སྔ་ལོར་ནད་ཡམས་ཀྱི་རྐྱེན་པས་ཐེམ་སྤང་བཀའ་རྒྱ་བྱས་རིང་། དུས་ཁོམ་མང་པོ་བྱུང་སྟབས། རང་ནུས་ཅི་ལྕོགས་ཀྱི་སྒོ་ནས་བོད་རིག་པའི་མཁས་དབང་དམ་པ་Elliot Sperling གྱི་དཔྱད་རྩོམ་གང་མང་ཞིག་བཀླགས་ཏེ། མཐར་དཔྱད་རྩོམ་དགུ་བོད་ཀྱི་སྐད་དུ་བསྒྱུར་བའི་བསྐལ་བ་བྱུང་ལ། འགྱུར་རྩོམ་དེ་དག་དེབ་གཟུགས་སུ་བཟོས་ཏེ་བོད་ཀྱི་དཔེ་མཛོད་ཁང་ནས་དངོས་སུ་པར་སྐྲུན་བྱས་གྲུབ་པས། རྒྱ་ཆེའི་ཀློག་པ་པོ་རྣམས་ཀྱི་སྤྱན་ལམ་དུ་ཕུལ་ཡོད། འགྱུར་རྩོམ་འདི་ནི་ཕྲན་གྱི་འགྱུར་དེབ་ཐོག་མ་དེ་ཡིན་པར་མ་ཟད། སྐད་གཉིས་ལ་བྱང་ཆ་དེ་ཙམ་མེད་པ་དང་། ལོ་རྒྱུས་དང་ཆབ་སྲིད་དང་འབྲེལ་བའི་བརྗོད་བྱ་ལ་གོ་རྟོགས་དམན་པ། བརྗོད་བྱེད་དབྱིན་ཚིག་ལ་གོ་བ་ཏག་ཏག་མ་ལོན་པ་ལ་སོགས་པར་བརྟེན་ནས། འགྱུར་སྐྱོན་སོགས་ཡོད་སྲིད་པས་ཀློག་པ་པོ་རྣམ་པས་དེ་ལུགས་སེམས་སུ་བཟུང་ནས་ནོར་འཁྲུལ་ཡོད་བསྲང་དང་དག་ཐེར་ལེགས་བཅོས་གནང་རོགས། གཞན་ཡང་རྩོམ་སྒྱུར་གྱི་ལས་ཀ་བྱས་རིང་གྲོགས་པོ་མང་པོ་ཞིག་གིས་ཕྱག་རོགས་གང་མང་གནང་བྱུང་བས་ཁོ་ཅག་ལ་སྙིང་དབུས་ནས་བཀའ་དྲིན་ཆེ་ཞུ།
སུམ་པ་ཕུན་ཚོགས་ཀྱིས།
