འོན་ཀྱང་༧གོང་ས་མཆོག་གི་ངོས་ནས་དམིགས་བསལ་གྱི་ལམ་ཁ་ཞིག་གཏོད་གནང་ཞིང་འདིས་ནི་ཆོས་ལུགས་འདི་དགེ་ལས་དང་སྦྱིན་གཏོང་གི་སློབ་ཡོན་རོགས་སྐྱོར་དང་མུག་སྐྱོབ་སྤྲོད་མཁན་ཙམ་ཞིག་སྣང་བརྙན་གྱི་ཐོག་ནས་གནས་ཐུབ་བྱེད་པ་མ་ཡིན་པར། མུ་མཐུད་འཇིག་རྟེན་མི་སྡེ་འདིའི་ནང་སེམས་ཀྱི་རིག་གཞུང་དང་ཀུན་སྤྱོད་ཀྱི་རིག་གཞུང་། དད་མོས་དང་ཉམས་ལེན་གྱི་རིག་གཞུང་སོགས་དུ་མ་ཞིག་དང་གཏིང་ཟབ་པོས་འབྲེལ་བ་འཐུད་དེ་མུ་མཐུད་སངས་རྒྱས་ཀྱི་དགོངས་པ་འདིས་འགྲོ་བ་སེམས་ཅན་ཐམས་ཅད་ལ་ཞབས་ཞུ་ཞུ་རུ་འཇུག་རྒྱུ་དེ་རེད། དེ་ལྟར་སྒྲུབ་མཁན་དེ་ནི་རང་ཅག་གི་ཆེས་བླ་ན་མེད་པའི་སྐྱབས་མགོན་གོང་ས་ཐམས་ཅད་མཁྱེན་པའི་རླབས་ཆེན་གྱི་མཛད་པ་རིན་པ་རིན་པོ་ཆེའི་ཆ་ཤས་ཏེ། ཁོང་ནི་དེ་ལྟར་སངས་རྒྱས་ཀྱི་དགོངས་པ་མཐར་ཐུག་སྒྲུབ་མཁན་གྱི་བྱང་སེམས་བདག་ཉིད་ཆེན་པོ་སྟེ། ཚུལ་འདི་དགོངས་ནས། རྒྱལ་སྲས་ཆེན་པོ་ཞི་བ་ལྷས་ཀྱང་། སེམས་ཅན་འགུ་བྱ་མ་གཏོགས་པ། །རྒྱལ་བ་དགྱེས་པའི་ཐབས་མེད་དོ། །ཞེས་གསུངས་པ་ཡིན་ནོ།།
ཞེས་ཟག་མེད་ཀྱི་ཆོས་སྡེ་ཉེར་ལྔའི་གྲངས་སུ་ཡོད་པའི་ཚན་པ་ཉེར་ལྔ་ཅན་གྱི་རྩོམ་ཡིག་འདི་ཡང་༧མགོན་པོ་སྤྱན་རས་གཟིགས་དབང་ཕྱུག་ཐུགས་རྗེ་དང་ལྡན་པ་གང་གི་བཀའ་དྲིན་དང་ཐུགས་རྗེས་ཉེ་བར་འཚོ་བའི་འབངས་རྫ་ཚེ་རིང་བཀྲ་ཤིས་ཀྱིས་སྤྱི་ལོ་༢༠༢༠ ཟླ་ ༩ ཚེས་ ༣ ཉིན། ཨོ་གླིང་གི་རི་བོ་སྔོན་པོའི་རང་གནས་སུ་ལེགས་པར་སྦྱར་བའོ།།
