དམར་སེར་ལི་ཁྲི་མདངས་ཀྱིས་འཁྱུད་པའི་དབུས།།
བཅུ་དྲུག་ན་ཚོད་སྒེག་ཆོས་དཔལ་དུ་འབར།།
བལྟ་བས་མི་ངོམ་སེར་མདོག་འོད་ཀྱིས་མཛེས།།
འཇམ་དཔལ་གཞོན་ནུ་སྐུ༵་ཡི་མཛད་མཐའ་བྲལ།།
སྐལ་ལྡན་ས་འཛིན་སྟོང་གི་ཞིང་ས་རུ།།
ཇི་ལྟར་མོས་པའི་ཟབ་རྒྱས་ཆོས་ཀྱི་ཆར།།
འགག་མེད་གསུང༵་དབྱངས་སྙན་ལ་རབ་འཇོལ་བས།།
དྲུག་ཅུ་དབྱངས་ཀྱི་སྙན་པ་ས་གསུམ་ཁྱབ།།
ཇི་བཞིན་འཇལ་བ་ཐོགས་པ་མི་མངའ་ཞིང་།།
ཐུག༵ས་རྗེ་སྐྱོན་གྱིས་མ་སྒྲིབ་ལྷ་ལམ་ངོས།།
འགྲོ་ཀུན་ཕན་བདེའི་ཆུ་འཛིན་དལ་གྱིས་ལྡིང་།།
མ་ལུས་མཁྱེན་པའི་བློ་གྲོས་གཏེར་གྱི་མཛོད།།
མི་མཐུན་རྩུབ་རེག་ཀུན་དང་བྲལ་བའི་འཇ༵མ།།
ས་གསུམ་ཡོན་ཏན་ཐུགས་རྒྱུད་ལྕི་བའི་དཔ༵ལ།།
འགག་མེད་དྲུག་ཅུའི་གསུང་བཟང་ལྡན་པའི་དབྱང༵ས།།
ཤེས་རབ་གཏེར་ཁྱེད་སྙིང་གི་ཐིག་ལེ་འདུད།།
འདོད་ཡོན་རྒོད་པ་བདུད་ཀྱི་སྦག་མོ་གཡོ།།
སྙིགས་དུས་འགྲོ་རྣམས་མ་རིག་ལས་ཀྱིས་དེད།།
བསླབ་གསུམ་དྲན་ཤེས་ཙམ་ཡང་རྙེད་དཀའ་བས།།
འཇམ་དཔལ་ངག་གི་དབང་པོས་ཤེས་རབ་སྩོལ།།
སྲིད་པའི་ཡུལ་འདིར་རིང་ནས་གོམས་ཤིང་འདྲིས།།
དུག་གསུམ་རྟག་ཏུ་ཁོག་ལ་ཆེས་འབར་བས།།
ཐུབ་བསྟན་མེ་རོ་བཞིན་ལ་དུས་ཀྱི་མཐར།།
ཤེས་རབ་སྣང་བས་དངོས་གྲུབ་མྱུར་བསྩལ་ཤོགས།།
ལེགས་ཉེས་རྣམ་འབྱེད་ཤེས་རབ་མ་ལྡན་ན།།
ངེས་འབྱུང་བྱང་སེམས་ཡིད་ལ་གོམས་གྱུར་ཀྱང་།།
འཁོར་བའི་སྲིད་མཐའ་གཅོད་པ་མི་ནུས་པས།།
ཤེས་རབ་ནོར་གྱི་དངོས་གྲུབ་བསྩལ་དུ་གསོལ།།
མཁས་པའི་གོ་ས་འཛིན་པའི་ལོག་སྨྲ་དང་།།
གཡོ་སྒྱུ་ཁོག་ཏུ་སྦས་པའི་བྱང་སེམས་ཚུལ།།
ནང་བསྟན་དངུལ་ལོག་བརྗེས་པའི་ཤན་པ་ལ།།
ཤེས་རབ་རལ་གྲི་འཕེན་པའི་དུས་ལ་བབས།།
མགོན་ཁྱེད་གསང་གསུམ་བརྗིད་པའི་མཚན་བཟང་ལ།།
ཇི་བཞིན་བློ་ཡིས་བརྗོད་པ་མི་ནུས་ཀྱང་།།
འདི་འབད་རྣམ་དཀར་ཚོགས་ཀྱི་བྱིན་མཐུ་ལས།།
མི་བྲལ་ཚེ་རབས་ཀུན་ཏུ་རྗེས་བཟུང་ཤོག།
