གསར་འགྱུར།

ཕྱི་ལོ ༢༠༢༤ ཟླ་བ་ ༠༧ ཚེས་ ༠༣ རེས་གཟའ་ལྷག་པ་སྐུའི་བླ་གཟའ་ཉིན་རྒྱ་གར་ལྷོ་ཕྱོགས་མོན་གྷོ་འབྲས་སྤུངས་བློ་གསལ་གླིང་དཔེ་མཛོད་ཚོགས་ཁང་དུ་ཁམས་པའི་སྨྱུག་ཚོགས་ཀྱི་འབྲི་ཆུ་ཆེད་དེབ་སྤྱིའི་འདོན་ཐེངས་བདུན་པ་དབུ་འབྱེད་མཛད་སྒོ་དང་བགྲོ་གླེང་བཅས་ལེགས་འགྲུབ་བྱུང་ཡོད།

སྤྱི་ནོར་༧གོང་ས་༧སྐྱབས་མགོན་རྒྱལ་བའི་དབང་པོ་མཆོག་གི་སྐུའི་འཁྲུངས་སྐར་ལ་འཚམས་འདྲིའི་བཀྲིས་བདེ་ལེགས་ཞུ་རྒྱུ་དང་སྐུ་ཚེ་བསྐལ་བརྒྱལ་བརྟན་ཅིང་། ཐུགས་བཞེད་མཐའ་དག་གེགས་མེད་ལྷུན་གྱིས་འགྲུབ་པའི་སྨོན་འདུན་ཞུ་རྒྱུ་བཅས་ཁམས་པའི་སྨྱུག་ཚོགས་ཀྱིས།

འབྲི་ཆུ་སྤྱིའི་འདོན་ཐེངས་བདུན་པའི་ཞུ་དག་ལེགས་གྲུབ་བྱུང་ཡོད།

བློ་ཕམ་པ་ཞིག་ལ་ཁམས་པའི་སྨྱུག་ཚོགས་སྐབས་བདུན་པའི་ཚོགས་གཙོ་ཟུར་པ་རྒན་བྱ་ཁྲ་བསོད་ནམས་ལགས་ཉེ་ཆར་གློ་བུར་དུ་དགོངས་པ་རྫོགས་པའི་ཡིད་སྐྱོ་བའི་གནས་ཚུལ་བྱུང་འདུག དམ་པ་ཁོང་ནི་མི་ཚེ་ཧྲིལ་བོར་བོད་མི་རིགས་ཀྱི་རིག་གནས་ལ་དུང་བ་ཟབ་པ་མ་ཟད།  ལོ་མང་རིང་དགེ་རྒན་གྱི་ཕྱག་ལས་ཀྱང་གནང་མྱོང་ཡོད།  ཁོང་གློ་བུར་དུ་དགོངས་པ་རྫོགས་པ་དེ་ནི་མི་རིགས་དང་ཤེས་ཡོན་གྱི་དཔུང་སྡེ་ལ་གྱོང་གུད་ཆེན་པོ་ཞིག་ཕོག་པར་ངོས་འཛིན་བྱེད་ཀྱི་ཡོད། གཞན་ཡང་དམ་པ་ཁོང་ནི་ཁམས་པའི་སྨྱུག་ཚོགས་འདིར་ལྷག་བསམ་ཞེན་པ་དཀར་བའི་ཚོགས་མི་རྒན་གྲས་ཤིག་དང་། ལྷག་པར་དུ་ཁམས་པའི་སྨྱུག་ཚོགས་སྐབས་༡༦ པའི་རྒྱུན་ལ་ཁྱེད་ཚོའི་ངོས་ནས་མདོ་ཁམས་ལོ་རྒྱུས་ཆེན་མོའི་རྩོམ་སྒྲིག་ལས་དོན་ཐོག་དམིགས་གསལ་ཤུགས་རྒྱག་དགོས་པའི་གཞེན་སྐུལ་དང་།  འགྲོ་གྲོན་སོགས་གང་ཅིའི་ཐད་ནས་རྒྱབ་སྐྱོར་གནང་རྒྱུའི་ཞལ་བཞེས་གནང་སོང་ལ། གཞན་ཡང་སྨར་ཁམས་ཡུལ་ཕྱོགས་ཀྱི་ལོ་རྒྱུས་མཁོ་སྒྲུབ་དང་ལོ་རྒྱུས་རྒྱུ་ཆ་སོགས་མཁོ་སྤྲོད་བྱེད་རྒྱུའི་འགན་ཁུར་བྱེད་ཀྱི་ཡིན་ཞེས་ཞལ་བཞེས་བཟང་པོ་ཞིག་ཀྱང་ཐོབ་ཡོད། ད་ལན་ཧ་ཅང་གི་བློ་ཕམ་པ་ཞིག་ལ། དམ་པ་ཁོང་སྐུ་ཚེ་མ་ཟིན་པའི་གནས་ཚུལ་གོ་ཐོས་བྱུང་བར་བརྟེན་ངེད་ཁམས་པའི་སྨྱུག་ཚོགས་ཀྱི་ཚོགས་མི་ཡོངས་དང་རྒྱུན་ལས་སྐབས་ ༡༦  པའི་ངོས་ནས་བློ་ཕམ་ཚད་མེད་དང་བཅས། སྐྱེ་བ་ནས་ཚེ་རབས་ཐམས་ཅད་དུ་འཕགས་མཆོག་སྤྱན་རས་གཟིགས་ཀྱིས་རྗེས་སུ་བཟུང་ཞིང་། རྟེན་བཟང་རྣམ་དག་འཐོབ་པའི་སྨོན་ལམ་ཤུགས་དྲག་དང་བཅས་ཤུལ་ལུས་ནང་མི་ཡོངས་ལ་མྱ་ངན་དང་གདུང་སེམས་མཉམ་བསྐྱེད་ཞུ། ༢༠༢༣/༡༠/༡༦ ཉིན་ཁམས་པའི་སྨྱུག་ཚོགས་སྐབས་༡༦ པའི་རྒྱུན་ལས་ཐུན་མོང་ནས།

”ཀཿ བྲག་མགར་གྱི་རུས་མཛོད་”ཅེས་པའི་ཕྱག་དེབ་འདི་ནི། ཁམས་པའི་སྨྱུག་ཚོགས་ཀྱི་ཚོགས་གཙོ་བཀུར་འོས་སྤྱི་འཐུས་མཁན་པོ་ཀཿ བྲག་དངོས་གྲུབ་བསོད་ནམས་མཆོག་གིས་བརྩམས་གནང་བ་ཞིག་རེད། སྤྱི་ཚེས ༩ ཉིན་བོད་ཀྱི་དཔེ་མཛོད་ཁང་ནས་ལོ་རྒྱུས་དེབ་ཕྲེང་༧༦ མིང་བྱང་འོག་ནས་དབུ་འབྱེད་མཛད་སྒོ་གནང་འདུག