ངས་འདི་ནས་༧གོང་ས་མཆོག་སྤྱན་རས་གཟིགས་དང་། ཡང་ན་བྱང་ཆུབ་སེམས་པ་ཡིན་ཚུལ་གང་ཡང་གླེང་རྒྱུ་མིན་ལ་ཆོས་ཕྱོགས་མ་གཏོགས་ཆབ་སྲིད་ཀྱི་ནང་དུ་དེ་ལྟ་བུའི་བརྗོད་ཚུལ་དེ་སྐྱོན་ཆ་ཅན་ཞིག་ཡིན་པར་ངོས་འཛིན་ཡོད། འདི་ནས་གླེང་བར་བྱ་བ་ནི་༧རྒྱལ་བ་རིན་པོ་ཆེ་ང་ཚོ་དང་གཅིག་མཚུངས་ཡིན་པའི་མི་ཞིག་གི་ངོས་ནས་གླེང་རྒྱུ་ཡིན། མ་གཞི་ང་ནི་བོད་ཀྱི་མཁས་པ་མང་པོ་ཞིག་རྗེ་བཙུན་འཇམ་དཔལ་དབྱངས་ཀྱི་རྣམ་སྤྲུལ་ཡིན་རབས་བཤད་ནས་ཁྱད་པར་དུ་འཕགས་པ་སྒྲུབ་ཚུལ་འདིས་ང་ལ་ངོ་མཚར་བའི་བསམ་པ་གང་ཡང་མི་སྐྱེ་བ་མ་ཟད། དེ་ལས་ལྡོག་སྟེ་ཁོང་རྣམ་པ་མི་རང་ག་བ་ཞིག་ཡིན་པའི་དབང་དུ་བྱས་ན་རིན་ཐང་ཆེ་བ་འདུག འདི་ནི་ང་རང་གི་གཞི་རྩའི་ལྟ་ཚུལ་ཞིག་ཡིན། ༧གོང་ས་སྐུ་ཕྲེང་བཅུ་བཞི་བ་ཆེན་པོ་མཆོག་ནི་མ་འོངས་ཕུགས་རྒྱང་རིང་པོ་ལ་དགོངས་པ་བཞེས་ནས་འཆར་གཞི་དང་ལམ་སྟོན་ཐུབ་མཁན་གྱི་རླབས་ཆེན་གྱི་དབུ་ཁྲིད་ཅིག་ཡིན། སྤྱིར་བཏང་གི་སྐྱེ་བོ་མང་པོ་ཞིག་དཀའ་ཁག་གི་དུས་སུ་སེམས་ཞུམ་ནས་གནས་སྐབས་ཀྱི་ཉེན་ཡོལ་ཙམ་ལས་བསམ་བློ་འཁོར་དཀའ་མོད། སྐྱེ་བོ་རབ་དག་ནི་དེ་ལས་ལྡོག་སྟེ་བློ་རྩ་ཇེ་བརྟན་དང་ཕུགས་འདུན་ཇེ་ཟབ་ཏུ་འགྲོ་བ་ཡིན། ༧གོང་ས་༧སྐྱབས་མགོན་ཆེན་པོ་མཆོག་འཕགས་ཡུལ་དུ་ཞབས་སོར་འཁོད་མ་ཐག་རྒྱ་གར་ཏེཛ་སྤུར་དུ་རྒྱལ་སྤྱིའི་གསར་འགོད་པ་ཚོར་བཀའ་མོལ་ཐོག་མ་གནང་བའི་གསུང་བཤད་དུ“1རྒྱ་གར་གཞུང་དང་གཞན་རྒྱལ་ཁབ་སུ་ཞིག་གིས་ངོས་ལེན་བྱས་མིན་གང་ལ་ཡང་མ་ལྟོས་པར་ངོས་དང་། ངའི་གཞུང་གི་བཀའ་ཤག་གང་དུ་ཡོད་པ་དེར་བོད་མི་མང་ནས་ཡིད་ཆེས་བློ་འཁེལ་གྱིས་གཞུང་ལ་ངོས་ལེན་བྱེད་མུས་ཡིན” ཞེས་གསུངས།1 (བཙན་བྱོལ་བོད་ཀྱི་མང་གཙོའི་བྱུང་བ་བརྗོད་པ། ཤོག་གྲངས40
2014 ལོར་བོད་མི་མང་སྤྱི་འཐུས་ལྷན་ཚོགས་ནས་པར་བསྐྲུན་གནང་། )
