རབ་འབྱམས་རྒྱལ་བ་ཀུན་གྱི་ཡེ་ཤེས་དཔྱིད། །
མཐོང་བའི་མི་ངོམས་གངས་རིའི་མདངས་ལྡན་སྐུ། །
ཡབ་ཅིག་འཇམ་དཔལ་སྨྲ་བའི་ཉི་མ་དེས།
བདག་བློ་བྱང་ཆུབ་ལམ་དུ་བསྒྱུར་བར་མཛོད། །
འོ་མའི་ཆུ་གཏེར་འཕྱུར་བའི་རླབས་ཕྲེང་རྩེར། །
དྲི་མེད་ཤེལ་དཀར་མེ་ཏོག་བཞད་འདྲ་བ། །
ངོ་མཚར་ཚངས་པའི་བུ་མོ་ཡིད་འཕྲོག་མ། །
ལོངས་སྤྱོད་འཁོར་ལོ་མགྲིན་པའི་ཁབ་ཏུ་རོལ། །
ཨེ་མ་བསོད་ནམས་ཤར་གྱི་རི་བོ་ནས། །
ཡོན་ཏན་བླ་ན་མེད་པའི་དཀྱིལ་འཁོར་ལ། །
གསང་གསུམ་མཛད་པའི་འོད་ཟེར་སྟོང་འབར་བའི། །
མཁས་པའི་ཉིན་བྱེད་མཆོག་གཅིག་འདི་ན་ཤར། །
མ་རིག་དུམ་བུར་གཏུབ་པའི་མཚོན་གདེངས་ཤིང་། །
མ་བཅོས་རང་བཞིན་མདའ་ལྟར་དྲང་བའི་ཐུགས། །
མ་ལུས་མཁས་པའི་ཡིད་འཕྲོག་མཁས་པ་ཁྱོད། །
མ་བསྒོམས་ཁོ་བོའི་ཡིད་ལ་ལྷམ་མེར་གསལ། །
མཐོན་པོར་གཡོ་རྒྱུའི་འཛུམ་གྱིས་མི་བསུ་ཞིང་། །
དམན་ལ་ཁྱད་གསོད་ལུད་པ་མི་འཕེན་ལ། །
རང་མཉམ་ཡུལ་ལ་ནམ་ཡང་མི་བསླུ་བའི། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
རྙིང་ཞེན་སྒྲོག་གིས་བཅིངས་པའི་རྒས་པོ་མིན། །
གསར་བྱུང་མེ་ཏོག་འཐུ་བའི་བྱིས་པ་མིན། །
ཡོད་ཚད་དོང་ནས་སྤྲུག་པའི་སྨྱོན་པ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
རང་སྲོག་གྲི་ཡིས་གཅོད་པའི་དཔའ་བོ་མིན། །
ཕ་བསད་དཔོན་དུ་བསྐུར་བའི་ཀླད་མེད་མིན། །
བསྟན་སྲིད་རྒྱབ་ཏུ་བོར་བའི་བྱ་བཏང་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
ཕུ་ནུའི་ཚེ་སྲོག་འཕྲོག་པའི་རལ་གྲི་མིན། །
ཉེ་བའི་ཡུལ་ལ་ཟུག་པའི་ཚེར་མ་མིན། །
ངན་བྱས་ངོ་སོ་མཐོ་བའི་ཐན་སྙེ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
བླུན་པོ་འོག་ནས་འདེགས་པའི་ཀ་བ་མིན། །
མཁས་པ་གཉའ་ནས་གནོན་པའི་ཟམ་པ་མིན། །
ཕ་ཆོས་ལོ་ཏོག་བརྡུང་བའི་སེར་རྒོད་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
བཟང་སྤྱོད་བུད་ཤིང་སྲེག་པའི་མེ་ལྕེ་མིན། །
ངན་གོམས་ཐུར་དུ་རྒྱུག་པའི་རྦབ་ཆུ་མིན། །
བཟང་ངན་ཤན་འབྱེད་མེད་པའི་ས་གཞི་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
ང་རྒྱལ་དགུང་ན་འཕྱོ་བའི་ཆར་སྤྲིན་མིན། །
ཕྲག་དོག་རྦ་རླབས་འཁྲུགས་པའི་དུག་མཚོ་མིན། །
སེར་སྣའི་དྲི་མ་འཛིན་པའི་འོག་རླུང་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
རྨོངས་པ་ཆུ་སྣ་འཁྲིད་པའི་ཡུར་བ་མིན། །
དམ་པ་ཞབས་ནས་འདྲེན་པའི་ཐགས་ཞགས་མིན། །
རང་མཚང་ཁྲོམ་ལ་སྟོན་པའི་གཅེར་བུ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
ལྟོ་འགྲང་དོན་དུ་གཉེར་བའི་སྒོ་ཁྱི་མིན། །
སྣ་ཐགས་མི་ལ་ཤོར་བའི་གཡག་རྒན་མིན། །
ཚུལ་མཆོས་དུལ་བར་རྒྱུ་བའི་ཆུ་སྐྱར་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི།།
ངོ་སྲུང་གཅམ་བུར་སྨྲ་བའི་ཞུམ་བུ་མིན། །
གཞན་ཟེར་རྗེས་བརྗོད་མཁས་པའི་ནེ་ཙོ་མིན། །
མངོན་ལྐོག་ལྕེ་གཉིས་རྐྱོང་བའི་སྦྲུལ་ནག་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
རྙེད་བཀུར་ཤ་ལ་རྔམ་པའི་ཅེ་སྤྱང་མིན། །
ལོག་མཚོའི་བེམ་རོ་ཟ་བའི་རྒོད་པོ་མིན། །
གྲགས་སྐམ་སྨིག་རྒྱུར་སྙེགས་པའི་རི་དྭགས་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
རང་སྐྱོན་གཞན་ལ་རྒོལ་བའི་བྱ་རོག་མིན། །
གཞན་སྐྱོན་དོན་མེད་སྒྲོག་པའི་སྲིན་བྱ་མིན། །
གཡོ་རྒྱུའི་ངུར་སྨྲིག་གྱོན་པའི་ངང་པ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
གཏི་མུག་ཁུང་བུར་ཉལ་བའི་ཕག་པ་མིན། །
ཁོང་ཁྲོའི་ས་རྒོད་སློག་པའི་དྲེད་མོ་མིན། །
འདོད་ཡོན་ཁྲོམ་ན་རྩེ་བའི་སྤྲེ་འུ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
བླུན་པོའི་དབུས་ན་འགྱིང་པའི་སེང་ཆེན་མིན། །
མཁས་པའི་མདུན་སར་ཞུམ་པའི་ཝ་སྐྱེས་མིན། །
ནང་ཉམས་གོས་ཀྱིས་གཡོགས་པའི་མགྲིན་བཟང་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
མ་རྟོགས་ས་ཆེན་བསྐོར་བའི་གླང་གདོང་མིན། །
ལོག་རྟོག་གདོང་བཞི་ཚངས་པའི་མེས་པོ་མིན། །
ཐེ་ཚོམ་མིག་སྟོང་བགྲད་པའི་ལྷ་དབང་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
ཡ་མཚན་གནམ་ནས་བབ་པའི་གདུང་སྲས་མིན། །
ངོ་མཚར་ཤི་ནས་ལོག་པའི་སྐུ་སྐྱེ་མིན། །
སྙན་གྲགས་ནོར་གྱིས་ཁྱབ་པའི་ཆོས་རྗེ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
ཟབ་ཆོས་དོང་ནས་འདོན་པའི་གཏེར་འབྱིན་མིན། །
གྲུབ་རྟགས་རྡོ་ལ་འཇོག་པའི་རྣལ་འབྱོར་མིན། །
ཅིས་ཀྱང་དགོས་མེད་རྟོགས་པའི་ཞིག་པོ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
མ་འབད་ཡེ་སངས་རྒྱས་པའི་རྫོགས་ཆེན་མིན། །
མི་བསྒོམས་ཐ་མལ་ཀློད་པའི་ཕྱག་ཆེན་མིན། །
མི་བསམས་ཐུམ་མེར་སྡོད་པའི་དབུ་མ་མིན། །
ཚུངས་མེད་མཁས་པ་ཁྱོད་ལ་བསྟོད་པར་བགྱི། །
རལ་པའི་ཟླ་ཚེས་གཙུག་ཏུ་ཁུར་བ་མིན། །
གཏོ་ཆོག་བུམ་པ་མགྲིན་པར་གཟུང་བ་མིན། །
སྦྱོར་སྒྲོལ་རྡོ་རྗེའི་མདུང་ཐུང་ཐོགས་པ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
ལོག་བཤད་དུག་གི་མེ་ཏོག་བཀྲ་བ་མིན། །
སྤོམ་བཤད་འཇའ་ཚོན་ལག་ཏུ་འཛིན་པ་མིན། །
སྟོང་བཤད་ནམ་མཁའ་ཟས་སུ་ཟ་བ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
དད་གསུམ་ཆུ་ལ་རིས་མོ་བྲིས་པ་མིན། །
ངེས་འབྱུང་རྡོ་ལ་ས་བོན་བཏབ་པ་མིན། །
གཞན་ཕན་ཕུབ་རུལ་ཆུ་ཁར་འཕྱོ་བ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
སྙིང་སྟོབས་རྫིང་བུའི་རྟག་ཆུ་ཆད་པ་མིན། །
ལྷག་བསམ་གངས་རི་ཉི་མས་བཞུས་པ་མིན། །
སྤྱི་སེམས་མེ་ཏོག་སད་ཀྱིས་བཅོམ་པ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
ཟབ་མྱུར་སྤོབས་པའི་སྣོ་སོ་བུད་པ་མིན། །
གུས་རྟག་བརྩོན་པའི་སྡེར་བཞི་སྐམ་པ་མིན། །
ལུང་རིགས་རྡོ་རྗེ་རྭ་རྩེ་ཞུམ་པ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
སོ་ཐར་ཆུ་ཤིང་ཁོང་ནས་རུལ་བ་མིན། །
བྱང་སེམས་ཤིང་སྐམ་ཡལ་ག་རེངས་པ་མིན། །
གསང་ཆེན་ཏཱ་ལའི་མགོ་བོ་བཅད་པ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
སྲོལ་རྒྱུན་རིག་པའི་དོལ་དུ་ཚུད་པ་མིན། །
གསར་གཤད་ལྟ་བའི་གཡང་དུ་ལྷུང་བ་མིན། །
གཉིས་མེད་སེང་གེ་གྲོང་མཐར་འཁྱམས་པ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
མ་བསླབས་ཀུན་མཁྱེན་ས་རུ་ཕྱིན་པ་མིན། །
མ་བརྟགས་མཁས་པའི་གྲལ་དུ་འཚངས་པ་མིན། །
མ་སྤངས་དུག་ལྔ་ལམ་དུ་ཁྱེར་བ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
མཐོང་གྲོལ་ཅོད་པན་དབུ་ལ་གསོལ་བ་མིན། །
རེག་གྲོལ་ཕྱག་གིས་དབང་བསྐུར་མཛད་པ་མིན། །
ཐོས་གྲོལ་མན་ངག་ཞལ་ནས་གསུངས་པ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
ས་རྡོ་བརྩེགས་པའི་བསྟན་པ་སྤེལ་བ་མིན། །
གྲྭ་བཙུན་སྡེབ་པའི་ཚོགས་པ་སྐྱོངས་བ་མིན། །
བན་བོན་འདྲེས་པའི་ལྟ་གྲུབ་འཛིན་པ་མིན། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
མཐོང་ཚད་ལག་ཏུ་ལེན་པའི་ཉམས་ལེན་མེད། །
ཐོས་ཚད་བདེན་པར་འཛིན་པའི་དག་སྣང་མེད། །
ཤེས་ཚད་ཁོང་དུ་སྦས་པའི་རྣལ་འབྱོར་མེད། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
མ་སྦྱངས་བྱིས་པའི་ཀློག་གི་འཆད་པ་མེད། །
སྒོང་ང་བྲག་ལ་བརྡབ་པའི་རྩོད་པ་མེད། །
ལུང་ཚིག་བྱེ་རི་སྤུངས་པའི་རྩོམ་པ་མེད། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
རང་མཐོང་ཁྲོན་པས་མགུ་བའི་ཐོས་པ་མེད། །
གོག་འགྲོས་རི་ལུང་ཉུལ་བའི་བསམ་པ་མེད། །
ལོང་བའི་རྒྱལ་ཁམས་ལྟ་བའི་སྒོམ་པ་མེད། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
བསྟན་སྲོག་གཅོད་པའི་གནད་ལ་མཁས་པ་མེད། །
ལེགས་བཤད་སྨྲ་ངག་སྡོལ་ལ་བཙུན་པ་མེད། །
རྒོལ་ངན་ཡལ་བར་འདོར་བའི་བཟང་སྤྱོད་མེད། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
སྔོན་མེད་ཟབ་དོན་གཟིགས་པའི་མཁྱེན་པ་མེད། །
དམ་སྡོམ་བག་ཡངས་གནང་བའི་བརྩེ་བ་མེད། །
གསོད་དང་སྲི་འུ་གསོ་བའི་ནུས་མཐུ་མེད། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
མི་མགོའི་ལྷུང་བཟེད་ཕྱག་ཏུ་འཛིན་པ་མེད། །
མི་རྐང་གླིང་བུས་མི་སྙན་སྒྲོག་པ་མེད། །
མི་ལྤགས་གཡང་གཞི་དགྲ་ལ་གཡོབ་པ་མེད། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
ཞབས་ཟུང་སེང་ཁྲིའི་བཏེགས་པའི་གཟི་བརྗིད་མེད། །
དབུ་འཕངས་མིང་གིས་བསྟོད་པའི་ཆོ་ལོ་མེད། །
བཀའ་བཙན་ཐམ་ཀས་གནོན་པའི་དབང་ཐང་མེད། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
མ་བསྒྲུབས་ལྷ་བརྒྱའི་ཞལ་གཟིགས་ལུང་བསྟན་མེད། །
ཐོལ་བྱུང་ཀློང་བརྡོལ་རྟོགས་པའི་ཉམས་དབྱངས་མེད། །
དུས་གསུམ་རྗེན་པར་གཟིགས་པའི་མངོན་ཤེས་མེད། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
སྔོན་རབས་དམ་པའི་ཕྱག་རྗེས་བསུབ་པ་མེད། །
ཕྱི་རབས་མཁས་པའི་བཀའ་དྲིན་བརྗེད་པ་མེད། །
སྔ་ཕྱི་གཞུང་བཤད་གཅིག་ཏུ་བསྲེས་པ་མེད། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
ཡོད་མེད་ཕྱོགས་རེར་ཞེན་པའི་ལྟ་བ་མེད། །
དམིགས་གཏད་མཚན་མར་འཛིན་པའི་སྒོམ་པ་མེད། །
གང་ཤར་གཏད་སོ་བྲལ་བའི་སྤྱོད་པ་མེད། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
ཆོས་འདུལ་གཙང་མའི་ཁྲིམས་ཀྱིས་བཏང་བ་མེད། །
བྱང་ཆུབ་སེམས་ཀྱི་གྲོགས་དང་བྲལ་བ་མེད། །
འོད་གསལ་ཕྱག་རྒྱ་ཆེ་ལས་གཡོས་པ་མེད། །
མཚུངས་མེད་མཁས་པ་ཁྱོད་ལ་བསྟོད་པར་བགྱི། །
སྐུ་ལ་རྣམ་གསུམ་ཆོས་གོས་གཙང་མའི་བཀླུབས། །
གསུང་གིས་སྡེ་སྣོད་གསུམ་གྱི་ཆོས་སྒྲ་སྒྲོག །
ཐུགས་ནི་བསླབ་གསུམ་ནོར་བུའི་མཛོད་ཀྱིས་གཏམས། །
རྣམ་འདྲེན་ཁྱོད་ཉིད་ས་སྟེང་མཛེས་པའི་རྒྱན། །
ཕྱོགས་བཅུ་དུས་གསུམ་རྒྱལ་བ་མ་ལུས་པའི། །
བཤད་དང་སྒྲུབ་པའི་རྒྱལ་ཚབ་ཁྱོད་ཉིད་དེ། །
གཞན་དག་བྱ་བ་ལས་ཀྱི་འཁོར་ལོ་ལ། །
མགོ་བོ་འཁོར་བའི་མིང་གི་བསྟན་འཛིན་ཙམ། །
མཁྱེན་རབ་ཡེ་ཤེས་མེ་ལོང་གཙང་མའི་ངོར། །
རབ་འབྱམས་འཁོར་འདས་ཤེས་བྱའི་གཟུགས་བརྙན་ཀུན། །
མ་འདྲེས་ཡོངས་རྫོགས་གསལ་བར་འཆར་བས་ན། །
འཇམ་པའི་རྡོ་རྗེ་ཁྱོད་ལས་གཞན་ཡོད་མིན། །
གནས་གསུམ་གཞལ་བྱའི་དེ་ཉིད་འབྱེད་པ་ལ། །
ཚོགས་དབུས་མི་འཇིག་སེང་གེའི་སྒྲ་སྒྲོག་པ། །
སྔོན་ཆད་སྟོན་པའི་རྣམ་ཐར་ཐོས་པ་ཙམ། །
ད་ལྟ་ཆུ་བུར་མིག་གིི་མངོན་སུམ་མཐོང་། །
གནའ་དུས་མཁས་མང་ལྗོན་པའི་ཚལ་ན་ཡང་། །
དཔག་བསམ་ཡོངས་འདུ་ཁྱོད་འདྲ་རྙེད་མིན་ན། །
ཕྱི་ནས་མི་མཁས་ཆུ་ཤིང་སྡོང་པོའི་ཕྲེང་། །
ཚར་དུ་མངར་བའི་གསེབ་ཏུ་དེ་བས་དཀོན། །
སྲིད་པའི་ཕུན་ཚོགས་གློག་གི་ཞགས་པ་ཡིས། །
འཆིང་བར་མ་ནུས་དབེན་གསུམ་རྒྱལ་ས་ཆེར། །
བྱམས་དང་སྙིང་རྗེའི་སྲིད་ལ་དབང་བསྒྱུར་བའི། །
དོན་བརྒྱུད་གྲུབ་པའི་ཕ་ཤུལ་ཁྱོད་ཀྱིས་ཟིན། །
ཁྱད་པར་ཐུབ་གཞུང་ཡངས་པའི་ནོར་འཛིན་ཁྱོན། །
གསལ་གསལ་རྗེན་པར་སྟོན་པའི་རིག་རྣོན་འཁྲུལ། །
བསྡུ༷ས་རི༷གས་གས༷ལ་བ༷འི་ཉི༷ན་བྱེ༷ད་ཤར་བའི་ཚེ། །
སྒྲོས་ངན་འབྱུང་བྱའི་མིག་ལ་མུན་པ་བྱིན། །
ཕྱོགས་གླང་གྲགས་པའི་ཚད་མའི་ཁང་བཟང་རྩེར། །
རྟོག་བཏགས་བདུད་ཀྱི་རྒྱལ་མཚན་བསྙེལ་བའི་མཚོན། །
དབྱ༷ངས་ཅ༷ན་མགྲི༷ན་གླུ༷་སྙན་པའི་བ་དན་ཆེ། །
མི་ནུབ་སྲིད་པའི་རྩེ་མོར་གྱེན་དུ་བསྒྲེང་། །
ཀླུ་སྒྲུབ་ལུགས་བཟང་ཐལ་འགྱུར་དབུ༷་མ༷འི་མཁར། །
རྣམ་དཔྱོད་མགྲན་ཟླ་མེད་པའི་སྤྲིན་རུམ་ནས། །
ལུ༷ང་དང་རི༷གས་པའི་འབྲུ༷ག་སྒྲ༷་ལན་གཅིག་གིས། །
མཐར་འཛིན་ལྟ་བའི་རྨོང་གཉིད་ཕ་མཐར་བསྐྲད། །
མཁས་པའི་གཞུང་བཟང་གསེར་གྱི་ས་གཞི་སྟེང་། །
སྨྲ་བ་ངན་པའི་བྲག་རྡོ་བརྩེགས་པ་ཀུན། །
ཕྱེ་མར་འཐག་པའི་སྔོན་མེད་བསྟན་བཅོས་ཆེ། །
རི༷གས་ལ༷མ་གན༷མ་ལྕ༷གས་ཐོ༷ག་གི་མད༷འ་མོ་ཕབ། །
འཕགས་པའི་ཡུལ་གྱི་གྲུ༷བ་མཐ༷འ་རྣམ་པ་བཞི། །
རང་རང་བཞེད་པའི་ལམ་སྲོལ་གཙང་མ་ལ། །
ཆོས་མཐུན་རྒོལ་བའི་མཚོན་གྱིས་མི་ཚུགས་པའི། །
ལུས་སྲུང་མི༷་ཤི༷གས་རྡོ༷་རྗེ༷འི་གོ་ཆ་གནང་། །
འཛམ་གླིང་མཁས་པ་ཡོངས་ཀྱི་གཙུག་གི་ནོར། །
ཆོ༷ས་ཀྱི༷་གྲ༷གས་པ༷འི་རྣམ་འགྲེལ་དགོ༷ངས་པའི་རྒྱ༷ན། །
གཞུང་འགྲེལ་རྩིབས་སྟོང་འབར་བའི་འཁོར་ལོ་ཡིས། །
ངན་རྟོག་འབུམ་གྱི་མགོ་བོ་དུས་གཅིག་བཅད། །
རྒྱལ་ཡུམ་ཤེས་རབ་ཕར་ཕྱིན་སྦས་པའི་དོན། །
རྗེ༷་བཙུ༷ན་བྱ༷མས་པ༷འི་དགོ༷ངས་རྒྱ༷ན་ས་འོག་གཏེར། །
ཕར་ཕྱིན་ལུགས་བཟང་འཕྲུལ་གྱི་ལྡེ་མིག་ལས། །
བློ་གསལ་བྱེ་བའི་མགུལ་རྒྱན་དེང་འདིར་རྙེད། །
ཤར་ནུབ་མཁས་པའི་བཞེད་སྲོལ་ཟ་འོག་རིས། །
མ་འདྲེས་རྣམ་པར་བཀྲ་བའི་གུར་ཁྱིམ་ནས། །
དྲི་ཟའི་དབྱངས་བདུན་རྫོགས་པའི་སྙན་ཚིག་ཀླུས། །
ཟླ་བཞིན་མཛེས་མའི་ལང་ཚོ་བདག་གིར་མཛད། །
གཞན་ཡང་དབུས་འགྱུར་ཞིང་དང་བསིལ་ལྡན་འདིར། །
བསྟན་པའི་སྦྱིན་བདག་བསྟན་འཛིན་འདུས་པའི་སྡེ། །
བསྟན་གཞི་ཆོས་སྡེ་སྤྱི་དང་བྱེ་བྲག་ལ། །
ལོ་རྒྱུས་ཚད་མའི་དྲང་ཐིག་འཁྱོགས་པ་མེད། །
མདོར་ན་ཐོས་བསམ་རྒྱ་མཚོའི་ཕ་རོལ་ཕྱིན། །
མན་ངག་ཡིད་བཞིན་ནོར་བུའི་ཐུགས་རྒྱུད་ཕྱུག །
བསྟན་འགྲོར་སྨན་པའི་མཛད་པ་འབྱམས་སུ་ཀླས། །
འདི་ནིི་ཁྱོད་ཀྱི་རྣམ་པར་ཐར་པའི་སྡོམ། །
སྙིགས་མའི་ཡང་མཐའ་རྒུད་པའི་སྨག་རུམ་འདིར། །
མཁས་རློམ་ས་འཛིན་བྱེ་བའི་ཕྲག་པ་ནས། །
འཆད་རྩོད་རྩོམ་པའི་འོད་ཟེར་སྟོང་འགྱེད་པའི། །
དམ་པ་ཉི་མ་གང་དེར་འདི་སྐད་གསོལ། །
བཀའ་ཕྱག་གདམས་པའི་སྲོལ་འཛིན་བཀའ་བརྒྱུད་པར། །
ལྟ་སྤྱོད་ངན་པའི་དྲི་མ་བསྒོ་འདོད་པའི། །
དགྲ་བོ་བུ་རུ་རྫུ་བའི་དགེ་སྦྱོང་གཟུགས། །
བསྟན་པའི་ལྕགས་རི་ནང་ནས་དབྱུང་བར་འཚལ། །
ཐུབ་བསྟན་ཉིན་བྱེད་ལྟ་བའི་མིག་ལྡོངས་ཀྱང་། །
ཟོག་རྫུན་སྤུ་རུ་གཙུག་ཏུ་ཁུར་བཞིན་དུ། །
ལོག་བཤད་ཧུཾ་སྒྲ་རྒྱུད་མར་སྒྲོག་པ་ཡང་། །
སུན་འབྱིན་གསང་སྔགས་ཞགས་པས་འཆིང་བར་རིགས། །
བཀའ་གདམས་རིགས་བཟང་ལས་སྐྱེས་བྲམ་ཟེའི་བུ། །
གདུལ་པ་གཡུང་པོའི་ཁྲོད་དུ་འཁྱམས་པ་རྣམས། །
སྐལ་ངན་འཁྲུལ་སྣང་འཇོམས་པའི་ཐབས་མཁས་ཀྱིས། །
རང་རིགས་གཙང་མའི་རང་ངོ་འཕྲོད་པར་མཛོད། །
མཁས་བྱའི་རྒྱ་མཚོ་ཧུབ་ཀྱིས་འཐུང་འདོད་ཀྱང་། །
རྣམ་དཔྱོད་རྒྱ་ཁབ་ཕྲ་མོའི་བུག་པ་རུ། །
འདྲེན་པར་མ་ནུས་ངལ་བའི་ཉམས་ཐག་ལུས། །
བྱིན་རླབས་བདུད་རྩི་སྨན་གྱིས་གསོ་བར་ཞུ། །
བླུན་རྨོངས་ཟ་བྱེད་རྟ་གདོང་འབར་བའི་ལྕེས། །
ལུང་རྟོགས་ཆོས་ཚུལ་དལ་འབབ་གང་གཱའི་རྒྱུན། །
ཀུ་ཤའི་རྩེ་མོའི་ཐིགས་པར་བསྒྱུར་བ་འདི། །
ཡལ་བར་མ་འདོར་བླ་མ་འཇམ་དཔལ་དབྱངས། །
ད་ལྟ་དམ་ཆོས་སྨྲ་བའི་འདུན་ས་རུ། །
ཁྱོད་དང་མཚུངས་པ་སྲིད་ན་མ་འཆིས་པས། །
སྐྱོབས་པ་འཇིག་རྟེན་ཡོངས་ཀྱི་རྣམ་འདྲེན་ཁྱོད། །
སྲིད་ཞི་མཛེས་པའི་ཏོག་ཏུ་བརྟན་གྱུར་ཅིག །
ཐུབ་བསྟན་བྱི་དོར་བགྱིས་པའི་མཛད་ཕྲིན་ལ། །
བར་གཅོད་བདུད་ཀྱི་འཚེ་བའི་བསམ་སྦྱོར་ཀུན། །
ཞི་བའི་སྤྲིངས་ཡིག་ཞིང་ཀུན་ཁྱབ་པའི་དབྱངས། །
བདེན་ཚིག་གྲུབ་པའི་དྲང་སྲོང་མཆོག་དེས་སྒྲོགས། །
ཞེས་སྡོམ་བརྩོན་སྡེ་སྣོད་རྒྱ་མཚོའི་ཕྲེང་བ་འཛིན་པ་འཇམ་དབྱངས་བླ་མ་ས་གསུམ་གྱི་བསྟན་པའི་སྒྲོན་མེ་བཀའ་བརྒྱུད་པའི་མཁན་ཆེན་བསྟན་པ་རབ་རྒྱས་ལ་བསྟོད་པའི་ཚིག་ལེའུར་བྱས་པ་དྲི་བྲལ་པདྨ་དཀར་པོའི་ཕྲེང་བ་ཞེས་བྱ་བ་འདི་ཉིད་མདོ་ཁམས་བྱེ་མ་ཐང་གི་སློབ་གྲྭ་བ་བློ་གྲོས་དཔལ་ལྡན་ནས་ཐུབ་དབང་གཉིས་པ་རྗེ་ཙོང་ཁ་པའི་བསྟོད་པ་དད་པའི་དྲི་བསུང་འཐུལ་བའི་སྤོས་ཀྱི་རྫིང་བུ་ཞེས་བྱ་བའི་ཚིག་སྦྱོར་གྱི་མགྲོས་དང་མཐུན་པར་རབ་གནས་ཤིང་སྤྲེལ་ལོའི་ཟླ་བ་ ༨ ཚེས་ ༡༣ དགེ་བར་སྤྱིད་ཤོད་ཉི་འོད་གྲོང་ཁྱེར་ལྷ་ལྡན་དུ་སྦྱར་བ་དགེའོ།། །།
