ཆོས་ལུགས་མཐུན་སྒྲིལ་ནི་༸གོང་ས་མཆོག་གི་ཐུགས་འགན་བཞིའི་གཉིས་པ་དེ་ཡིན། དེ་ཡང་༸གོང་ས་མཆོག་རང་ཉིད་ཆོས་པ་ཞིག་ཡིན་པའི་ངོས་ནས་རང་བཞིན་གྱིས་འཁྲི་བའི་ཐུགས་འགན་ཞིག་ཏུ་ཞལ་བཞེས་གནང་གི་ཡོད། ཆོས་པ་ཞིག་ཡིན་ན་ཆོས་ལུགས་མཐུན་སྒྲིལ་ནི་རང་བཞིན་གྱིས་ཕྲག་ཏུ་བབ་པའི་འགན་ཞིག་ཡིན་མོད། ༸གོང་ས་མཆོག་ནས་ཐུགས་འགན་དེ་བཞེས་ཀྱི་ཡོད་ཅེས་ཡང་ཡང་གསུངས་པ་ནི། ཆོས་ལུགས་རྣམས་མཐུན་པོ་བྱ་དགོས་པའི་སེམས་བཟང་གི་བསླབ་བྱ་ཙམ་ཞིག་མིན་པར་རིག་པའི་གཞུང་ལུགས་ཤིག་གི་མཚན་ཉིད་ཆ་ཚང་བའི་ལྟ་གྲུབ་ཅིག་གི་ངོ་བོར་སྒྱུར་ཡོད།
ཐུགས་འགན་གཉིས་པ་༼ཆོས་ལུགས་མཐུན་སྒྲིལ་༽དེ་ཆོས་ལུགས་པ་ཡོངས་ལ་ལམ་སྟོན་ཞིག་ཡིན་པར་མ་ཟད། ང་ཚོ་ལ་བརྡ་དམིགས་བསལ་ཞིག་ཀྱང་གཏོང་བཞིན་ཡོད་དེ། ཚང་མས་རང་གི་ཕྲག་ཏུ་རང་བཞིན་གྱིས་བབ་པའི་འགན་གང་དག་ཡོད་པ་དེ་དག་ཤེས་པར་བྱས་ནས་འགན་དེ་རྣམས་ཚུལ་བཞིན་དུ་འཁུར་ན་ད་གཟོད་སྤྱི་ཚོགས་འདི་སྔར་བས་ལེགས་པ་ཡོང་ཐུབ་བོ་ཞེས་བསྟན་གྱི་ཡོད།
རིག་པའི་གཞུང་ལུགས་ཀྱི་མཚན་ཉིད་ཆ་ཚང་བ་ཞིག་ཏུ་སྒྱུར་ཚུལ་ནི། ཐུགས་འགན་གཉིས་པའི་ལམ་སྟོན་དུ། མཐུན་སྒྲིལ་བྱས་པའི་ཕན་ཡོན། མ་བྱས་པའི་ཉེས་དམིགས། ཆོས་ལུགས་ཀྱི་དམིགས་ཡུལ། ཆོས་ལུགས་སོ་སོའི་ངོ་བོ། ཆོས་ལུགས་མཐུན་སྒྲིལ་གྱི་དཀའ་ངལ་གཙོ་བོ། དེ་ལ་གདོང་ལེན་བྱ་ཚུལ། མཐུན་སྒྲིལ་བྱ་ཚུལ་གྱི་རྣམ་གཞག་བཅས་དེ་བས་ལྷག་གཏན་ལ་དབབ་ཐབས་མེད་པ་ཞིག་ཞིབ་མོར་གཏན་ལ་ཕབ་པས་རེད། རིག་པའི་གཞུང་ལུགས་དེ་ལྟ་བུ་ཞིག་གསར་གཏོད་གནང་བས་བླ་ན་མེད་པའི་མཛད་རྗེས་ཤིག་བཞག་ཡོད།
སྡེ་ཚན་དེ་དག་སོ་སོའི་འགྲེལ་བཤད་རྣམས་ནི་༼དོན་དམ་པའི་ཆོས་ལུགས་མཐུན་སྒྲིལ་༽ཞེས་པ་དང་། ༼སྟོང་ལོ་གསར་པའི་སྤྱོད་བཟང་༽ ཞེས་པ་སོགས་ཕྱག་དེབ་དུ་མ་དང་། དེ་བཞིན་རྒྱུན་གྱི་ཆོས་ལུགས་མཐུན་སྒྲིལ་གྱི་བཀའ་སློབ་ཁག་ལས་གསལ་ལོ།། འདིར་མཚོན་ཙམ་རེ་སྨྲོས་ན།
