དེ་དག་གི་ནང་ནས་ད་ལྟ་ཧ་ཅང་སྤྱིར་བཏང་དང་བཅོས་མ་ཡིན་པ། དཀྱུས་མ་བཅས་ཡིན་པའི་ཕྲུ་གུ་མང་པོ་ཞིག་མ་འོངས་པར་རྒྱ་གར་རྒྱལ་ཁབ་ཆེན་པོའི་བདག་པོ་ཉག་གཅིག་སྟེ། སྲིད་འཛིན་དང་སྲིད་བློན། ཁྲིམས་དཔོན་དང་གྲོས་འཐུས། ཆོས་ལུགས་དབུ་ཁྲིད་དང་ཁེ་ལས་དེད་དཔོན། ཚན་རིག་པ་ནས་སྤྱི་ཚོགས་ལས་རིགས་ཁྲོད་ཀྱི་ཆེད་མཁས་པ་བཅས་སུ་འགྱུར་ངེས་པ་ཡིན་ཞིང་། སྐབས་དེར་ཁོང་ཚོའི་བསམ་བློ་དང་འདུ་ཤེས་ཀྱི་གཏིང་རིམ་དུ་ཡོད་པའི་རིན་ཐང་དང་ངོས་འཛིན་གྱི་ཤུགས་རྐྱེན་ནི་ཧ་ཅང་དཔོག་པར་དཀའ་བ་ཞིག་སྟེ། དེས་ན་༧གོང་ས་མཆོག་གིས་ཕྱག་ལས་འདི་ཉིད་གཙོ་ཆེར་གཞོན་སྐྱེས་དང་སློབ་མ་དག་ལ་ངོ་སྤྲོད་གནང་བ་ནི། དགོངས་གཞི་འདི་ཉིད་ཡོངས་སུ་མ་འོངས་པ་དང་འབྱུང་འགྱུར་ལ་ཁ་ཕྱོགས་པའི་ལས་འཆར་ཞིག་ཆགས་པ་རེད། འདི་ནི་ཅི་འདྲའི་ཡིད་འཕྲོག་པ་ཞིག་རེད།
དེས་ན་༧གོང་ས་མཆོག་གིས་མི་ལོ་འདི་དག་གིས་རིང་དུ་ཡོངས་ཁྱབ་ཀྱི་མཛད་འགན་གསུམ་གྱི་ཐོག་ཏུ་བཞི་པ་ངོ་སྤྲོད་གནང་བ་དང་། དེ་ཡང་གཙོ་བོ་མ་འོངས་པའི་སྤྱི་ཚོགས་ཀྱི་མངའ་བདག་ཏུ་གྱུར་པའི་སློབ་མའི་ཚོགས་ཆེན་པོ་དག་དགོངས་གཞི་འདི་ངོ་སྤྲོད་བྱ་ཡུལ་དུ་བདམས་པ་ནི་དངོས་གནས་ཅི་འདྲའི་མཁྱེན་རྒྱ་ཡངས་པའི་རླབས་ཆེན་གྱི་མཛད་པ་ཞིག་རེད་ཨང་།
