ང་དང་གྲོགས་པོ་ཁག་ཅིག་གིས་ཉིན་འགའི་སྔོན་རང་རེ་བོད་མི་རིགས་ཀྱི་ཡུལ་སྲོལ་དང་གོམ་གཤིས་སྐོར་ལ་བགྲོ་གླེང་ཞིག་བྱས། རིམ་བཞིན་ང་ཚོའི་བགྲོ་གླེང་དེ་ལས་འཕྲོས་དེ་ང་ཚོ་ནགས་ཕྲན་སྡེ་བའི་ནང་ལོ་གསར་སྐབས་འབེ་ཟེར་བའི་སྒོ་ཕྱུགས་སེམས་ཅན་གྱི་འདྲ་གཟུགས་བཅའ་སྲོལ་ཡོད་པའི་སྐོར་ལ་གླེང་མོལ་བྱས་པ་ཡིན། ང་ཚོ་བགྲོ་གླེང་བྱེད་མཁན་དག་ནི་སློབ་གྲྭ་བ་དང་དགེ་རྒན། གྲྭ་ས་བ་བཅས་ཐེ་བའི་ཤེས་ཡོན་ལ་སྦྱང་མཁན་ཁག་ཅིག་ཡིན་ནའང་། གནའ་ནས་དམངས་ཁྲོད་དུ་དར་བའི་སྲོལ་རྒྱུན་རིག་གནས་མང་པོ་ཞིག་གི་རྒྱབ་ལྗོངས་དང་བྱུང་རབས་ཤེས་ཀྱི་མེད་པའམ་སྣང་ཆུང་དུ་བཏང་སྟེ། ཐ་ན་སོ་སོའི་མི་ཚེའི་ནང་ལོ་ལྟར་ལོ་གསར་རྟེན་འབྲེལ་གྱི་བྱེད་སྒོའི་སྐབས་གལ་ཆེན་ཞིག་ཏུ་བརྩིས་དེ་བཅའ་སྲོལ་ཡོད་པའི་འབེའི་སྐོར་ལ་ཡང་རྦད་དེ་རྨོངས་པར་གྱུར་ཡོད་པ་གཞི་ནས་ཚོར་བྱུང་། ངས་ཉིན་འགའི་རིང་ལ་ལས་ཞོར་དུ་སྲོལ་རྒྱུན་འདིའི་བྱུང་རབས་སྐོར་ལ་བསམ་བློ་ཏོག་ཙམ་གཏོང་རྒྱུ་བྱུང་བ་དང་། མི་རབས་རྒན་པ་ཁག་ཅིག་ལ་ཡང་དྲིས་པ་ཡིན་མོད། རྒན་རབས་པ་ཚོས་འདི་ནི་ལོ་གསར་སྐབས་བུ་ཕྲུག་ཚོར་གསོལ་རས་ལྟར་སྦྱིན་རྒྱུའི་ཡུལ་སྲོལ་ཙམ་ཡིན་པ་དང་། དེ་ལས་གཞན་རང་གི་སྒོ་ཕྱུགས་ཀྱི་བཀའ་དྲིན་རྗེས་དྲན་མཚོན་བྱེད་ཙམ་ཡིན་པའི་བསམ་ཚུལ་ཙམ་བཤད་མཁན་བྱུང་ཡང་། སྲོལ་རྒྱུན་འདིའི་བྱུང་རབས་ངོ་མ་ཞིག་དང་། མཚོན་དོན་ངོ་མ་ཞིག་ནི་ཁ་ཚོན་བཅད་ནས་བཤད་མཁན་རྙེད་མ་སོང་། འོན་ཀྱང་། འབེ་ཟེར་བའི་མིང་ཚིག་གམ་ཐ་སྙད་འདི་ནི་འབག་ཅེས་པ་ཡུལ་སྐད་དུ་ཟུར་ཆགས་པ་ཞིག་ཡིན་པར་འདོད་དེ། འབེ་ཟེར་བའི་ཐ་སྙད་ཀྱི་བསྟན་བྱ་ནི་འབག་དང་ནང་དོན་གཅིག་པ་ཡིན་པས་སོ། ། བོད་ཀྱི་ཚིག་མཛོད་ཁག་གི་ནང་འབག་ཅེས་པ་ནི། འཇིམ་པས་བཟོས་པའི་མི་ཕྱུགས་ཀྱི་འདྲ་གཟུགས་ཀྱི་མིང་སྟེ། དཔེར་ན། འབག་སྐུ། འབག་བཟོ། མགོ་ལ་འབག་གྱོན། གདོང་འབག་ཅེས་པ་ལྟ་བུ་ཞེས་འཁོད། ད་འོ་ན། ང་ཚོའི་ཚོ་བའི་ཡུལ་སྲོལ་དུ་ལོ་གསར་རྟེན་འབྲེལ་གྱི་བྱེད་སྒོའི་སྐབས་ཀྱི་འབེ་ཟེར་བ་དེ་ག་འདྲ་ཞིག་རེད་ཟེར་ན། འདི་ནི་ལོ་གསར་རྟེན་འབྲེལ་ལ་གྲ་སྒྲིག་སྐབས་གྲོ་ཕྱེ་བརྫིས་ཏེ་ཁྱིམ་ཚང་གི་སྒོ་ཕྱུགས་རྟ་ནོར་ལུག་གསུམ་སོགས་ཀྱི་འདྲ་གཟུགས་རེ་བཅའ་སྲོལ་ཡོད་པ་དང་། དེ་ཡང་གཙོ་བོ་རང་གི་མཆོད་བཤམས་ནང་བཤམ་རྒྱུར་དམིགས་ནས་ལྷ་གཡག་དང་། ལྷ་ལུག །ཀླུའི་མཛོ་མོ། ལྷ་རྟ་ཟེར་བ་བཅའ་སྲོལ་ཡོད་ལ། དེ་མིན་ཁྱི་དང་སེང་གེའི་འདྲ་གཟུགས་ཀྱང་བཅའ་སྲོལ་ཡོད། གཞན་ཡང་གཉེན་ཉེ་དང་སྤུན་མཆེད་ཀྱི་བྱིས་པ་རྣམས་ལ་རྟེན་འབྲེལ་མཚོན་ཆེད་འབེ་སྐལ་རེ་བཅས་ཏེ། ལོ་གསར་མགྲོན་འབོད་སྐབས་བྱིས་པ་བུ་རྣམས་ལ་འབེ་ཕོ་གཟུགས་རེ་དང་། བུ་མོ་རྣམས་ལ་འབེ་མོ་གཟུགས་རེ་སྟེར་སྲོལ་ཡོད་པས། བྱིས་པ་རྣམས་ཀྱིས་འབེ་ནི་ཧ་ཅང་རྩ་ཆེན་ཞིག་ཏུ་འཛིན། དེ་ཡང་འབེ་བཅའ་སྐབས་ཕྱེ་རྗེན་ཆུ་འཁྱག་གིས་བརྫིས་དེ་གར་སླ་རན་ཙམ་བྱུང་རྗེས། སྒོ་ཕྱུགས་ཀྱི་འདྲ་གཟུགས་བཅའ་བ་དང་། ཐབ་ལ་རྡོ་བ་ལེབ་མོ་ཞིག་ངར་དུ་བཅུག་པའི་ཐོག་དང་། གོ་ཐལ་ཚ་བོ་བཅས་སུ་རིམ་བཞིན་བསྲེགས་ཏེ་ཚོས་པར་བྱེད། འབེ་སྲེག་སྐབས་སྒོ་ཕྱུགས་གང་ཞིག་གི་འདྲ་གཟུགས་གསོན་ཉམས་ལྡན་པ་བྱུང་བ་དང་། ཙིར་སྒྲ་གྲགས་ཏེ་སྐད་བྱུང་བ་ཡིན་ན། ལོ་དེར་སྒོ་ཕྱུགས་དེའི་འཕེལ་ཁ་རྒྱས་པ་དང་ལམ་འགྲོ་ཡོང་བའི་རྟེན་འབྲེལ་བརྩི་སྲོལ་ཡོད། སྲོལ་རྒྱུན་འདི་ནི་ང་ཚོ་ནགས་ཕྲན་སྡེ་བའི་ནང་གལ་ཆེན་པོར་བརྩི་བ་ལས། གཞན་གཡས་གཡོན་གྱི་སྡེ་བ་གཞན་པ་ཚོར་སྲོལ་རྒྱུན་འདི་ཡོད་པ་མཐོང་མ་མྱོང་། འོན་ཀྱང་། ང་ཚོས་ད་ལྟའི་བར་སྲོལ་རྒྱུན་འདིའི་བྱུང་རབས་དང་། རྒྱབ་ལྗོངས། མཚོན་དོན་བཅས་ལ་དེ་ཙམ་གྱིས་རྒྱུས་ལོན་བྱེད་མྱོང་མེད་པར་བརྟེན། དེང་སྐབས་ཀྱི་ང་ཚོའི་ཚོ་བའི་ནང་གི་གཞོན་སྐྱེས་སུ་གཅིག་གིས་ཀྱང་འདི་ལ་འགྲེལ་བཤད་འདོད་བློ་ཁེངས་པ་ཞིག་རྒྱག་ཐུབ་ཀྱི་མེད་པས་མ་ཚད། མི་རབས་རྒན་པ་ཚོ་ལ་ཡང་བསམ་ཚུལ་ཙམ་ལས་བཤད་རྒྱུ་མེད་པར་གྱུར་འདུག ཡིན་ནའང་། སྲོལ་རྒྱུན་འདིའི་རྣམ་པར་དཔྱད་པ་ཅུང་ཙམ་བྱས་ན། འདི་ནི་གླིང་གེ་སར་གྱི་སྒྲུང་གཏམ་ལ་དགའ་དད་ཅན་གྱི་དམངས་ཁྲོད་དུ་གྲགས་པའི་གཡང་གི་ར་བ་སྒོ་བཞི་ཟེར་བ་ལས་བྱུང་བར་ཡིད་ཆེས་བྱེད་ཆོག་པར་འདོད། གཡང་གི་ར་བ་སྒོ་བཞི་ནི་འཁྲུངས་གླིང་མེ་ཏོག་ར་བ་དང་། བོད་མིའི་ངག་རྒྱུན་ནས་བཤད་པ་ལྟར་ན། སྤྱི་ལོའི་དུས་རབས་༡༡ པའི་ནང་ལྷ་སྲས་ཇོ་རུའི་སྐྱེད་ཡུམ་མ་འགོག་མོ་སེང་བློན་གྱི་ནང་ནས་ལོགས་སུ་ཐོན་སྐབས་རྒྱ་བཟས་མ་འགོག་མོ་ལ་རྒོད་མ་གཅིག་དང་། མ་མོ་གཅིག །འབྲི་མོ་གཅིག །ར་མ་གཅིག་བཅས་སྒོ་ཕྱུགས་བཞི་ནོར་སྐལ་དུ་བྱིན་པས། མ་འགོག་མོས་གཞིས་ཁྱིམ་ཟིན་པའི་རྟེན་འབྲེལ་དུ་བསྒྲིགས་ཤིང་། དམངས་ཁྲོད་དུ་གཡང་གི་སྒོ་ཟོག་བཞིའམ། གཡང་གི་ར་བ་སྒོ་བཞི་ཞེས་པའི་གཏམ་དཔེ་ཞིག་བྱུང་བ་དང་། དེ་ནས་བཟུང་གླིང་སྒྲུང་ལ་དད་པའི་བོད་མིའི་དམངས་ཁྲོད་དང་། ལྷག་པར་མདོ་སྨད་ཁུལ་དུ་ལོ་གསར་སྐབས་རྟེན་འབྲེལ་མཚོན་པའི་གཡང་གི་སྒོ་ཟོག་བཞིའམ། གཅིག་བཅས་གང་རུང་གྲོ་ཞིབ་ཀྱིས་བཅས། མར་ཁུས་བཙོས་ཏེ་མཆོད་ཁྲིའི་ཐོག་གམ་ཁྱིམ་གྱི་ས་གཙང་ས་ཞིག་ཏུ་འཇོག་སྲོལ་བྱུང་བར་གྲགས། འོན་ཀྱང་། དབུས་གཙང་ཁུལ་དུ་ལོ་གསར་སྐབས་ལུག་མགོ་ཞིག་བཅའ་སྲོལ་ཡོད་པ་ནི་གཡང་གི་ར་བ་སྒོ་བཞི་དང་འབྲེལ་བ་མེད་པར་མཐོང་། ངག་རྒྱུན་འགའ་རེ་དང་གླིང་སྒྲུང་དང་འབྲེལ་བའི་དཔྱད་རྩོམ་ཚོའི་ནང་དུ་གཡང་གི་ར་བ་སྒོ་བཞི་ངོས་འཛིན་བྱེད་ཕྱོགས་ཅུང་ཟད་མི་མཐུན་པ་ཡོད་པར་སྣང་ཡང་། གང་ལྟར་ངས་ང་ཚོའི་ཚོ་བའི་ནང་གི་འབེ་ཟེར་བའི་སྲོལ་རྒྱུན་འདི་དང་གཡང་གི་ར་བ་སྒོ་བཞིའི་བར་འབྲེལ་བ་དམ་པོ་ཡོད་པར་རྒྱུ་མཚན་གསུམ་མཐོང་། གཅིག་ནི་ང་ཚོའི་ཚོ་བའི་མི་རྣམས་ནི་གླིང་གེ་སར་ལ་ཧ་ཅང་དད་པ་དང་། གཉིས། གཡང་གི་ར་བ་སྒོ་བཞི་ནི་གླིང་སྒྲུང་ལས་བྱུང་བའི་གཏམ་རྒྱུད་ཞིག་ཡིན་པ་དང་། གསུམ། གཡང་གི་ར་བ་སྒོ་བཞིར་གྲགས་པའི་གྲོ་ཞིབ་ཀྱིས་གཟུགས་བརྙན་བཅའ་སྲོལ་ཡོད་པ་དང་ཧ་ཅང་མཐུན། འོན་ཀྱང་། ང་ལ་སྲོལ་རྒྱུན་འདིའི་སྐོར་ལ་དཔྱད་གཞིའི་ཡིག་ཆ་དང་། གནའ་རབས་སྲོལ་རྒྱུན་གྱི་ངག་རྒྱུན་བཤད་མཁན་གྱི་མི་རབས་རྒན་པ། མཁས་པ་བཅས་ཀྱི་བཅར་འདྲི་བྱ་ས་ཚད་ལྡན་གང་ཡང་མ་རྙེད་པས་མཐའ་གཅིག་ཏུ་ཁ་ཚོན་བཅད་དེ་བཤད་པར་དཀའ་བས་དཔྱད་གཞི་ཙམ་དུ་གླེང་བ་ཡིན་ནོ། ། དེ་མིན་གནའ་རབས་བོན་ཆོས་ཀྱི་གཏོ་བཅོས་དང་བསང་མཆོད་སོགས་ཀྱི་ནང་སྲོག་ཆགས་ཀྱི་འདྲ་གཟུགས་བཅས་ཏེ་མཆོད་སྦྱིན་བྱ་བའི་སྲོལ་རྒྱུན་ཏེ། མདོས་དང་གླུད་ཀྱི་ཆོ་ག་དག་དང་འབྲེལ་བ་ཡོད་མེད་ཀྱང་དཔྱད་གཞི་ཞིག་ཏུ་གྱུར་ཡོད་པར་སྣང་ངོ་། །
མཆན། མི་ཉག་ནགས་ཕྲན་སྡེ་བ་ནི།་དཀར་མཛེས་བོད་རིགས་རང་སྐྱོང་ཁུལ། རྟའུ་རྫོང་ཁོངས་སུ་ཡུལ་ཚོ་ཉི་ཤུ་ཡོད་པའི་ཡ་གྱལ་ལུང་བསྟན་ཡུལ་ཚོའི་ཁོངས་སུ་ཡོད་པའི་འབྲོག་སྡེ་ཞིག་ཡིན་པ་དང་། ཚོ་བ་འདིའི་ཆོས་བརྒྱུད་ནི་སྔ་འགྱུར་རྙིང་མ་རྫོགས་ཆེན་ཆོས་བརྒྱུད་པ་དང་། དགོན་པའི་མིང་ལ་རབ་སྒང་སྔ་འགྱུར་ཆོས་འཁོར་གླིང་ཟེར། རྩོམ་པ་པོ། ནགས་ཕྲན་པ་བསོད་ནམས་ཚེ་རིང་།
