དེ་ཡང་ཉེ་བའི་དུས་ནས་༧གོང་ས་མཆོག་གིས་ལོ་རེ་བཞིན་སྐུ་ན་ཅུ་ཟད་སྨིན་པའི་ཚུལ་སྟོན་བཞིན་ཡོད་མིན་ལ་མ་ལྟོས་པར། རྒྱལ་སྲས་སེམས་དཔའ་ཆེན་པོའི་ངང་ཚུལ་བདག་གིར་བཞེས་ཏེ། རྒྱ་གར་གྱི་སློབ་གྲྭ་ཆེན་པོ་མང་པོ་ཞིག་ཏུ་གདན་ཞུས་གསོལ་བ་བཏབ་པ་བཞིན་ཞབས་ཀྱིས་བཅགས་ཤིང་རླབས་ཆེན་གྱི་དགོངས་གཞི་འདི་ཉིད་ངོ་སྤྲོད་གནང་བར་མ་ཟད། ནཱ་ལེན་དྲའི་རིག་གཞུང་དང་འབྲེལ་བའི་ལྟེ་གནས་ཁང་དེ་འདྲའང་ཆེད་དུ་དབུ་འཛུགས་གནང་བའི་ཐོག་ནས་གལ་ཆེན་གྱི་ཕྱག་ལས་ཧ་ཅང་མང་པོ་ཞིག་ད་ལྟའང་འགྲོ་བཞིན་པར་མ་ཟད། འདི་ལ་རྒྱ་གར་གཞུང་དམངས་སྤྱི་དང་འབྲེལ་ཡོད་མངའ་སྡེ་ཁག་གི་བློན་ཆེན་དང་སྲིད་གཞུང་རིམ་པ་སོགས་ཀྱིས་ཚད་མཐོ་བའི་རྒྱབ་སྐྱོར་དང་གཞོགས་འདེགས་ཀྱང་ཞུ་བཞིན་ཡོད།
༧གོང་ས་མཆོག་གི་རླབས་ཆེན་གྱི་དགོངས་གཞི་བཞི་པ་འདི་ཉིད་མགོ་བོ་ཤིན་ཏུ་འཁྲེགས་པའི་རྒྱ་གར་སྤྱི་ཚོགས་ཀྱིས་ཀྱང་དེ་ཙམ་དུ་ཚད་མཐོའི་དང་ལེན་ཞུས་པ་དང་། གཞི་རྒྱ་ཆེན་པོའི་སྒོ་ནས་ལག་ལེན་དུ་བསྟར་ཐུབ་པ་འདི་འདྲ་ཞིག་རྒྱ་གར་བ་ཞིག་གིས་སྒྲུབ་མི་ཐུབ་པ་ཞིག་ཡིན་ན། རྒྱ་གར་གནའ་བོའི་རིག་གཞུང་གི་རྗེས་འབྲངས་སུ་ཁས་ལེན་བྱེད་པའི་ནང་པའི་རྗེས་འཇུག་གཞན་སུ་ཞིག་གིས་ཀྱང་སྒྲུབ་མི་ཐུབ་པ་ཞིག་ཡིན་པ་ནི་གོང་དུའང་སྨོས་ཟིན་ཏེ། དེ་ནི་༧གོང་ས་མཆོག་འབའ་ཞིག་ལ་མངའ་བའི་དབང་ཐང་དང་ནུས་པ་ཡིན་པ་འདི་ངེས་པར་དུ་ངོས་ཟིན་དགོས་པ་ཞིག་ཡིན།
ད་ཆར་དབུ་འཛུགས་ཟིན་པའི་ནཱ་ལེན་དྲའི་རིག་གཞུང་བསྟི་གནས་ཁང་ལྟ་བུ་གནའ་བོའི་རྒྱ་གར་རིག་གནས་ཀྱི་ཉིང་བཅུད་སླར་གསོ་བྱ་ཡུལ་གྱི་ལྟེ་བའི་སྒྲོམ་གཞིའི་མ་ལག་འདི་དག་བརྒྱུད་ནས་རྩ་བ་བརྟན་པོའི་སྒོ་ནས་མུ་མཐུད་འདིས་རྒྱ་གར་གྱི་གནའ་བོའི་དཔལ་ཡོན་སླར་གསོར་སྣེ་ཁྲིད་ཀྱི་ནུས་པ་གཏིང་ཟབ་ཐོན་ངེས་རེད།
