ཀ་ཤིའི་གྲོང་ནས་གནམ་མཐོངས་ཁད་ཀྱིས་གཤགས།།
ལྡི་ལི་འབབ་ཚུགས་མཚན་མོའི་གནས་ཚང་བསྟེན།།
མོང་བྷེ་རྒྱུད་ནས་ལངྐའི་རྒྱལ་ཁམས་བསྙེགས།།
རྒྱལ་སའི་གྲོང་ཁྱེར་ཀོ་ལོ་བྷོ་ལ་བསྡད།།
སངས་རྒྱས་ཆོས་དང་ཧིན་དྷི་བླ་མའི་ཆོས།།
གང་ཞིག་གང་ལས་བྱུང་བའི་ཚོགས་འདུར་ཞུགས།།
སུ་ཞིག་བདེན་དང་སུ་ཞིག་རྫུན་ནོ་ཞེས།།
དཔྱད་ནུས་མིན་ཡང་སངས་རྒྱས་ཆོས་ལ་ཞེན།།
དགོན་སྡེ་དུ་མར་དད་པས་མཆོད་མཇལ་ཕྱིན།།
སི་ཏཱའི་མཚོ་འགྲམ་སྐྱིད་པའི་སྤྲོ་འཁྱམས་བྱས།།
ཉིན་བྱེད་འོད་ཀོར་གནམ་གྱི་དཀྱིལ་བསླེབས་ཀྱང་།།
དུས་ཀྱི་འཁོར་ལོས་ཚ་གྲང་སྙོམས་པོར་བྱས།།
དོན་ཚན་བཅུ་བདུན་བཞག་པའི་གནོན་ཤུགས་དང་།།
པཎ་གྲུབ་བཅུ་བདུན་བསྟེན་པའི་བྱིན་རླབས་ཀྱིས།།
ཡོ་རོབ་རྒྱལ་ཁམས་བཅུ་བདུན་འགྲིམས་མྱོང་ཡང་།།
སྤྲོ་སྣང་འདི་འདྲ་ནམ་ཡང་མྱོང་མྱངས་མེད།།
ནུབ་གླིང་ཡང་ཡང་འགྲིམ་པའི་བག་ཆགས་དེས།།
ཤར་ཕྱོགས་རྒྱལ་ཁབ་མིག་ལ་བཞག་མྱོང་མེད།།
ལངྐའི་འཇིག་རྟེན་འགྲིམ་པའི་ཉིན་མོ་ནས།།
ཤར་གླིང་དག་པའི་ཞིང་གི་རིན་ཐང་ཤེས།།
མ་ཧི་དྷ་ཡིས་ལངྐའི་རང་དབང་བསླངས།།
ཆོས་འཕེལ་འཆལ་པོས་རྒྱ་མཚོ་རྐྱལ་རྩལ་བསླབས།།
བེ་སྨྱོན་ལྡོམ་པོ་དུས་ཚོད་མི་རིང་བས།།
དྲན་ཐོ་སྙན་ཚིག་འགའ་ཞིག་འབྲི་ན་བསམས།།
ཉིན་བྱེད་དམར་པོ་ནུབ་མཐར་ཁད་ཀྱིས་ལྷུང་།།
སྐར་མ་ཐ་ཐོར་གནམ་གྱི་མཐའ་ན་གྲམས།།
ཟླ་བ་ཁེར་འགྲོ་སྤྲིན་པའི་རུམ་དུ་འཚང་།།
མཚོན་མོར་མཚོ་འགྲམ་བསྡད་ནས་སྙན་ངག་བྲིས།།
སྨག་གི་ཁྲོད་དུ་རྒྱ་མཚོ་མི་མཐོང་ཡང་།།
སྙན་པའི་རླབས་སྒྲ་རྣ་བའི་ལམ་དུ་འཇེབས།།
གསལ་ལ་མི་གསལ་ལཱ་སྒྲོན་སྦར་བའི་འོག།
ཕ་ས་དྲན་པའི་སྙན་ངག་སྐྱུར་མོ་ལུད།།
དྲིན་ཆེན་ཕ་མ་ལོ་མང་སྔོན་ནས་གཤེགས།།
བརྩེ་བའི་གཅེན་མོ་ལོ་གསུམ་གོང་དུ་གྲོངས།།
གཅེས་པའི་གཅུང་པོ་གཤེགས་ནས་བདུན་གསུམ་ཙམ།།
ཅང་མེད་ས་མཐར་འཁྱམས་པའི་སྙན་ངག་བྲིས།།
འདས་སོང་རླུང་གིས་བདས་པའི་སྨུག་སྤྲིན་ལ།།
བྱ་བཞག་སྤྲིན་གྱི་མེ་ཏོག་མ་བཞད་པར།།
རྐང་རྗེས་ཤར་ནུབ་གང་སར་ཕབ་པ་ཡི།།
ཤུལ་དུ་ལུས་པ་གྲགས་པའི་འབྲུག་སྐད་ཙམ།།
གདུང་བའི་སྨྲེ་ངག་སྨྱུ་གུའི་རྩེ་ནས་བཏོན།།
སྐྱོ་བའི་མིག་ཆུ་ཁོག་པའི་ནང་ནས་བཞུར།།
དབྱིབས་དང་ཁ་དོག་མེད་པའི་རྣམ་ཤེས་འདི།།
སི་ཏཱའི་རྒྱ་མཚོའི་རླབས་དང་ལྷན་ཅིག་གཡོས།།
ཤྲཱི་ལངྐ་སི་ཏཱའི་རྒྱ་མཚོའི་འགྲམ་ངོགས།
LIGHTHOUSE CLUB GALLE.SRI LANKA Jetwing 2018/1/24
