དེ་ཡང་རང་རེ་གང་དུ་འཚོ་བཞིན་པའི་དུས་རབས་འདིར་གཏོགས་པའི་བོད་མི་ཞིག་ཡིན་པའི་ངོས་ནས་ཆེས་སྐལ་བ་བཟང་པོར་ཚོར་དུ་ཡོད་པ་ཞིག་ནི། ༧གོང་ས་༧སྐྱབས་མགོན་༧རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་ལྟ་བུའི་ལུགས་གཉིས་ཀྱི་དབུ་ཁྲིད་དང་ལམ་སྟོན་གྱི་སྒྲོན་མེ་བཟང་པོ་ཞིག་ཡོད་པ་དེ་ཡིན། ཕྱོགས་གཅིག་ནས་ད་ལྟའི་དུས་ཀྱི་ཁ་བ་ཅན་གྱི་བོད་འབངས་དག་གི་ལས་དབང་ནི་སྐྱ་ཆད་སྔོ་སྡུག་དང་། ཧ་ཅང་ངེས་གཏན་མེད་པའི་གནས་བབ་ཅིག་གི་འོག་ཏུ་ཡོད་ན་ཡང་། བོད་གངས་ཅན་གྱི་ཆོས་དང་རིག་གཞུང་གི་མཚན་སྙན་དང་ལ་རྒྱ། མི་སྒེར་གྱི་ཆེ་མཐོང་དང་མདུན་ལམ་བཅས་པར་དངོས་ཤུགས་བརྒྱུད་གསུམ་ནས་ཟུངས་ཁྲག་ལྟར་མེད་དུ་མི་རུང་བའི་སྟོབས་ཤུགས་སྩོལ་མཁན་ནི་༧གོང་ས་མཆོག་ཡིན།
དེ་ཡང་། ང་ཚོས་རང་ཉིད་༧གོང་ས་མཆོག་གི་འབངས་མི་དང་བུ་སློབ་ནང་མ་ཡིན་པའི་ངོས་འཛིན་བྱེད་ཀྱིན་ཡོད་པ་ནི་རྒྱུ་མཚན་མེད་པ་ཞིག་མ་རེད། ཡིན་ན་ཡང་། ནམ་རྒྱུན་༧གོང་ས་མཆོག་གིས། སྟོན་པ་ཐུགས་རྗེ་ཅན་གྱི་རྗེས་འཇུག་ཡང་དག་པ་ཞིག་བྱེད་པར་སྟོན་པ་ཐུགས་རྗེ་ཅན་གྱི་དགོངས་པ་ཡག་པོ་ཞིག་རྟོགས་དགོས་པ་དེ་ཧ་ཅང་གལ་ཆེན་ཡིན་པར་ནན་ཏན་གྱིས་གསུངས་པ་ལྟར། ང་ཚོས་ཀྱང་༧གོང་ས་མཆོག་གི་རྗེས་འཇུག་ཡང་དག་པ་ཞིག་དང་། ༧གོང་ས་མཆོག་གི་དགོངས་གཞི་དང་ལམ་སྟོན་གྱི་རྗེས་སུ་འབྲང་མཁན་ཞིག་བྱེད་དགོས་ན་ཆེས་ཐོག་མར་གལ་ཆེ་བ་ནི། ༧གོང་ས་མཆོག་གི་ཐུགས་བཞེད་དང་དགོངས་པ་བཞེས་ཕྱོགས་སོགས་མཚམས་དང་ཚིགས་མ་འཁྲུགས་པའི་ཐོག་ནས་ངོས་ཟིན་དགོས་པ་དེ་ཡིན།
ང་ཚོས་ནམ་རྒྱུན་༧གོང་ས་མཆོག་ལ་ཟོལ་མེད་ཀྱི་དད་གུས་དང་ལྷག་བསམ་རྣམ་དག་གི་གུས་བཀུར་ཡོད་པར་སྙམ་གྱི་ཡོད་ན་ཡང་། གལ་ཏེ་ང་ཚོས་ཁོང་གི་དགོངས་བཞེད་དངོས་གང་ཡིན་མ་ཤེས་པ་ཡིན་ན། རང་ཉིད་ཀྱི་བསམ་བློ་དང་དགའ་ཕྱོགས་ཀྱི་གོ་བ་ལེན་སྟངས་ཕྱོགས་རེ་བ་ཁོ་ནས་༧གོང་ས་མཆོག་གི་དགོངས་པ་ལ་གོ་བ་ལེན་མཁན་ཞིག་ཆགས་སྲིད། དེ་ནི་ཕྱོགས་རེ་བ་ཙམ་རེད།
