Month: October 2021

རྒྱལ་ཀུན་སྙིང་རྗེའི་ངོ་བོ་སྤྱན་རས་གཟིགས།། གཟིགས་པ་དུས་ལས་མི་གཡོལ་འཕྲིན་ལས་ལྷ།།

སེམས་སོང་དངོས་པོ་རེ་མཐོང་ན་འཛུམ་མདངས་ལྷུག་ལྷུག། མི་མཐུན་སྡུག་བསྔལ་རེ་འཕྲད་ན་དབུགས་རིང་ནར་ནར།། བདེ་འདོད་ཀུན་རྟོག་རེའི་སྣེ་ལ་སེམས་པ་འཐམ་སྟེ།། མི་ཚེ་ཟིན་མེད་ཀྱི་ངང་ནས་རིམ་བཞིན་རྫོགས་འགྲོ།།   ལུས་པོ་རི་སྒང་ལ་ཐོན་ན་སྣང་བ་མཐོ་མཐོ།། རྐང་ཆུང་རྡོ་བ་ལ་ཐུག་ན་ཁ་ཤ་འདར་འདར།། སིམ་པ་ཨ་འཐས་རེས་བསྐུལ་བའི་བསླུ་བྲིད་འོག་ཏུ།། མི་ཚེ་དལ་མེད་ཀྱི་ངང་ནས་ལ་མོ་རྒྱག་འགྲོ།།   ཚོར་བ་ཚེར་མ་དང་འདྲ་སྟེ་རྩེ་མོ་ཟིང་ཟིང་།། བདེ་བ་རྨི་ལམ་དང་འདྲ་སྟེ་མྱོང་བ་ཐན་ཐུན།། རྟག་བརྟན་གཡུང་དྲུང་གིས་སྟོང་པ་གྱ་གྱུའི་ངང་དུ།། མི་ཚེ་མཚོ་སྟེང་གི་རླབས་རིས་མཐའ་རུ་ཡལ་འགྲོ།།   ལང་ཚོའི་མེ་ཏོག་རེ་བཞད་དུས་སྤྲོ་བ་སིང་སིང་།། རྒས་གཉེར་ཡ་ཐོད་ལ་འཁྲིགས་དུས་སྐྱོ་བ་དུང་དུང་།། དགའ་སྐྱོ་དྲོ་གྲང་གི་གནམ་ངོ་རེས་མོས་ངང་ནས།། མི་ཚེ་སྤྲིན་གསེབ་ཀྱི་ཉི་མ་ནུབ་ལ་བུད་འགྲོ།།   སྙན་པའི་གཞས་ཆུང་རེ་ཐོས་ཚེ་རྡོག་བྲོ་ཁྲིག་ཁྲིག། རྩུབ་མོའི་ངན་བཤད་རེ་གོ་ན་མིག་ལོག་ཧྲིག་ཧྲིག། འཁོས་ཆུང་སེམས་པ་འདིའི་གྲོད་ཁོག་གང་དུས་མེད་བཞིན།། མི་ཚེ་འཚོལ་སྒྲུབ་ཀྱི་ངང་ནས་སྟོང་པར་ཆས་འགྲོ།།   སེམས་ལ་ཁ་བ་རེ་བབ་ན་མིག་ཆུ་ཐར་ཐར།། བདེ་དགའི་མེ་ཏོག་རེ་བཞད་ན་འཕུར་ལྡིང་ལྷབ་ལྷབ།། ནམ་ཟླའི་འགྱུར་ལྡོག་གི་གསེབ་ན་ཁ་སྟབས་ཞན་པའི།། མི་ཚེ་དབྱར་གསུམ་གྱི་སྦྲང་མ་སེར་བས་གཞོམ་འགྲོ།།   ...

མདོ་སྔགས་ཉི་ཟླ་ཟུང་གཅིག། འཆད་ཉན་གཟི་འོད་འབར་བའི།། མོན་ཡུལ་དགོན་རྩེ་དགོན་པ།། སྐབས་གསུམ་གཉིས་པའི་ཞིང་རེད།།    ཞིང་མཆོག་དེ་གའི་ཕྱོགས་སུ།། རྐང་གཉིས་སོར་འདབ་སྒུལ་གྱིན།། མ་བཅོས་མཛའ་བའི་དཔལ་ལས།། འཛུམ་ཆུང་འཛུམ་ཁ་གྲོལ་ཡིན།།   ངུར་བའི་མདངས་ཀྱིས་མཛེས་ཤིང་།། རྣམ་རིག་གེ་སར་རྒོད་པའི།། སློབ་ཕྲུག་ཆུ་སྐྱེས་གཞོན་ནུའི།། མིག་འདབ་ང་ལ་ཕྱོགས་བྱུང་།།   བདག་ཡིད་ཀུན་གསལ་དབྱིངས་ནས།། བྱམས་བརྩེ་ཟླ་བ་ཚེས་ཏེ།། གཞན་ཕན་པིར་གྱི་རྩེ་མོས།། འཆད་ཁྲིད་འོད་སྣང་སྤྲོས་ཡོད།།   འོད་ཀྱི་ཟེགས་མ་རེ་རེ།། ཀུ་མུད་ལུས་ལ་ཐིམས་ཤིང་།། ཤེས་རབ་ཟེའུ་འབྲུ་གསར་པ།། འདབ་མའི་པང་ལ་འཁྲུངས་སོང་།།   ཡིད་འོང་ཆུ་སྐྱེས་འདབ་མར།། མཚར་སྡུག་ཟེའུ་འབྲུ་སྨིན་དུས།། ཁོ་བོ་གཡུ་སྦྲང་གཞོན་ནུས།། དགའ་སྤྲོའི་གཤོག་འགྱུར་ངམ་ཡིན།།   ...

ལོ་དེ་ཕྱིར་དྲན་ཞིག་གི་མཇུག་མ་མིན།། སྣང་སྲིད་བདོག་ཚད་བཀག་པའི་ཆུ་བོ་ཡིན།། ང་ཡི་ཟླ་ངོ་བསྟུད་མར་ལེན་ཐབས་ཀྱིས།། ཤིན་ཏུ་སྐྱོ་བའི་ངག་ཅིག་བརླན་ཚུལ་ཡིན།།   ལོ་དེ་གྲང་ཅང་ཅང་གི་ནམ་ཟླ་མིན།། ག་རེ་འཐོབ་ཕྱིར་བསྙེགས་པའི་བརྩེ་དུང་ཡིན།། བདག་གི་སྙིང་མི་སྡུག་པའི་ལྷན་པ་འགའ།། གཅིག་ཐོག་གཅིག་ཏུ་བརྩེགས་པའི་ངལ་བ་ཡིན།།   ལོ་དེ་དགའ་སྡུག་བསླེས་པའི་སླེ་བོ་མིན།། ལན་བུ་ཡོད་ཚད་བཏུས་པའི་སྒྲུང་ཐུང་ཡིན།། ཁོ་མོའི་ངག་ལ་བྱིན་རླབས་ཨེ་ཞུགས་ཀྱིས།། རེ་སྒུག་སྣེ་མང་མཐུད་པའི་དུས་ཚིགས་ཡིན།།   ལོ་དེ་རྒྱུ་འབྲས་བསྟན་པའི་གཞུང་ལུགས་མིན།། ཚོར་བའི་གླེགས་བམ་སྤུངས་པའི་རི་བོ་ཡིན།། དར་དཀར་ཕར་ལ་བསྲིངས་པའི་མཇུག་འབྲས་ཀྱིས།། སྐད་ཆ་ག་ལེར་འོང་བའི་དུས་ཤིག་ཡིན།།   ལོ་དེ་བག་ཆགས་འཇོག་སའི་དབྱར་ཁ་མིན།། སྐྱོ་གདུང་སྣ་མང་བླུགས་སའི་དགུན་ཁ་ཡིན།། སོ་སོའི་ལག་ཏུ་བྱེ་རིལ་ཨེ་འབབ་ཀྱིས།། དགྲ་གཉེན་སོ་སོར་གྱེས་པའི་སུམ་མདོ་ཡིན།།   ལོ་དེ་སེམས་ཁྲལ་གཅིག་པུའི་ལྕགས་གོང་མིན།། མི་གཤིས་ལུ་གུ་འདྲ་ཞིག་རྙེད་ཕྱིར་ཡིན།། བརྩེ་བའི་དར་ཐག་ལ་བསྒྲེངས་ལུང་བསྒྲེངས་ཀྱིས།། རང་གཞན་གཉི་ཀའི་བདེ་སྐྱིད་འབྱུང་ས་ཡིན།།   ...

རབ་དཀར་ཚོགས་གཉིས་ཟླ་བའི་མ་མ་བསྲུབས་པ་ལས།། མཚན་དཔེའི་དཀྱིལ་འཁོར་ཉི་མ་འབར་བའི་འཕྲིན་ལས་ཀྱིས།། རྣམ་མང་འགྲོ་ལ་དགའ་བཞིའི་དཔལ་སྟེར་བྱམས་བརྩེའི་གཉེན།། སྟོན་མཆོག་མཚུངས་པ་མེད་དེས་ཀུན་ནས་སྲུངས་གྱུར་ཅིག ། ལྷུན་གྲུབ་ནོར་བུའི་མཛོད་ལ་མངའ་བརྙེས་ཀྱང་།། ཐུགས་རྗེས་ཡིད་ཅན་ཁམས་དང་རྗེས་མཐུན་པར།། ཕན་བདེ་ཞི་བའི་ལམ་མཆོག་འདོམས་མཛད་པའི།། ཐུབ༵་བསྟན༵་ཆོས༵་ཀྱི༵་ཉི༵་མ༵ར་རིང་ནས་འདུད།། ཕྲ་རྒྱས་ནད་ཀྱིས་གདུང་བའི་བདག་སོགས་འགྲོ།། མི་ཤིགས་ཐིག་ལེས་སྲུང་བའི་འཁོར་ལོའི་ལྟོར།། བརྩེ་ཆེན་དོན་ཡོད་ཞགས་པས་ཉེར་བཅིངས་ཏེ།། ཕྱོགས་ལས་རྣམ་པར་རྒྱལ་བའི་དཔལ་སྩོལ་ཅིག ། དམ་པ་གང་གི་ཞབས་སེན་སྤྱི་བོའི་རྡུལ།། འགོད་ལ་རིངས་ནས་ཡིད་ལ་བརྣགས་པ་ཡི།། བསོད་ནམས་བསྟན་ལ་དད་པའི་རྣམ་དཀར་གྱི།། སྐལ་བ་ལྡན་དེས་སོར་མོའི་འདུ་ལ་རིངས།། བྱང་ཕྱོགས་ནོར་འཛིན་སྒེག་མོའི་བཞིན་རས་ལ།། སྙན་པར་གྲགས་པའི་ལེགས་བྱས་སྨུག་པོའི་རྩིས།། འགྲམ་པར་སྣུམ་མཛད་མགོན་པོ་གང་དེ་ཡི།། རྟོགས་བརྗོད་དེ་བྱུང་རིག་པའི་གསང་ལ་གཞལ།། དུས་གསུམ་རྒྱལ་བ་ཀུན་གྱི་སྤྱི་གཟུགས་ཉིད།། རིགས་བརྒྱའི་ཁྱབ་བདག་འཁོར་ལོའི་ངོ་བོ་རུ།། གདོད་ནས་མངོན་སངས་རྒྱས་ཀྱང་གདུལ་བྱའི་སླད།། གསང་ཆེན་སྤྲུལ་པའི་རྣལ་འབྱོར་ཆེན་པོ་ཞིག ། བསིལ་ལྡན་གངས་རིས་བསྐོར་བའི་ཤར་གྱི་ཕྱོགས།། རྨད་བྱུང་མདོ་ཁམས་འཛིན་མའི་དཔལ་གྱི་མཆོག ། ...

སྨུག་པ་ལང་ལོང་གཡོ་བའི་གནམ་མཐའ་འདིར།། རུས་པའི་གསེབ་ལ་འབྲལ་ཁའི་དུང་བ་མཐུག།། འཁྲེང་སེམས་ཁམས་ན་མཇུག་མཐའི་མཆི་མ་འཁྲུག།   འགྱེལ་མ་ལང་གི་རྣམ་ཤེས་རྡིབ་ལ་ཁད།།   གདང་ལ་རི་བོའི་རྣམ་ཤེས་རྒྱང་ལ་ཤོར།། ས་སྲོད་མཚན་ལྗོངས་བུ་ཡུག་འཚུམ་མའི་ཁེངས།།  ལྷོ་སྤྲིན་བཤུམ་པའི་གདུང་བ་སེམས་ལ་འཇགས།། སྐེ་དཀྲིས་དམར་པོའི་སྨེ་གླུ་སེམས་ལ་འཁོར།།   འཁོར་རྩ་མ་རིག་སྲིད་པའི་མཚོ་ཆེན་ངོགས།།  ཟག་བཅས་ཚོར་བས་བསླུས་པའི་བུ་ང་འཁྲུལ།། ངེས་འབྱུང་ཕྱག་བརྒྱའི་མ་བཏབ་ཆགས་སྡང་རླུང་།།  སྒོ་གསུམ་ལས་ལ་ཞུགས་པའི་བུ་ང་སྐྱོ།།   མ་རིག་གཞན་དབང་སོང་བའི་འཆལ་པོ་ང་།།  ཞི་བྱེད་ཐར་བའི་ལམ་ལ་རྒྱང་དུ་གྱེས།།  ཆོས་རྣམས་མཐར་ཐུག་གཤིས་ལུགས་མ་རྟོགས་པར།།  ཐ་སྙད་ཚིག་ཤག་གསེབ་ནས་མགོ་འཁོར་བྱུང་།།    རང་ཉིད་གཅེས་འཛིན་བྱས་པའི་གྲུབ་དོན་དེས།།  དགའ་སྐྱོའི་ཚོར་བ་ཤ་རུས་གསེབ་ནས་ལུད།། དོན་དམ་ངེས་པའི་ཐབས་ཚུལ་མ་ཤེས་སོང་།། ཀུན་རྫོབ་ཁམས་ན་མགོ་བོ་གདུགས་ལྟར་འཁོར།།    སེམས་ཀྱི་ག་བུར་འཁོར་བའི་འདབས་སུ་འཕྱན།།  གཡར་པོ་ལུས་འདི་ཆོས་མིན་གནས་སུ་བྲེལ།།  ལོངས་སྤྱོད་བྲལ་བའི་གྲོང་གི་འཆལ་པོ་ང་།།  སྨྱོན་པའི་བརྟུལ་ཞུགས་སྤྱོད་པའི་ངང་ཚུལ་སྐྱོ།། ...

རྩོད་ལྡན་ཚེ་ལོ་བརྒྱ་པའི་རྣམ་འདྲེན་པ།། ཀུན་ལས་རྣམ་པར་རྒྱལ་བའི་སངས་རྒྱས་ཉིད།། ༸རྒྱལ་བ་སྟོན་པ་གཤེན་རབ་མི་བོ་རྗེ།། སྒོ་གསུམ་དྭངས་བར་འདྲེན་པས་གུས་ཕྱག་འཚལ།། ཐོག་མའི་བོན་གཞུང་དྲི་མེད་ལུང་རིགས་ལས།། ལྟ་བ་བཀའ་རྟགས་ཕྱག་རྒྱ་བཞི་པོ་དེ།། མགྲིན་པའི་དབྱངས་ནས་ཁས་ལེན་གདོད་ནས་འདོད།། ཡིན་ཡང་གྲུབ་མཐའ་བཞི་དང་ཐེག་པ་གསུམ།། ཡོད་པའི་ཐ་སྙད་བོན་ངོར་གྲུབ་པར་མེད།། ཐེག་པའི་དོན་གསལ་ཐབས་ཤེས་ཟུང་གི་འདོད།། བོན་པའི་གྲུབ་མཐའ་ཤེས་རབ་རིམ་པ་དགུ། རང་ངོར་རང་གིས་མཐར་གྲུབ་ཡོད་པ་ཞེས།། བོན་གྱི་གྲུབ་མཐའི་ཐ་སྙད་གདོད་ནས་འདོད།། གྲུབ་པའི་དོན་ལ་དགུ་རུ་སྨྲ་བ་ལས།། བཞི་རུ་ཡོད་པ་འདོད་པ་བོན་ལུགས་མེད།། གཡུང་དྲུང་བོན་གཞུང་གྲུབ་མཐའི་བཞེད་ངོར་ལ།། ཐེག་དགུ་འཇོག་ལུགས་མི་འདྲ་རྣམ་གསུམ་ཡོད།། ལྷོ་གཏེར་དབུས་གཏེར་བྱང་གཏེར་ལུགས་གསུམ་ལས།། དང་པོ་ལྷོ་གཏེར་ལུགས་ཀྱི་ཐེག་དགུ་ནི།། མུ་ཆོའི་ཐེག་པ་རིམ་དགུ་ཞེས་པ་དང་།། བྱང་སེམས་གབ་དང་གསང་སྔགས་མ་རྒྱུད་དང་།། གཤེན་ལུགས་མདོ་ལུགས་དྲི་མེད་གཟི་བརྗིད་དང་།། གསས་མཁར་སྤྱི་སྤུངས་རྣམ་དག་པདྨ་ཀློང་།། ཀུན་ཁྱབ་རྩ་བའི་དཀྱིལ་འཁོར་ཐེག་དགུ་ཞེས།། ཕྱྭ་གཤེན་སྣང་གཤེན་འཕྲུལ་གཤེན་སྲིད་གཤེན་དང་།། དགེ་བསྙེན་དྲང་སྲོང་ཨ་དཀར་ཡེ་གཤེན་དང་།། བླ་མེད་ཐེག་པ་རིམ་དགུ་བོན་ལུགས་འདོད།། དང་པོ་གཉིས་པ་གསུམ་པ་བཞི་པ་འདི།། བོན་ལུགས་རྒྱུ་ཡི་ཐེག་པ་ཡིན་པར་བཞེད།། དེ་བཞིན་དང་པོ་གཉིས་ལ་འཇིག་རྟེན་གྱིས།། ...

འཛམ་གླིང་གསེར་གྱི་ཉི་མ། ། གཞན་གླིང་ཕྱོགས་ལ་ཤར་ཡང༌། ། མུན་བསལ་འོད་ཀྱི་ཕུང་པོ། ། མཐོ་སྒང་ལྗོངས་ལ་འཆར་ཡོད། ། གངས་ཅན་བོད་རིགས་སྤུན་ཟླ། ། རྒྱུས་མེད་གཞན་ཡུལ་འགྲིམས་ཀྱང༌། ། མི་འགྱུར་སེམས་ཀྱི་འདུན་པ། ། རང་ཡུལ་ཕྱོགས་ལ་འཁོར་ཡོད། ། བསིལ་ཟེར་ཟླ་བ་དཀར་ཆུང༌། ། ནུབ་རིར་དབང་མེད་བརྒལ་ཀྱང༌། ། མཁའ་དབྱིངས་སྐར་ཚོགས་གདུང་བ། ། མ་བརྗེད་ཡིད་དུ་བཅངས་ཡོད། ། གངས་ཅན་སྐྱབས་མགོན་ཆེན་པོ། །  ནུབ་གླིང་ཆིབས་ཞབས་བསྒྱུར་ཀྱང༌། ། སྙིང་རྗེའི་ཐུགས་ཀྱི་བརྩེ་བས། །  ...

འབྲོང་གཡག་དར་མའི་དཔྲལ་བ་འདྲ་ཞིང་རབ་ཏུ་ཡངས་པས་ཀླད་རྒྱ་ཆེ།།  སྐྲ་ལོ་རོག་པོ་གྱེན་དུ་ཤད་པས་གཏུགས་ན་ཕྱིར་ནུད་མེད་པར་མཚོན།།  ཤངས་ཀྱི་དཀྱུས་ནི་ཅུང་ཟད་ལེབ་ཅིང་གདང་ལྷ་རི་བོའི་རྒྱུད་དང་འདྲ།།  གཡག་ཀོ་རློན་པ་གྲི་ཡིས་བཅད་ལྟར་མཆུ་ཏོས་ཅི་ཡང་བཤད་པར་ཕོད།།    ཁྱོད་དང་ང་གཉིས་རིཊ་རྒྱུད་གཅིག་ལས་ཤ་ཁྲག་འདྲེས་པའི་གཉེན་ཉེ་མིན།།  ཁབ་སྐུད་ཙམ་གྱིས་འབྲེལ་བ་མེད་ཀྱང་དར་ན་དགའ་ཞིང་རྒུད་ན་སྡུག།།  ཁྱོད་ཀྱི་གཏམ་བཤད་ཞིབ་ཏུ་ཉན་པས་གནས་ལུཊ་རྡར་བའི་བློ་ཁོག་མཐོང་།།  སྐབས་རེར་བྱིས་པའི་རོལ་རྩེད་དགའ་བས་གྲོགས་ཀྱི་དྭངས་མ་སྒྲིག་སྙིང་འདོད།།   ནང་བསྟན་གཙབ་ཧྲལ་དགུ་ལ་གཏོར་ཡང་ཐུབ་ཕུན་ཟླ་ཕོགས་དམའ་རྒྱུ་མེད།།  བོད་པ་ལྐུགས་པ་ལུག་ལྟར་གྱུར་ཡང་ཐུབ་ཕུན་མཁས་པར་གྱུར་ཚར་ཡོད།།  བོད་སྐད་འཇིག་རྟེན་འདི་ནས་ཤི་ཡང་ཐུབ་ཕུན་རྒྱ་སྐད་ཁྲག་ཁྲག་རེད།།  སྤྲུལ་སྐུས་མནའ་མ་སྟོང་ཕྲག་བླངས་ཀྱང་ཐུབ་ཕུན་རྒན་མོ་ཤོར་དོགས་མེད།།    ཤ་ཚའི་ཁ་ལ་གཏམ་སྙན་མེད་པའི་དཔེ་འདིའི་དོན་དག་མ་རྟོགས་པ།།  པཎ་ཆེན་བླ་མ་ཤ་ཚ་ཆེ་བས་ཚོང་དཔོན་རྒྱགས་པའི་གྲལ་དུ་ལྷུངས།།  དགེ་ཆོས་མཁས་པ་སྤྱི་ཇུས་བསམ་ཏེ་གཏམ་སྙན་མེད་པས་སྨྱོན་པར་བརྩིས།། ས་པཎ་ལུང་ཤར་ལྷག་བསམ་ཅན་ཚོགས་ཐམས་ཅད་ཐུབ་ཕུན་ཤ་ཉེ་ཡིན།།    རལ་གྲི་ལ་སོགས་མཚོན་ཆ་སྣ་ཚོགས་བསྟན་དགྲ་འཇོམས་བྱེད་ལག་ན་མེད།།  ཞེ་སྡང་དྲག་པོས་བསྟན་པ་སྲུང་བའི་ཁྲོས་པའི་ཁ་གདང་མིག་མ་བགྲད།།  འཕྱར་བ་ཙམ་གྱིས་ཐལ་རྡུལ་རློག་པའི་འུད་གཏམ་སྙན་མོ་མེད་ན་ཡང་།།   མི་མངོན་དབྱིངས་ལ་བཞུགས་པ་མ་ཡིན་ཤ་ཁྲག་གྲུབ་པའི་བསྟན་སྲུང་ཞིག།།   མ་ཐུབ་དགྲ་ལ་ཐུག་པའི་ཚེ་ལ་འགའ་རེའི་མཐུ་རྩལ་དུས་མ་བབས།།  ཕྱི་དགྲ་ནང་དགྲ་ནམ་ཞིག་བྱུང་རུང་ཁྱོད་ནི་དུས་ལ་བབ་བབ་རེད།།  ལག་ན་རལ་གྲི་སྙིང་ཁྲག་མི་དགོས་ཁ་པར་ཞིག་དང་སྨྱུ་གུས་འཐུས།།  མཐོ་དང་དམན་གྱི་ས་མཚམས་མི་གདའ་སུ་ཡིས་ནོར་ན་དེ་ལ་རྒོལ།།  ...

(སྔ་དུམ།)         ཡབ་ཟས་གཙང་མ་ཡི་མིག་གི་འབྲས་བུ།། ཡུམ་སྒྱུ་འཕྲུལ་མ་ཡི་ལུས་ཀྱི་དྲོད་ཁོལ།། གྲོགས་ས་འཚོ་མ་ཡི་སྙིང་རྡོག་ཆུང་ཆུང་།། སྲས་རྒྱལ་བུ་དོན་གྲུབ་ཁྱེད་རང་ཡིན་ཨ།།   སྐུ་ཕུང་པོ་ལུམ་བིའི་གནས་སུ་འཁྲུངས་ཤིང་།། རྩལ་ལུས་སྟོབས་སེར་སྐྱའི་གྲོང་ནས་རྒྱས་ཏེ།། ཞབས་སྲ་མོས་ཕྱོགས་ཀྱི་ས་ཆེན་བསྐོར་བའི།། བུ་འགྲན་མེད་དཔའ་བོ་ཤཱཀྱ་ཐུབ་པ།།   དྲིན་མ་ལོའི་ནུ་འོ་མ་རག་གོང་ནས།། ཡུམ་སྒྱུ་འཕྲུལ་མི་ཡུལ་འདི་ནས་ཕེབས་ཏེ།། གནས་འཁོར་བའི་གྲོང་དུ་དྭ་བུ་ལྷག་དུས།། སེམས་བསམ་པའི་གཏིང་ནས་སྐྱོ་ཤས་ཨེ་བྱུང་།།   བྱ་ངང་པའི་ཚེ་སྲོག་བདེན་པས་བསྐྱབས་ཤིང་།། གཅེན་ལྷས་བྱིན་ངོ་ཚས་ཕམ་པར་མཛད་དེ།། ཡུལ་ཚོམས་ཆེན་ཕོ་བྲང་སྐྱེ་དགུ་མཐའ་དག།། ངོ་མཚར་བའི་གནས་ལ་བཀོད་པ་ཡག་བྱུང་།།   ཕྱིའི་དཔལ་ཡོན་བཞད་པའི་མེ་ཏོག་གླིང་དུ།། གཟུགས་སྐྱེ་ལོ་ཡག་པའི་མཛེས་མ་དཔལ་མེས།། ཕྱག་མཉེན་མོས་རྒྱུད་དྲུག་པི་ཝང་དཀྲོལ་ཞོར།། སེམས་སྙིང་གཏམ་གླེང་དུས་ཅི་འདྲ་འདུག་གམ།།   ...