<<ང་ཚོའི་འགྲུལ་བཞུད་རིང་མོ་>>མཚམས་སྦྱོར།
ནགས་ཤོད་ཅོང་བརྡ། སྤྱི་ལོ་ལྟར་ན་༢༠༢༤ ལོར་གུས་པས་བཀླགས་པའི་དེབ་དང་པོ་དེ་<<ངོ་ཚོའི་འགྲུལ་བཞུད་རིང་མོ་>>ཞེས་པ་འདི་ཡིན། དེབ་འདིའི་རྩོམ་པ་པོ་དགེ་བཤེས་ལྷ་རམས་པ་ངག་དབང་བསྟན་པ་ལགས་ནི་ནགས་ཤོད་སྦས་ཡུལ་སྨན་ལྗོངས་སུ་སྐྱེས་པ་དང་། བོད་ཕྱི་ནང་གཉིས་དང་ཆབ་སྲིད་ཀྱི་འགྱུར་ལྡོག་ཆེ་ཕྲ་གང་མང་བརྒྱུད་མྱོང་མཁན་ཞིག་ཡིན་པས་དང་། བོད་རང་གི་ཆོས་རིག་ལ་སློབ་གཉེར་ཚད་མཐོར་བྱེད་མྱོང་བ་མ་ཟད་སྐད་ཡིག་གཞན་པའི་ཆུ་ཚད་ཀྱང་བཤད་མ་དགོས་པ་ཞིག་རེད་འདུག་པས་འདབ་ཤོག་གཉིས་ལྡན་ཟེར་བ་དེ་ཡིན་འདུག། དེབ་འདིའི་བརྗོད་བྱ་དང་ཚིག་རྩ་འཛིན་སྟངས། ཡང་ན་བརྗོད་བྱེད་ཀྱིས་བརྗོད་བྱའི་གལ་གནད་འཛིན་སྟངས་སོགས་ལ་དམིགས་བསལ་གྱི་ཁྱད་ཆོས་འདུག་བསམ་ཡོད། ཡང་བསམ་མནོ་གཞན་པ་ཞིག་གཏོང་ན་དབྱངས་གསལ་གྱི་སྐུད་པ་འཁེལ་རྒྱུར་དཀའ་ངལ་ཆེར་མེད་མཁན་ཞིག་ལ་མཚོན་ན་རྩོམ་འདི་འདྲ་ཞིག་རྒྱག་རྒྱུར་ཉམ་ང་ཆེར་མེད་སྣང་ཡང་སྐྱེས་བྱུང་། དེབ་འདིའི་ཁྱད་ཆོས་གཙོ་བོ་དེ་དངོས་ཡོད་ཀྱི་འཚོ་བ་ཟབ་མོར་འབྲི་ཐུབ་འདུག་པ་འདི་རེད་བསམ་ཡོད། འཚོ་བ་འདི་འདྲ་བ་ཞིག་ང་ཚོ་ཡུལ་གྱར་བ་ཕལ་ཆེ་བས་བརྒྱུད་ནས་ཡོང་བ་སོང་། རྩོམ་འདི་འདྲ་ཞིག་ང་ཚོ་སུས་ཀྱང་རྒྱག་ཐུབ་ལ་ཐུབ་དགོས་ངེས་ཀྱང་ཡིན། རེད་དེ། ང་ཚོ་མང་པོས་འདི་ནི་གལ་ཆེན་པོ་ཞིག་ཡིན་པ་ཤེས་མེད། དེ་ནི་ཤེས་རབ་ལྡན་མིན་ལ་རག་ལས་ཡོད་པ་རེད། གོ་བདེ་བོར་བཤད་ན་མིག་རྒྱང་རིང་ཐུང་ཟེར་བ་དེ་ཤོར་སོང་བ་འདྲ། དེབ་འདི་སྐད་ཆ་ཉུང་ཉུང་ཞིག་གིས་བཤད་དགོས་ན་དེ་ནི་ལོ་རྒྱུས་ཀྱི་ཡིག་ཚགས་གལ་ཆེན་ཞིག་རེད་ཅེས་བཤད་ན་འདོད། ...
