སྔ་ལུས་ཟད་པོ་ཞིག་གིས་ཕྱི་མཐའ་རུ་བསྐྱུར་ཞིང་།།
ཕྱི་ལུས་དར་མ་རྣམས་ཀྱིས་ངོས་ལེན་ནི་མ་བྱས།།
གཟུགས་མེད་བར་དོར་འཕྱན་པའི་ཁེར་འགྲོ་ཡི་རྣམ་ཤེས།།
མངལ་སྒོར་གནས་ཚང་བསུ་བའི་དྲིན་ཆེན་གྱི་ཨ་མ།།
ཉིན་ཞག་ཉིས་བརྒྱ་བརྒྱད་ཅུ་མངལ་ཁྱིམ་དུ་བསྙལ་ཏེ།།
ཡིད་འོང་གཅེས་སྙིང་འདོད་པའི་ལུས་ཆུང་ཞིག་བྱིན་ཏེ།།
འཇིག་རྟེན་དཀར་ངོགས་སྣང་བའི་མིག་ཟུང་ཡང་ཕྱེས་ཏེ།།
དུས་གསུམ་ནུ་ཆུས་གསོ་བའི་དྲིན་ཆེན་གྱི་ཨ་མ།།
གོག་ནས་ནུར་དུས་མདུན་གྱི་ཐོད་ལྩིབས་སུ་བྱས་ཤིང་།།
ལངས་ནས་འགྲོ་དུས་ལག་ཆུང་ཁེན་ས་རུ་འགྲེངས་ཤིང་།།
རྒྱུན་དུ་རང་གི་བྲང་ངོས་སྲུང་མདུད་བཞིན་བཏགས་ཤིང་།།
གཅེས་གཅེས་བྱམས་བྱམས་གནང་བའི་དྲིན་ཆེན་གྱི་ཨ་མ།།
སྐྱག་གཅིན་ཚོད་མེད་ཉལ་ཆས་ཡང་ཡང་དུ་བརྫད་པ །།
དྲི་མ་ངར་པོས་སྣ་ཁུང་སྲིན་བུ་ཡང་བསྒུལ་པ།།
སྐད་ཅོར་ཚ་བོས་རྣ་བའི་བ་སྤུ་ཡང་བསླངས་པ །།
ཐམས་ཅད་དང་ལེན་ནུས་པའི་དྲིན་ཆེན་གྱི་ཨ་མ།།
གོམ་གསུམ་སྤོས་ན་རྐང་ཆུང་རྡོ་ཐོགས་ཀྱི་དོགས་ཟོན།།
ཟས་གསུམ་བཟས་ན་མིད་པ་འགག་ཉེན་གྱི་སྔངས་སྐྲག།
ཐུན་གསུམ་ཉལ་ན་ཚ་གྲང་འཐབ་མདོག་གི་སེམས་ཁྲལ།།
ཟ་ཉལ་འགྲོ་འདུག་སྲུང་བའི་དྲིན་ཆེན་གྱི་ཨ་མ།།
སྐེ་རགས་དོམ་ན་གཡོག་གི་རེ་བ་ཡང་མེད་ལ།།
གོ་ས་རག་ན་ལྟག་སྒོའི་རེ་བ་ཡང་མེད་པ།།
མིང་གྲགས་རྙེད་ན་དྲིན་གཟོའི་རེ་བ་ཡང་མེད་ལ།།
རེ་བ་མེད་བཞིན་བརྩེ་བའི་དྲིན་ཆེན་གྱི་ཨ་མ།།
རིང་དུ་གྱེས་ན་རིང་བའི་སྲུང་མ་དེ་ཁྱེད་ཡིན།།
ཉེ་རུ་གནས་ན་ཉེ་བའི་མགོན་སྐྱོབ་དེ་ཁྱེད་ཡིན།།
ཉེ་རིང་མེད་པར་འབྲལ་མེད་དཔུང་གཉེན་དེ་ཁྱེད་ཡིན།།
དུང་བརྩེའི་སྤྱན་མི་ཟུམ་པའི་དྲིན་ཆེན་གྱི་ཨ་མ།།
ཞོགས་པའི་མཆོད་པ་གཤོམ་དུས་བུ་ཆུང་ལ་སྨོན་ཡོད།།
ཉིན་རྒྱབ་མཆོད་རྟེན་སྐོར་དུས་བུ་ཆུང་ལ་སྨོན་ཡོད།།
ཉལ་ཁར་སྐུམ་ཕྱག་འཚལ་དུས་བུ་ཆུང་ལ་སྨོན་ཡོད།།
སྨོན་པ་ཉིན་གཅིག་མ་ཆད་དྲིན་ཆེན་གྱི་ཨ་མ།།
ལས་དབང་རླུང་ལ་བུ་ཆུང་སྲིན་བལ་དང་འདྲ་ཞིང་།།
ད་ལྟ་ས་མཐར་ནམ་ཞིག་ལུང་ཁུག་ཏུ་བདས་འགྲོ།།
ཕྱོགས་མེད་འཁྱམ་པོས་དྲིན་བྱས་དྲིན་ལན་ཞིག་མ་སོས།།
འགྱོད་གདུང་ཁུར་གྱིས་ནོན་ཡོད་དྲིན་ཆེན་གྱི་ཨ་མ།།
ཨ་མའི་དབུ་ལོ་དཀར་ནག་ཁ་དོག་གིས་བསྲེས་ཡོད།།
ཨ་མའི་བཞིན་རས་རྒས་རིས་གཉེར་མ་ཡིས་བཀབ་ཡོད།།
ཨ་མའི་སྐུ་གཟུགས་དགྱེ་དགུ་དཀའ་བའི་ངང་གནས་ཡོད།།
མ་བུ་མཇལ་འཛོམས་སྐལ་བ་ད་དུང་ཡང་མ་བྱུང་།།
ཚེ་ལྷ་རྣམ་གསུམ་འཆི་མེད་དངོས་གྲུབ་དེ་མ་ཆུང་།།
སྨན་བླ་མཆེད་བརྒྱད་བདེ་སྦྱིན་ཐུགས་རྗེ་དེ་མ་ཆུང་།།
དཀོན་མཆོག་གསུམ་པོས་མགོན་སྐྱོབ་གཟིགས་པ་དེ་མ་ཆུང་།།
བདག་གི་ཨ་མའི་སྐུ་ཚེ་ཡུན་རིང་དུ་སྲིང་རོགས།།
