ཡིག་གཟུགས་འདི་ལ་ཀུ་བྲིས་ཞེས་བརྗོད། ནང་གསེས་སུ་ཀུ་བྲིས་གསར་རྙིང་གཉིས་སུ་དབྱེ།
ཀུ་བྲིས་གསར་མ་ནི་དུས་རབས་བཅུ་དགུ་པའི་དཀྱིལ་ཙམ་དུ་བྱུང་བ་གསལ། ཐོག་མར་འབྲི་མཁན་ནི་སྔ་འགྱུར་རྨུགས་སངས་དགོན་པའི་གདན་རབས་དང་། ཚེ་རིང་བླ་མའམ་མཚོ་བྱུང་བཞད་པའི་གེ་སར་གྱིས་མཛད་པའི་བྲིས་ཀྱི་བསྟན་བཅོས་སོགས་ན་འཁོོད་པའི་མཁས་དབང་ཀརྨ་ཚེ་དཔལ་ལམ། རྒྱལ་སྲས་འཇམ་དབྱངས་ཆོས་ཀྱི་ཉི་མ་བློ་གྲོས་རྒྱས་པའི་སྡེ་ཡིན་པར་གསལ། ཀུ་བྲིས་གསར་མ་ལ་ཚུགས་ཆེན་དང་། ཚུགས་འབྲིང་། ཚུགས་ཆུང་གཙོས་ནང་གསེས་སུ་བྲིས་གཟུགས་ཀྱི་རྣམ་གྲངས་ཤིན་ཏུ་མང་། དེང་སང་ལ་ལས་ཁམས་བྲིས་དང་སྡེ་བྲིས་ཞེས་ཀྱང་འབོད་ཀྱིན་འདུག། ༼ཁམས་བྲིས༽ནི་ཀུ་སེའི་ཡུལ་ཁམས་ཕྱོགས་སུ་ཡིན་པའི་རྐྱེན་གྱིས་བཏགས་པས་སོ།། ༼སྡེ་བྲིས་༽ཞེས་བརྗོད་པ་ནི་ཀུ་སེ་མཚོ་དྲུག་སྔོན་ཆད་སྡེ་དགེ་རྒྱལ་པོའི་མངའ་འོག་གི་འབངས་ཡིན་པས་སོ།། ཐོག་མར་འབྲི་མཁན་དང་རྒྱུད་འཛིན་གནང་མཁན་ཡོངས་རྫོགས་འཇོ་མདའ་ཀུ་སེ་ནས་ཡིན་པ་དང་། ལྷག་པར་ཀུ་སེའི་སྡེ་རྙིང་དཔལ་ཁང་ཤོག་གསུམ་དུ་རྒྱུད་འཛིན་ཡིག་མཁན་གྲགས་ཅན་དུ་མ་ཞིག་བྱུང་ཡོད་པ་ནི། འདས་པའི་ལོ་རྒྱུས་དང་ད་ལྟའི་གནས་སྟངས་ཀུན་ཀྱིས་ར་སྤྲོད་ཐུབ། རྒྱུན་སྤྱོད་ཀྱི་འདོན་ཆ་དང་། ཉེ་མཁོའི་ཡིག་ཆ་འབྲི་བ་ལ་བྲིས་གཟུགས་ཀུན་ཀྱི་ཡང་རྩེར་སོན་ཡོད་པའང་མཐོང་ཆོས་སུ་གྱུར།
ཀུ་བྲིས་རྙིང་མ་དབུ་ཅན་ནི་སྡེ་དགེ་པར་ཁང་ནང་གི་བཀའ་བསྟན་སོགས་ཀྱི་ཡིག་གཟུགས་དེ་ལ་ངོས་བཟུང་དགོས་ཤིང་། དེ་དག་གི་པར་རྩ་འབྲི་མཁན་དང་། པར་དུ་རྐོ་མཁན་བཅས་ཀུ་སེ་རང་ནས་ཡིན་པས་དེ་ལ་ཀུ་བྲིས་རྙིང་མ་ཞེས་ཀྱང་བརྗོད་པ་ཡིན་ནོ།། ཁ་རྒྱབ་ཉི་མའི་དྲྭ་ངོས་ནས་དྲངས། གཞན་ལས་བཤུས།
