བླ་ཆེན་མྱི་ཆེན་དྲ་བའི་སྒང་ལ་བྱོན།།
རྐུབ་སྟེགས་དཔོན་པོ་དྲ་བའི་སྒང་ལ་ཕེབས།།
མི་སེར་ཉམ་ཆུང་དྲ་བའི་སྒང་ལ་འདུ།།
མདོར་ན་ཀུན་ཀྱང་དྲ་བའི་སྒང་ན་རུབ།།
ཨེམ་བྷེ་བླུགས་ནས་དྲ་བའི་གྲོང་ལ་འགྲོ།།
ཐིར་རྗིས་བླུགས་ནས་དྲ་བའི་གླིང་ལ་ཉུལ།།
ཝ་ཧྥི་འཐེན་ནས་དྲ་བའི་རྒྱལ་སར་འཁྱམ།།
ད་ནི་ཚང་མ་ཡང་མ་འཁྱམ་འགྲོ་འགི།
རྗེ་ཡི་གཙོ་བོ་དྲ་བར་སྐྱབས་སུ་མཆི།།
སྒོར་མོ་ཡོད་ཚད་སྟོབ་བོ་ཁ་རྃ་ཁ་ཧི།།
ཡོད་ཚད་རྡུལ་དུ་རློགས་ཤིག་ཟློག་ཟློག་ཟློག།
གང་བཅོལ་ལས་རྣམས་སྒྲུབས་ཤིག་བྷྱོ༔བྷྱོ༔བྷྱོ།།
གུང་ཟས་སྣུམ་ལུགས་དགོང་ཟས་ཚོ་རབས་ཟེར།།
གྲོད་ཁོག་རྒྱགས་རབས་ལྷག་འཕྲོ་ལུས་རབས་ཟེར།།
དྲ་བའི་སྒང་ན་ཁ་སྒྲོབ་ཤོད་སྟངས་ལས།།
མདོར་ན་ཁ་རྗེ་དབང་ཐང་འདྲ་འདྲ་རེད།།
རྒྱང་ལ་སོང་ཚུལ་སྤྲོ་འཆམ་ཕྱིན་རབས་ཟེར།།
ས་ཆ་སྐྱིད་རབས་ལྟད་མོ་མཐོང་རབས་ཟེར།།
རྒྱང་རྒྱུའི་པར་རེ་བཀྲམས་དང་མ་བཀྲམས་ལས།།
སྡུག་གི་ངོ་གདོང་ལུག་སྟངས་འདྲ་འདྲ་རེད།།
ནང་སྦྱོང་ཡོད་པས་དྲ་འབྲེལ་མི་ཁོམ་ཟེར།།
ཡིག་ཚད་ཐུག་པས་དྲ་སྒོ་གཏན་རྒྱུ་ཟེར།།
སློབ་སྦྱོང་འདུན་པ་ཆེ་མདོག་སྟོན་སྟངས་ལས།།
ལྐོག་ནས་དྲ་བར་འཐོམ་ལུགས་འདྲ་འདྲ་རེད།།
འགའ་རེས་དྲ་བས་ཕན་རབས་བཟང་རབས་གླེང་།།
ལ་ལས་དྲ་བས་གནོད་རབས་ཕུང་རབས་བཤད།།
ཁ་ཁོག་མི་མཚུངས་ཤོད་ལུགས་སོ་སོ་ལས།།
དྲ་བའི་འོག་ན་སྒུར་ལུགས་འདྲ་འདྲ་རེད།།
ད་ལྟ་ས་ཡོམ་ཆུ་ལོག་བརྒྱབ་རབས་སྒྲོག།
གནའ་དུས་འདི་འདྲ་རྩ་ནས་མེད་ཚུལ་བཤད།།
གནས་ཚུལ་གསར་པ་མྱུར་དུ་ཤེས་མིན་ལས།།
འབྱུང་བཞིའི་གོད་ཆག་ཕོག་ལུགས་འདྲ་འདྲ་རེད།།
དཔེ་ཆ་ཉོས་ནས་སྒོར་མོ་རྫོགས་རབས་གླེང་།།
དཔེ་ཀློག་བྱས་ནས་ཉིན་མཚན་སྐྱེལ་ཚུལ་བཤད།།
ཞེད་པོ་བྱེད་ཀྱི་ཡོད་མདོག་སྟོན་ལུགས་ལས།།
ཚང་མ་བསམ་བློའི་གནས་ཚད་འདྲ་འདྲ།།
ཚིག་དུམ་བྲིས་ཏེ་སྙན་ངག་ཡག་ཚུལ་བཤད།།
ཚིག་ནར་བྲིས་ཏེ་ལོ་རྒྱུས་ཤེས་མདོག་སྟོན།།
རང་གིས་རང་ལ་མཁས་མིང་གསོལ་ལུགས་ལས།།
ཀུན་ཀྱང་རིག་གནས་ཆུ་ཚད་འདྲ་འདྲ་རེད།།
ཡིག་ཚད་བཏང་སྟེ་བྱ་དགའ་བླངས་རབས་གླེང་།།
རྩོམ་ཡིག་འགྲན་ཏེ་ཕུལ་བྱུང་ཁུར་རབས་བཤད།།
ཕྱི་ལ་སྒྲོག་དང་ནང་དུ་སྦེད་ལུགས་ལས།།
ཀུན་ཀྱང་ཨང་ཐོབ་བརྒྱ་ཆ་འདྲ་འདྲ་རེད།།
དབྱིན་ཡིག་ཤེས་ཟེར་ཚིག་གྲུབ་ཁ་ཤས་བྲིས།།
བོད་ཡིག་མཁས་ཟེར་ཚིག་ཆག་འགའ་ཞིག་འདྲུད།།
ཚིག་གི་མགོ་མཇུག་ཆག་ལུགས་སོ་སོ་ལས།།
མདོར་ན་ཡིག་ནོར་སྤུང་ལུགས་འདྲ་འདྲ་རེད།།
དྲ་གྲོགས་མང་བས་ཁྱུ་འཕུད་བཏང་ཡིན་ཟེར།།
དྲ་གྲོགས་མཁོ་བས་དྲ་འབྲེལ་གནང་རོགས་ཞུ།།
ཆེ་ཉམས་རྫིག་ཉམས་སྟོན་ལུགས་སོ་སོ་ལས།།
ཀུན་ལ་གྲོགས་པོ་མཁོ་ལུགས་འདྲ་འདྲ་རེད།།
མཛའ་མོའི་རྒྱབ་ནས་མཛའ་བོས་ལོ་ཝི་གཏོང་།།
མཛའ་བོའི་ཟུར་ནས་མཛའ་མོས་མིས་སི་སྐུར།།
གཉིས་ཀ་འཕྲད་དུས་དུང་མདོག་སྟོན་ཙམ་ལས།།
ལྐོག་ནས་ཉེས་པ་གསོག་ལུགས་འདྲ་འདྲ་རེད།།
གྲྭ་པ་ཨ་ནེས་དགའ་རོགས་ཁ་བྱང་ཉར།།
ཁྱོ་ཤུག་སོ་སོས་ཟུར་རྟེན་གསང་ཨང་སྐུང་།།
ཆོས་དང་འཇིག་རྟེན་ལམ་ལུགས་ཁ་ཁ་ལས།།
རང་རང་ཐུགས་དམ་སྐོང་ལུགས་འདྲ་འདྲ་རེད།།
