ལོ་མང་བསྙལ་བའི་རྒུན་ཆང་།།
ད་ལོ་ཞིམ་མངར་ཆེ་བ།།
མེ་ཏོག་མིན་པའི་རྒྱ་སེ།།
མི་ཚེའི་རྒྱན་དུ་མཛའ་བ།།
ལྷད་མེད་བརྩེ་བའི་སྙིང་གཏམ།།
གཅམ་བུའི་ཚིག་གིས་མ་བརྫད།།
ཧ་ཅང་དྭང་གཙང་ཡིན་པ།།
དམར་པོ་སེམས་ཀྱིས་ཤེས་ཡོད།།
ངས་ཀྱང་ཕར་ལ་སྟེར་བ།།
གཡོ་སྒྱུ་རྙོག་གིས་མ་གོས།།
བརྩེ་བ་སྟོང་གི་རུ་མ།།
ཚོར་བའི་ནང་སྙིང་ཡིན་པ།།
ཆ་འགྲིག་ཕོ་མོའི་མཛའ་བརྩེ།།
འཁོར་བའི་དོན་གོ་ཡིན་ན།།
གཏན་དུ་འབྲལ་ཐབས་མེད་པ།།
ལན་ཆགས་ཟེར་བ་མིན་འགྲོ།།
མི་བརྟན་འཁོར་བའི་གྲོང་གི།
ཆོས་རྣམས་བསླུ་བར་གྲགས་ཀྱང་།།
འུ་གཉིས་བར་གྱི་བརྩེ་བས།།
བསླུ་ཡོང་བསམ་པ་མི་འདུག།
གཤིན་རྗེའི་བཀའ་ཡིག་འབྱོར་དུས།།
མི་ཚེའི་ཕྲེང་ཐག་ཆད་ནས།།
འཆི་བྲལ་ཡིན་ན་མ་གཏོགས།།
གསོན་བྲལ་ཡོང་བ་མི་སྲིད།།
