ་ཤུགས་ཆེ་དྲག་པ་དང་། ལྷག་དོན་དུ་བོད་མི་མི་རེ་ངོ་རེ་ནས་སེམས་ཀྱི་ཟབ་ས་ནས་བོད་མི་རིགས་ཀྱི་རྩ་དོན་འཐབ་རྩོད་བྱེད་རྒྱུའི་ཆོད་སེམས་གསོན་པོ་ཞིག་མེད་པའི་རྒྱུ་མཚན་ལ་བརྟེན་ནས་དེ་ཙམ་སྒུལ་ཤུགས་སམ་ནུས་པ་ཐོན་གྱི་མེད་པ་ཞིག་ལ་ངོས་འཛིན་བྱེད་ཀྱི་ཡོད།
ཕྱི་སྡོད་བོད་པའམ་བོད་མིའི་མགྲིན་ཚབ་པ་ཚོའི་ནུས་པ་དང་སྤོབས་པས་མ་འདངས་བ་བསྡོམས་བརྒྱབ་ནས་བཤད་ཐུབ་པ་ཞིག་རེད། བོད་ནང་ལོགས་ལ་ཆ་མཚོན་ན། ཕྱི་ལོ་༢༠༠༨ ལོ་ནས་བཟུང་སླར་ཡང་བོད་ཆོལ་ཁ་གསུམ་གྱི་ས་ཁྱོན་ཡོངས་སུ་བོད་མི་རིགས་ཀྱི་ངོ་བོ་མཚོན་བྱེད་ཆོས་དང་རིག་གཞུང་། སྐད་ཡིག་དང་འཁོར་ཡུག་སྲུང་སྐྱོབ་བཅས་ཀྱི་ཆེད་དུ་རྒྱ་ནག་དམར་པོའི་གཞུང་གིས་དྲང་བདེན་མིན་པའི་སྲིད་ཇུས་ལ་བོད་མི་ཚོས་འུ་ཐུག་ཐབས་ཟད་ཀྱི་བོད་ས་ཡོངས་སུ་ཞི་རྒོལ་བྱས་ཡོད་པ་རེད། སྐབས་དེར་ཡང་རྒྱ་གཞུང་གིས་མངོན་སུམ་འཛེམས་མེད་ཀྱིས་དྲག་གནོན་དམར་གསོད་དང་། མནར་གཅོད་རྡུང་རྡེག་ཚད་བརྒལ་བཏང་ནས་གཡོན་ཐལ་ཅན་གྱི་སྲིད་བྱུས་ལག་བསྟར་བྱས་ཡོད་པ་རེད། དེ་ནས་བཟུང་བོད་མི་རིགས་ཀྱི་རྒྱལ་གཅེས་དཔའ་བོ་དཔའ་མོ་ཁྲི་ཕྲག་མང་པོས་ལུས་སྲོག་ལོངས་སྤྱོད་དང་བཅས་པ་བློས་བཏང་གིས་མཚམས་མ་ཆད་པར་ཞི་རྒོལ་གྱི་ལས་འགུལ་མུ་མཐུད་ནས་སྤེལ་གནང་ཡོད། སྐབས་མཚམས་དེ་དག་ཏུ་ཡང་རྒྱ་ནག་དམར་པོའི་གཞུང་གི་ངོས་ནས་བོད་མི་ཚོའི་ཐོག་ཁྲག་དྲི་བྲོ་བའི་དྲག་གནོན་མངོན་སུམ་འཛེམས་མེད་དུ་བྱས་ནས་བོད་མི་ཁྲི་ཕྲག་མང་པོ་འཛིན་བཟུང་བཙོན་འཇུག་དང་སྟོང་ཕྲག་མང་པོ་གཡོ་ཐབས་སྣ་ཚོགས་འོག་དམར་གསོད་བཏང་དང་གཏོང་བཞིན་ཡོད་པའི་ཛ་དྲག་གི་གནད་དོན་འདི་ཡང་བོད་མི་རིགས་ཀྱི་ཟུངས་ཁྲག་གི་བྲིས་པའི་ལོ་རྒྱུས་ཤིག་ཏུ་ངོས་འཛིན་བྱེད་དགོས་པར་སེམས།
ལར་ནས་དུས་རབས་ཉེར་གཅིག་པ་འདི་ནི་ཞི་བདེ་དང་འཆམ་མཐུན་མང་གཙོ་འཕེལ་རྒྱས་བཅས་ཀྱི་དུས་རབས་ཤིག་ལ་ངོས་འཛིན་བྱེད་ཀྱིན་ཡོད་ནའང་། ད་དུང་རྒྱ་ནག་དམར་པོའི་གཞུང་གིས་བོད་མི་རིགས་ཚོར་མི་སྤྱོད་ལས་འདས་པའི་བཙན་འཛུལ་དང་གཉའ་གནོན་བཤུ་གཞོག་སྣ་ཚོགས་ཤིག་བྱེད་བཞིན་ཡོད་པར་མ་ཟད། བོད་བསྟན་སྲིད་ལ་སྲི་ཞུ་སྒྲུབ་མཁན་༸ཀུན་གཟིགས་པཎ་ཆེན་སྐུ་ཕྲེང་བཅུ་པ་མཆོག་དང་། གསེར་རྟ་མཁན་ཆེན་ཆོས་རྗེ་འཇིགས་མེད་ཕུན་ཚོགས། གུང་ཐང་བསྟན་པའི་སྒྲོན་མེ་སོགས་ཀྱི་གཙོས་བོད་ཀྱི་བླ་ཆེན་རྣམ་པས་མཚོན་བོད་མི་རིགས་ཀྱི་ནུས་ལྡན་སྣེ་ཁྲིད་པ་ཚོར་ཉེས་མིང་དང་གཡོ་ཇུས་སྣ་ཚོགས་གཡོགས་ནས་རེ་རེ་བཞིན་དམར་གསོད་བཏང་དང་གཏོང་མུས་ཡོད་པ་དང་། ༸པཎ་ཆེན་ཆུང་སྲིད་རིན་པོ་ཆེའི་མཚོན་ཉེས་མེད་ཀྱི་བོད་མི་སྟོང་ཕྲག་མང་པོ་ཉེས་མིང་སྣ་ཚོགས་གཡོགས་ཏེ་འཛིན་བཟུང་བཙོན་འཇུག་གི་སྡུག་སྦྱོང་མནར་གཅོད་བཏང་དང་གཏོང་བཞིན་ཡོད་པའི་གནད་དོན་འདིའི་བོད་མི་རིགས་རྩ་མེད་བཟོ་རྒྱུའི་ངན་ཇུས་འཐེན་བཞིན་ཡོད་པ་གསལ་སྟོན་བྱས་ཡོད།
ཕྱི་ལོ་༢༠༠༩ ནས་བཟུང་ས་སྒང་ཧྲིལ་པོའི་ཁྱོན་ཡོངས་སུ་ཉེ་རབས་ཀྱི་ལོ་རྒྱུས་ནང་བྱུང་མ་མྱོང་པའི་བོད་མི་ཚོས་ཆེས་འུ་ཐུག་ཐབས་ཟད་ཀྱི་རང་བསྲེགས་རྒྱ་རྒོལ་གྱི་ལས་འགུལ་མུ་མཐུད་ནས་མི་སྤེལ་ཀ་མེད་བྱུང་ཡོད་ལ། དོན་གནད་འདིའི་འབྱུང་རྐྱེན་དེ་ཡང་རྒྱ་ནག་དམར་པོའི་གཞུང་གིས་ཆེས་གཡོ་ཧམ་དང་མཁྲེགས་བཟུང་གི་སྲིད་བྱུས་ལ་འགྱུར་བ་སྤུ་ཙམ་མེད་པར་མ་ཟད། དུས་རབས་དང་དངོས་ཡོད་གནས་སྟངས་གང་དང་ཡང་གཏན་ནས་མི་མཐུན་པའི་མི་སྤྱོད་ལས་འདས་པའི་བཙན་གནོན་དང་སྡུག་སྦྱོང་མནར་གཅོད་སྣ་ཚོགས་ཤིག་གཏོང་བཞིན་ཡོད་པ་དང་། ལྷག་དོན་དུ་བོད་ཀྱི་སྣོད་བཅུད་གཉིས་ཀ་རྩ་མེད་བཟོ་དང་བཟོ་མུས་ཡོད་པའི་ཉེར་ལེན་ལ་བརྟེན་ནས་བོད་མི་ཚོས་རང་བསྲེགས་རྒྱ་རྒོལ་གྱི་ལས་འགུལ་འདི་མི་སྤེལ་ཀ་མེད་འབྱུང་བཞིན་ཡོད་པ་ཟུར་བལྟས་ལེབ་མཐོང་ཡིན་པར་སོང་། རྒྱ་ནག་དམར་པོའི་གཞུང་གིས་གནད་དོན་འདིའི་འབྱུང་རྐྱེན་ཐོག་འཛམ་གླིང་རྒྱལ་སྤྱིའི་ཁྱོན་དུ་འཁྱོག་བཤད་དང་རྗུན་བསྒྲགས་ལོགས་འགྲེལ་སོགས་ག་ཚོད་བྱས་ཀྱང་བརྡ་འཕྲིན་གྱི་དུས་རབས་འདིར་འཛམ་གླིང་མི་མང་རྒྱ་གཞུང་གིས་མགོ་སྐོར་གཏན་ནས་གཏོང་མི་ཐུབ་ལ། བོད་རྒྱའི་དོན་དངོས་ཀྱི་གནས་སྟངས་དང་ལྷག་པར་དུ་རང་ལུས་མེར་བསྲེགས་ཀྱི་འབྱུང་རྐྱེན་སོགས་གསལ་བོ་ཤེས་རྟོགས་ཐུབ་ཡོད་པའི་ཡིད་ཆེས་བརྟན་པོ་ཡོད།
བོད་ནང་རང་ལུས་མེར་བསྲེགས་ཀྱི་མཚོན་འུ་ཐུག་ཐབས་ཟད་ཀྱི་གནས་སྟངས་མང་དག་ཅིག་གིས་འབྱུང་རྐྱེན་གཙོ་བོ་ཇི་ཡིན་ལ་རྒྱ་ནག་གཞུང་གིས་རྟོག་ཞིབ་དང་བསམ་ཤེས་དེ་བཞིན་དོན་དངོས་ཀྱི་རྒྱུ་རྐྱེན་སོགས་ལ་བརྟག་དཔྱད་གང་ཡང་བྱེད་ཀྱི་མེད་པར་མ་ཟད། གནད་དོན་དེ་དག་གི་འབྱུང་རྐྱེན་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས། དེ་འབྲེལ་གྱི་རྒྱལ་ཁབ་ཕྱི་ལོགས་ཀྱི་ཆབ་སྲིད་ཀྱི་ལས་རིགས་ཁག་ནས་སྐུལ་སློང་དང་བྱ་ངན་སྤེལ་གྱི་ཡོད་ཚུལ་གྱི་མ་རུང་ཁོག་བཅངས་ཀྱི་དངོས་བདེན་མིན་པའི་བསྙོན་དཀྲི་དང་དྲིལ་བསྒྲགས་སྣ་ཚོགས་ཤིག་རྒྱལ་སྤྱིའི་ཁྱོན་ཡོངས་སུ་དུས་ནས་དུས་སུ་སྤེལ་དང་སྤེལ་མུས་ཡོད་པ་ཡིན་དུས། ང་ཚོའི་ངོས་ནས་ད་དུང་རྣམ་པ་གསར་པ་དང་འགྱུར་བ་གསར་པ་ཞིག་ཡོང་བར་རེ་བ་ཆེན་པོ་ཞིག་རྒྱག་ས་ལྷག་ཡོད་མེད་ཐོག་ངེས་པར་དུ་འགོ་མང་ཡོངས་ནས་བསམ་བློ་ཞིབ་འདངས་རེ་རྒྱག་དགོས་པ་གལ་ཆེན་དུ་མཐོང་།
མདོར་ན་བོད་ཡུལ་སྟོད་སྨད་བར་གསུམ་ཁྱོན་ཡོངས་སུ་རྒྱ་གཞུང་གི་དྲག་པོའི་དམག་གི་སྒྲིག་འཛུགས་སྔར་ལྷག་ཉིན་རེ་ནས་ཉིན་རེ་ཤུགས་ཆེ་རུ་བཏང་ནས་བོད་ནང་གི་བོད་མི་ཚོར་ཆོས་དད་རང་དབང་དང་འགྲོ་བ་མའི་ཐོབ་ཐང་། འགྲོ་འདུག་གི་རང་དབང་ཙམ་ཡང་མེད་པར་མ་ཟད། བོད་རིགས་ལ་མནར་གཅོད་གཏོང་རྒྱུར་ཡ་ང་སྙིང་རྗེ་སྤུ་རྩེ་ཙམ་མེད་པར་ཁག་དཀྲི་བསྙོན་འཛུགས་སྣ་ཚོགས་འོག་ཉེས་འཛུགས་དྲག་གནོན་སྣ་ཚོགས་ཤིག་བྱེད་བཞིན་ཡོད་པ་དང་། དེ་བཞིན་མི་རིགས་དབྱེ་འབྱེད་དང་མཐོང་ཆུང་། རིག་གཞུང་ལ་དམའ་འབེབ་དང་འཁོར་ཡུག་རྩ་གཏོར་བཅས་ཀྱི་ལས་འཆར་སྣ་ཚོགས་ཤིག་མུ་མཐུད་ནས་འཐེན་བཞིན་ཡོད་པ་རེད། ལྷག་པར་དུ་བོད་བསྟན་སྲིད་ཆེད་རང་ལུས་མེར་བསྲེགས་གནང་མཁན་ཚོ་དང་འབྲེལ་ཡོད་ལྟོས་བཅས་ཡོངས་ཀྱིས་མཚོན། བོད་བསྟན་སྲིད་ལ་སྲི་ཞུ་སྒྲུབ་མཁན་ཡོངས་ལ་མ་ཉེས་ཁག་གཡོགས་དང་ཉེས་མེད་ཉེས་འཛུགས་ཀྱིས་འཁྱོག་བཤད་རྫུན་བསྒྲགས་དང་འཛིན་བཟུང་བཙོན་འཇུག་སོགས་མི་སྤྱོད་ལས་འདས་པའི་སྡུག་སྦྱོང་མནར་གཅོད་ཇི་རིགས་གཏོང་བཞིན་ཡོད་པ་ཟུར་བལྟས་ལེབ་མཐོང་ཡིན་དུས། བོད་རྒྱའི་གནད་དོན་གཙང་སེལ་ཡོང་མིན་དེ་རྒྱལ་ཁབ་དང་ཚོགས་སྡེ་མི་སྒེར་བཅས་ཀྱི་རྒྱབ་སྐྱོར་ཡོད་མེད་དང་། རྒྱབ་སྐྱོར་མཚོན་ཆེད་དུ་གྲོས་ཆོད་བཞག་ནས་གཏམ་བཤད་ཕྲན་ཚེགས་རེ་སྤེལ་བ་ཙམ་ལ་རེ་བ་བརྒྱབས་ནས་བསྡད་ན་དུས་ཚོད་འཕྲོ་བརླག་ཙམ་ལས་གྲུབ་འབྲས་རྒྱ་ཆེན་པོ་ཞིག་ཐོན་ཐུབ་པར་ངོས་འཛིན་གཏན་ནས་བྱེད་ཀྱིན་མེད། རྒྱུ་མཚན་འདས་པའི་འཛམ་གླིང་གི་བྱུང་རབས་ལོ་རྒྱུས་ནང་རང་དབང་རང་བཙན་ཤོར་ཡོད་པའི་རྒྱལ་ཁབ་ཚོ་ལ། རྒྱལ་ཁབ་གཞན་གྱིས་རོགས་རམ་ལ་བརྟེན་ནས་རང་བཙན་བླངས་ནས་སྤྲད་བཞག་པའི་ལོ་རྒྱུས་ཧ་ལམ་གཅིག་ཙམ་ཡང་མེད་པའི་གནས་སྟངས་ང་ཚོས་ཤེས་དགོས་ལ། རྒྱལ་ཁབ་དེ་དག་གིས་སོ་སོའི་རྒྱལ་ཁབ་ཀྱི་ཕྱིར་ཚོང་འབྲེལ་ལམ་སོགས་སོ་སོའི་རྒྱལ་དོན་ལས་བོད་དོན་གལ་ཆེ་ལ་རྩི་མཁན་ཞིག་གཏན་ནས་མེད་པ་དེ་ཡང་ངེས་པར་དུ་ཤེས་དགོས། མི་རིགས་རང་ཉིད་ཀྱི་ནུས་པ་དང་ཆོད་སེམས་སྤོབས་པ་བཅས་ལ་བརྟེན་ནས་རང་གི་རྒྱལ་ཁབ་ཀྱི་ཁེ་དབང་དང་ཐོབ་ཐང་རྩོད་ལེན་བྱས་ནས་རང་དབང་རང་བཙན་ཐོབ་བཞག་པ་ད་ལྟའི་ང་ཚོའི་མིག་མདུན་ན་ཡོད་པའི་འཛམ་གླིང་མཉམ་འབྲེལ་རྒྱལ་ཚོགས་ནང་གི་ཕྱེད་བརྒལ་ཙམ་བོད་རྒྱལ་ཁབ་ཤོར་བའི་རྗེས་སུ་རང་བཙན་ཐོབ་བཞག་པ་ཡིན་ཙང་། ང་ཚོའི་ནང་ཁུལ་མགོ་རྡུང་སྤྲད་ཐབས་དང་གྲི་སོ་མདུང་སོ་ནང་ལ་བསྐོར་ནས་དགྲ་དགའ་གཉེན་སྡུག་གི་ལས་ཀར་འབད་རྩོན་བྱས་ནས་མ་བསྡད་པར། དངོས་ཡོད་ལོ་རྒྱུས་བདེན་དཔང་བྱས་ནས་མེས་པོ་ཚོའི་ཚེ་སྲོག་གི་རིན་ཐང་སྣང་མེད་དུ་མི་འཇོག་པར་རྡོག་རྩ་ཆིག་སྒྲིལ་གྱི་བདེན་དོན་འཐབ་རྩོད་ཀྱི་ལས་ལ་ཞུགས་དགོས་པའི་དུས་ལ་བབ་ཡོད་པར་མཐོང་།
ཕྱི་ལོ་༢༠༡༦ ཟླ་ ༠༣ ཚེས་ ༡༠ ཉིན་བོད་ཀྱི་རྩོམ་པོའི་གྲལ་འཁོད་པ་ཐུབ་བསྟན་བཀྲ་ཤིས་སམ་སྨྱུག་མིང་བོད་དུང་བས་བྲིས། བོད་རྒྱལ་ལོ། །
