འཁྲུངས་དུས་འབྲུག་སྐད་གྲགས་རབས་མ་ཐོས་ཤིང་། །
གཤེགས་དུས་འཇའ་ཚོན་བཀྲ་བའང་མ་རིག་ཀྱང་། །
ཨ་མའི་བུ་ཡི་ཤེས་འཇོན་ངོམ་ས་ཡི། །
དགའ་ལྡན་ཁྲི་ཡི་སྟེང་དུ་བཞུགས་པར་མཇལ། །
ཆུང་དུས་མ་བསླབ་མཁྱེན་པར་མ་གོ་ཞིང་། །
རྒན་དུས་མཁས་དབང་ཡིན་རབས་མ་གྲགས་ཀྱང་། །
དགེ་ལུགས་རྒྱུགས་སྤྲོད་ཆེན་མོའི་གྲུབ་འབྲས་ལས། །
རྩེ་ཕུད་དང་པོ་ལེན་པའི་རྣམ་ཐར་ཐོས། །
ཡང་སྲིད་ཟེར་ནས་སྤྲུལ་མིང་མ་ཐོགས་ཤིང་། །
སྐུ་ངོ་ཟེར་ནས་རྐུབ་བཏེགས་༼རྐུབ་སྟེགས༽མ་རྩོད་པར། །
འདོད་ཆུང་ཆོག་ཤེས་བསྟེན་པའི་ཆོས་གོས་འོག །
བསྟན་པའི་རྒྱལ་མཚན་འཛིན་པའི་བུ་ཞིག་མཇལ། །
སྒེར་གྱི་མིང་ཐོག་ཆོས་ཚོགས་མ་བཙུགས་ཤིང་། །
མིང་གྲགས་ཆེད་དུ་གང་སར་མ་ཕེབས་ཀྱང་། །
མགོ་བསེ༼སེར་མགོ་ནག་སློབ་མ་བུང་བ་བཞིན། །
དྲི་བཟང་ཕྱོགས་སུ་འཁོར་བར་ཁོ་བོས་རིག །
དཀའ་ཚེགས་ཆེ་དུས་ཕྱི་ཡུལ་མ་བྲོས་ཤིང་། །
འབྱོར་བ་རྒྱས་དུས་ཁྲི་འཕང་མ་རྩོད་ཀྱང་། །
གདིང་བ་གདིང་བས་དེད་པའི་བྱིན་རླབས་ལས། །
སྐྱེས་ཆེན་ཞིག་གི་བཞུད་ལམ་འདི་ནས་མཇལ། །
གསར་གཏོད་ཟེར་ནས་ལས་རྒྱུ་མ་མང་ཞིང་། །
དེང་སང་ཟེར་ནས་བཟོ་བཅོས་མ་བྱས་པར། །
འདུལ་ཁྲིམས་ཚུལ་བཞིན་སྡོམ་པས་ཞལ་ངོའི་སྐབས། །
བླ་མ་མཉེས་པའི་མཆོད་སྤྲིན་ཕུལ་བར་ཐོས། །
མཐོན་པོ་མི་ལ་ལྕེ་༼ནརསྣར་མ་ཤེས་ཤིང་། །
དམའ་རབས་བསམ་ནས་ཁྱད་གསོད་མ་བྱས་པར། །
ཁ་རི་ཁ་ཐུག་ཁམས་པའི་རང་གཤིས་དེས། །
བླ་མ་མཉེས་པར་དམ་པའི་ཞལ་ནས་ཐོས། །
མདོར་ན་འདུལ་བའི་བཅས་ཁྲིམས་མིག་བཞིན་བསྲུངས། །
བཤེས་གཉེན་བསྟེན་ཚུལ་སྲོག་ལས་གཅེས་པར་འཛིན། །
ཟས་གོས་ངན་ངོན་ཙམ་གྱིས་འཚོ་བའི་ཁྲོད། །
རྗེ་ཡི་ཁྲི་ལ་ཕེབས་པའི་རྣམ་ཐར་རོ། །
བཞུགས་དུས་མདུན་དུ་བཅར་བ་མ་མང་ཞིང་། །
གཤེགས་དུས་མིག་ཆུ་ཕྱི་ལ་མ་བསྐྱིལ་ཡང་། །
དད་དམ་རྨུ་ཐག་སེམས་ནས་མ་ཡལ་བའི། །
སློབ་བུའི་གྲལ་གྱི་མཐར་ནས་ཤར་མར་བྲིས། །
དགའ་ལྡན་ཁྲི་ཐོག་བརྒྱ་དང་གསུམ་པ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་དགོངས་པ་ཆོས་དབྱིངས་སུ་གཤེགས་པས་གང་གི་སློབ་བུའི་གྲལ་མཐར་འཁོད་པ་ཨ་སྤེན་གྱིས་༢༠༡༧–༠༤–༢༦ ཉིན།
སྒྲོ་འདོགས་དང་བཅོས་སྒྲུང་སྤངས་ཏེ་དོན་དམ་བླ་མའི་རྣམ་ཐར་རང་ངོར་ཤར་བ་ཙམ་དུ་བགྱིས་སོ།།
