དེ་བཞིན་དུ། སངས་རྒྱས་ཀྱི་བསྟན་པ་འདི་ཉིད་ཡུན་དུ་གནས་ཐབས་ཀྱི་ངོས་ཁོ་ན་ནས་བསམ་ནའང་༧གོང་ས་མཆོག་གི་དགོངས་གཞི་འདི་ཧ་ཅང་རྒྱ་ཆེ་ལ་གཏིང་ཟབ་པ་ཞིག་དུ་ཆགས་ཡོད་པ་སྟེ། སྤྱིར་དེང་གི་དུས་ཀྱི་སྐྱེ་བོ་རྣམས་ཕྱོགས་མང་པོ་ཞིག་ནས་ཆོས་ལུགས་ལ་དོ་སྣང་ཆུང་དུ་འགྲོ་བཞིན་ཡོད་པ་དང་། ཆོས་ལུགས་དག་གི་མིའི་སེམས་ནང་གི་གོ་གནས་ཀྱང་སྔར་ནང་བཞིན་ཅིག་བསྡད་མེད་པ་དེ་དངོས་ཡོད་དུ་གྱུར་ཡོད་པ་རེད་ལ། དེ་འདྲའི་ཉེན་ཁ་འདི་ཆོས་ལུགས་པ་དག་གིས་ཀྱང་གཏིང་ཟབ་པོས་ཚོར་བཞིན་ཡོད་པར་མ་ཟད། རང་རང་སོ་སོའི་ཆོས་ལུགས་ལ་ཕྱི་ཚུལ་ནས་འགྱུར་བ་མང་པོ་གཏོང་བཞིན་ཡོད་པ་དང་། ད་ལྟའི་མིའི་རིན་ཐང་གི་ལྟ་བ་སྣ་ཚོགས་དང་མཐུན་པའི་འགྲེལ་བཤད་དང་བྱེད་སྟངས་ཡང་མང་པོ་ཞིག་ལག་ལེན་དུ་འགེལ་བཞིན་ཡོད།
ནང་པའི་ཚོགས་སྡེ་གཞན་གྱིས་ཀྱང་། འཇིག་རྟེན་པའི་ནང་ཆོས་ཟེར་བ་ལྟ་བུ་དང་། ཆོས་ལུགས་གཞན་ལའང་དེ་དང་མཐུན་པའི་ཆོས་ལུགས་ཀྱི་ལག་ལེན་དེ་ཉིད་ཁོར་ཡུག་སྲུང་སྐྱོབ་དང་དགེ་ལས་སྦྱིན་གཏོང་སོགས་སྤྱི་ཚོགས་ཀྱི་དོ་སྣང་བྱེད་པའི་གནད་དོན་དང་སྦྲེལ་ནས་འགྲོ་ཐུབ་རྒྱུར་འབད་བརྩོན་བྱེད་པ་སོགས་ཀྱི་སྣང་ཚུལ་མང་པོ་ཞིག་བྱུང་དང་འབྱུང་བཞིན་ཡོད་མོད། ངས་བསམ་ན། ཕྱོགས་མང་པོ་ཞིག་ནས་ཆོས་ལུགས་དད་མོས་རང་གི་ཁྱབ་ཁོངས་ནས་ཆོས་ལུགས་འདི་སྔར་བཞིན་འགྲོ་ཐུབ་མིན་ཐད་དོགས་པ་ཆེན་པོ་ཡོད་པ་ཞིག་རེད།
