དོན་དངོས་ཐོག་དེ་ནི་ཉེན་ཁ་ཞིག་ཡིན་པར་མ་ཟད། དེ་འདྲ་དེས་༧གོང་ས་མཆོག་ལ་ཞབས་ཏོག་ཞུ་ཐུབ་མཁན་དང་། ཐུགས་ཟིན་གྱི་སློབ་མ་ཞིག་ཡོང་རྒྱུ་ལས་ལྡོག་སྟེ། ༧གོང་ས་མཆོག་གི་དགོངས་གཞི་ལ་ལག་ལེན་གྱི་ཐོག་ནས་ལོག་འགྲེལ་དང་འགོག་རྐྱེན་བཟོ་མཁན་ཞིག་ཆགས་སྲིད་པ་ཡིན།
དེ་ཡང་དཔེ་མཚོན་གྱི་ཐོག་ནས་ཞུས་ན། ༧གོང་ས་མཆོག་གིས་ནམ་ཡིན་ཡང་། སངས་རྒྱས་ཀྱི་བསྟན་པ་ནི་ནང་གི་བཤད་སྒྲུབ་གཙོ་བོ་ཡིན་པ་ལས་རྟེན་བཞེངས་དང་འཛུགས་བསྐྲུན་སོགས་ཨང་དང་པོར་འཇོག་རྒྱུ་མེད་པའི་དགོངས་ཚུལ་ཤུགས་ཆེན་པོ་བཏོན་ན་ཡང་། དགོན་པ་གྲྭ་ཚང་མང་པོ་ཞིག་གིས་ད་དུང་ཡང་བླ་བྲང་དང་འདུ་ཁང་སོགས་ཕྱིའི་འཛུགས་སྐྲུན་རྒྱ་བསྐྱེད་ཀྱི་ཚད་གཞི་དེ་དངོས་ཡོད་ཀྱི་དགོས་མཁོ་ལས་བརྒལ་བ་ཞིག་བྱེད་རྒྱུར་ནུས་པ་འདོན་བཞིན་ཡོད།
ཡང་༧གོང་ས་མཆོག་གིས་ཆོས་དང་མ་འབྲེལ་བའི་བཟང་སྤྱོད་ནི་རང་ཉིད་ནང་པ་ཡིན་བཞིན་དུ་བོད་པའི་སྤྱི་ཚོགས་དང་འབྲེལ་བ་མེད་པར་དངོས་སུ་གསུངས་ན་ཡང་། རང་རེའི་ཤེས་ཡོན་ཚོགས་སྡེ་འགའ་རེས་ཨུ་ཚུགས་བརྒྱབ་ནས་སློབ་གྲྭ་ཁག་གི་ནང་དུ་ཆོས་དང་མ་འབྲེལ་བའི་སློབ་གསོ་ཞེས་པའི་ལས་རིམ་ཨུ་ཚུགས་ཀྱིས་འཛུད་ཐབས་བྱེད་བཞིན་ཡོད།
ཡང་སྤྱིར་བཏང་གི་སློབ་གྲྭ་ཁག་ཏུ་རིགས་ལམ་སློབ་པ་དེའང་། ༧གོང་ས་མཆོག་གི་ངོས་ནས་ཆོས་བརྒྱུད་བྱེ་བྲག་པ་དང་འབྲེལ་བ་ཞིག་གི་ཐོག་ནས་སློབ་དགོས་པ་ཞིག་དང་། ལམ་ལུགས་ཁྱད་པར་བ་ཞིག་དང་སྦྲེལ་ནས་འགྲོ་དགོས་པ་ཞིག་ཡིན་པར་གཏན་ནས་གཟིགས་ཀྱི་མེད་ན་ཡང་། ལྟ་གྲུབ་སློབ་དཔོན་དུ་བཏགས་པ་ཕལ་མོ་ཆེས་རང་ཉིད་ཀྱི་གྲྭ་ས་དང་ཆོས་བརྒྱུད་ཀྱི་ཟེར་སྒྲོས་བྱེ་བྲག་པ་དེ་ཚོ་དངོས་ཤུགས་བརྒྱུད་གསུམ་ནས་སློབ་ཕྲུག་གི་བསམ་བློར་སློབ་གསོའི་ངོ་བོར་སྤེལ་བཞིན་ཡོད།
ཡང་༧གོང་ས་མཆོག་གིས་གནའ་ནས་ད་བར་ཆོས་བརྒྱུད་ཕན་ཚུན་བར་ལ་དོན་དམ་པའི་རིས་མེད་གནང་དགོས་པ་དང་། ཆོས་བརྒྱུད་ཕན་ཚུན་བར་ཡང་གཅིག་གིས་གཅིག་ལ་སློབ་སྦྱོང་དགོས་པར་ནན་བསྐུལ་གནང་ན་ཡང་། ༧གོང་ས་མཆོག་ལ་བློ་དཀར་སེམས་དཀར་ཡིན་པར་ཁས་འཆེ་མཁན་ཕལ་མོ་ཆེས་ཀྱང་གཞན་ཕྱོགས་ཀྱི་བླ་མ་དང་ཆོས་བརྒྱུད་དེ་ཚོས་ཀྱང་གཞན་ཕ་རོལ་པོའི་ཉམས་ལེན་དང་ཀུན་སྤྱོད་སོགས་ཀྱི་འགྲོས་དེ་རང་ཉིད་ཀྱི་བག་ཆགས་ཀྱིས་ངོས་ལེན་ཡོད་པའི་ལྟ་གྲུབ་དང་ལག་ལེན་གྱི་འགྲོས་དང་ཕྱོགས་མཐུན་མིན་ཁོ་ན་ལ་ལྟ་བ་ལས། རང་ལ་ཆ་རྒྱུས་ཡོད་པའི་བཤད་སྒྲུབ་ཉམས་ལེན་གྱི་རིག་གཞུང་དང་མི་མཐུན་པའི་ཆོས་བྱེད་མཁན་དག་ལ་གུས་ཞབས་དང་རྩི་བཀུར་དང་ངོས་ལེན་བཅས་བྱེད་པ་སྟེ། གཞན་གྱི་མི་མཐུན་པའི་ཆ་ལ་སེམས་ཀྱི་གཏིང་ནས་རྩི་བཀུར་དང་དང་ལེན་ཞུ་བ་ཁོ་ན་དོན་དམ་པའི་རིས་མེད་ཀྱི་གཞི་རྩ་ཡིན་པར་ཁ་ཡ་གཏན་ནས་བྱེད་ཀྱི་མེད།
