དེ་ཡང་གཞན་དག་ཚོས་ཆོས་ལུགས་ཀྱི་མཐར་ཐུག་གི་དགོངས་དོན་ཏེ། ཆེས་མཐོའི་ཕུགས་འདུན་བསྙེགས་པའི་སེམས་དོན་གྱི་ཉམས་ཉེན་དང་ལྟ་གྲུབ་སོགས་བཏང་སྙོམས་སུ་བཞག་སྟེ། སྤྱིར་བཏང་གི་དགེ་ལས་ཚོགས་པ་ཞིག་ལྟར་མི་མང་གི་འཕྲལ་སེལ་གྱི་དབུལ་སྐྱོབས་དང་། སློབ་གསོ་དང་འཚོ་བ་ལ་རོགས་སྐྱོར་བྱེད་པ་སོགས་ཀྱི་བྱ་ཐབས་ལ་ཤུགས་སྣོན་བཞིན་ཡོད།
ཐབས་ལམ་འདི་ནི་ད་ལྟའི་ཆར་ཡེ་ཤུའི་ཆོས་ལུགས་ལྟ་བུར་མཚོན་ན་ཆོས་ལུགས་དེ་ཉིད་ཁྱབ་སྤེལ་དང་མུ་མཐུད་སྤྱི་ཚོགས་ཀྱི་ཐོག་ཏུ་འཚོ་གནས་བྱེད་པའི་ཐབས་ལམ་ལྟེ་བ་ལྟ་བུ་ཞིག་ཏུ་ཡོད་ལ། རང་རེ་ནང་པའི་སྤྱི་ཚོགས་སུའང་མ་འོངས་པར་ནང་བསྟན་འདི་ཉིད་ལ་སྤྱི་ཚོགས་ཁྲོད་མུ་མཐུད་དེ་དར་རྒྱས་ཡུན་གནས་ཀྱི་སྡིངས་ཆ་ཞིག་ཡོད་དགོས་ན་ལམ་ཁ་གཙོ་བོ་ཞིག་ནི་སྤྱི་ཚོགས་ཀྱི་བདེ་དོན་ལ་དོ་སྣང་གནང་ནས་སྤྱི་ཕན་གྱི་ལས་འགུལ་ལ་ཞུགས་ཚད་མཐོ་རུ་གཏོང་བ་སོགས་ཡིན་པའི་གཟིགས་ཚུལ་ཤུགས་ཆེན་པོ་ཞིག་ཡོད།
ཡིན་ནའང་། ཆོས་ལུགས་རང་གི་ཁྱབ་ཁོངས་སུ་ཡོད་པའི་ནང་སེམས་ཀྱི་རྣམ་གཞག་སྟོན་པའི་གཞུང་ལུགས་དེ་དག་ཆོས་ལུགས་ཀྱི་མཚམས་ལས་བརྒལ་ཏེ་སྤྱི་ཚོགས་རང་བཞིན་པའི་སློབ་གསོ་དང་འཚོ་བའི་ཆ་ཤས་སུ་མཉམ་ཞུགས་ཐུབ་རྒྱུ་ཡིན་པ་དེར་གདེང་ཚོད་ཡོད་མཁན་དང་སེམས་ལ་དྲན་མཁན་ཙམ་ཡང་ཧ་ཅང་དཀོན།
