ཕྲ་ཞིབ་རིགས་པའི་ལམ་ནས་ལན་མང་དུ།།
དཔྱད་ཅིང་ལེགས་པར་སྦྱར་བའི་མིང་མཛོད་འདི།།
དུས་ཀྱི་རྦ་ཀློང་འཁྲུགས་པའི་ཁུགས་སོ་ནས།།
ཆོལ་གསུམ་གཅིག་ཏུ་འཛོམས་པའི་རང་སྒྲ་ཡིན།།
གནའ་དེང་རིག་པའི་ཕྱོགས་ལྷུང་དོག་པོའི་འཕྲང་།།
སྐྱ་སེར་རྩོད་པའི་རླུང་གིས་དཀྲུགས་པའི་སེམས།།
ཕན་མེད་ཐོ་ཅོ་སྒྲོག་པའི་བརྟུལ་ཞུགས་དག།
ཡོངས་སུ་སྤངས་ཏེ་གཟུ་བོའི་བློ་ཡིས་བརྟགས།།
བརྡ་ཡི་སྒྲུབ་ལུགས་བསྟན་བཅོས་ཚད་མར་གཏུགས།།
མིང་གི་འགྲོ་སྟངས་སྐད་ཀྱི་གཤིས་དང་བསྟུན།།
མནོག་ཆུང་ཉི་ཚེའི་ཚིག་གི་འཐེན་འཁྱེར་རྣམས།།
རིང་དུ་དོར་ནས་སྤྱི་ཕན་སེམས་ཀྱིས་བསྐྲུན།།
འདི་ན་ངོ་སོ་སྲུང་བའི་རེ་དོགས་མེད།།
འདི་ན་ཁེ་ཕན་སྒྲུབ་པའི་སྒེར་དོན་མེད།།
རང་རང་ཕྲག་ཏུ་བབས་པའི་འོས་འགན་ཙམ།།
སོ་སོས་འབད་པས་བསྒྲུབས་ཏེ་ཕུལ་བ་ཙམ།།
བརྡ་དང་ཐ་སྙད་སྐད་དང་ཡི་གེ་ནི།།
རིག་པའི་གཞུང་ཀུན་བགྲོད་པའིི་ཐེམ་སྐས་ཏེ།།
གདགས་སྦྱངས་གོམས་པའི་འཇུག་ངོགས་ལ་བརྟེན་ནས།།
མདུན་སྐྱོད་ཡར་རྒྱས་ལེགས་པའི་ཕྱོགས་སུ་གཞོལ།།
ཟབ་ཡངས་ཤེས་བྱའི་གོ་རར་འཇུག་པའི་ཚེ།།
ལུགས་གཉིས་གཞན་གྱི་དྲིང་དུ་མི་འཇོག་པའི།།
མེས་པོའི་སྲོལ་བཟང་འཁོར་ལོ་འབར་བའི་རྩིབས།།
སྐད་དང་ཡི་གེའི་སྲོག་ཤིང་བརྟན་ལ་རག།
དེ་སླད་ཀུན་ལ་ཕན་པའི་དབྱིག་མཆོག་དང་།།
ལྷག་བསམ་ཀློང་ནས་རྡོལ་བའི་འབོད་སྐུལ་འདི།།
ཕྱི་ནང་གཙུག་ལག་རྒྱ་མཚོའི་ཁྱོན་ཡངས་ལས།།
ཉེར་བཏུས་ལེགས་བསྒྱུར་རིགས་པའི་གསོས་སུ་སྤེལ།།
སྒྲ་རིག་ཁ་བའི་ཀློང་ལས་མངོན་སྐྱེས་པའི།།
བརྡ་དག་འོད་དཀར་ཚིག་གི་མཛོད་འདི་ཡང་།།
ལྔ་ཕྲག་རིག་པའི་འོད་སྣང་དང་འགྲོགས་ནས།།
ཕྱོགས་ཀྱི་ཐ་གྲུ་ཀུན་ཏུ་ཁྱབ་གྱུར་ཅིག།
