མང་གཙོར་བསྒྱུར་བའི་རྒྱབ་རྒྱང་ལ་ལྟ་བ། 

བོད་ལུང་པ་ལྟ་བུའི་ཕྱི་རྒྱལ་ཁབ་ཁག་དང་འབྲེལ་བ་མེད་ལ།  དེང་རབས་ཀྱི་དཔལ་ཡོན་ལ་ཁ་ཕྱོགས་མེད་པའི་སྤྱི་ཚོགས་དེའི་ནང་༧གོང་ས་མཆོག་ལ་ཅིའི་ཕྱིར་མང་གཙོའི་ཐུགས་དགོངས་འཁྲུངས་བ་ཡིན་ནམ།  ༧གོང་ས་མཆོག་སྐུ་གཞོན་ནུའི་དུས་ནས་གསར་གཏོད་དང་། འཕྲུལ་རིགས།  བསྒྱུར་བཅོས།  ཚོད་ལྟ་གནང་རྒྱུ་བཅས་ལ་ཤིན་ཏུ་དགའ་མོས་ཡོད་པའི་རང་གཤིས་དམིགས་བསལ་བ་ཞིག་ཡོད། སྐུ་གཞོན་ནུའི་དུས་སུ་སྐབས་དེའི་བོད་གཞུང་གི་ལས་ཀྱི་སྣེ་མོ་ཚོས་གཞུང་གི་འཛིན་སྐྱོང་དང་ལས་དོན་བྱེད་སྟངས་མང་པོ་ཞིག་མ་འགྲིག་པ་དང་མ་འཐུས་པའི་སྐད་ཆ་མང་དག་ཅིག་གད་པ་ཚོ་དང་མཚན་ཞབས་པ་སོགས་བརྒྱུད་ནས་༧གོང་ས་མཆོག་གི་གསན་གནང་གི་ཡོད།  ཕྱི་ལོ་༡༩༥༠ ལོར་དགུང་ལོ་བཅུ་དྲུག་ལས་སོན་མེད་པའི་བྱིས་པ་དེར་བོད་ཀྱི་ཆོས་སྲིད་གཉིས་ཀྱི་དབུ་ཁྲིད་དུ་བསྐོས་བཞག་གནང་། སྐབས་དེར་གཞུང་གི་འཛིན་སྐྱོང་དང་ཁྲལ་བསྡུའི་ལམ་ལུགས་སོགས་ཀྱི་ནང་དུ་མ་དྲང་པ་དང་དངོས་ཡོད་མི་འཚམ་པའི་གནས་ཚུལ་མང་པོ་ཡོད་པ་གཟིགས་རྟོགས་ཐུབ་ཡོད། ༡༩༥༤ ལོར་རྒྱ་ནག་ཏུ་ཆིབས་སྒྱུར་བསྐྱངས་ཏེ་རྒྱ་ནག་གི་འགོ་ཁྲིད་མའོ་ཙེ་ཏུང་སོགས་ལ་མཇལ་འཕྲད་དང་རྒྱ་ནག་མི་དམངས་འཐུས་མི་ཚོགས་ཆེན་སོགས་ལ་མཉམ་ཞུགས་བྱས་ནས་རྒྱ་ནག་གི་མགོ་ཁྲིད་ཚོས་གཅིག་སྡུད་དབང་འཛིན་གྱི་ལས་ཀ་བྱེད་སྟངས་དང་། ༡༩༥༦ ལོར་སྟོན་པ་སངས་རྒྱས་སྐུ་མྱ་ངན་ལས་འདས་ནས་ལོ་ ༢༥༠༠ འཁོར་བའི་དུས་དྲན་ལ་གདན་ཞུས་ལྟར་རྒྱ་གར་དུ་ཕེབས་པ་དང་རྒྱ་གར་མང་གཙོའི་སྤྱི་ཚོགས་ནང་གྲོས་ཚོགས་སོགས་ཀྱི་འགྲོ་ལུགས་ལེགས་པར་གཟིགས་ནས་ཐུགས་ཡིད་འཕྲོག་པོ་བྱུང་ཡོད། དེ་བཞིན་ནང་ཆོས་འདུལ་གཞུང་དུ་མང་གཙོའི་ལམ་སྲོལ་དང་མཐུན་པའི་ཕྱག་ལེན་མང་པོ་ཡོད་པ་འདི་དག་གིས་༧གོང་ས་མཆོག་གི་ཐུགས་ལ་མང་གཙོའི་ལམ་བཟང་ཡོངས་སུ་སྨིན་པར་མཛད་ཡོད།