དེ་ཡང་༧གོང་ས་མཆོག་གིས་ཡང་ནས་ཡང་དུ་རྒྱ་གར་ནི་གནའ་བོའི་ནང་སེམས་ཀྱི་བྱམས་སྙིང་རྗེ་དང་འབྲེལ་བའི་རིག་གཞུང་གིས་ཕྱུག་པའི་རྒྱལ་ཁབ་ཅིག་ཡིན་པ་དང་། རྒྱ་གར་རིག་གཞུང་གི་ཁྱབ་ཁོངས་སུ་ཡོད་པའི་ཞི་བ་དང་སྙིང་རྗེའི་ཉམས་ལེན་ནི་འཛམ་གླིང་ཡོངས་ལ་ཤུགས་རྐྱེན་ཐེབས་པའི་ནང་བསམ་བློའི་རིག་གཞུང་ཕུལ་དུ་བྱུང་བ་ཞིག་ཡིན་པར་མ་ཟད། སྟོན་པ་སངས་རྒྱས་ནས་བདག་ཉིད་ཆེན་པོ་གྷན་དྷི་ཡི་བར་གྱི་སྐྱེས་བུ་རླབས་ཆེན་མང་པོ་ཞིག་གིས་སྤྱི་ཚོགས་དང་སྒེར་གྱི་འཚོ་བ་གཉིས་ཆར་གྱི་ཁྱབ་ཁོངས་སུ་ལྟ་གྲུབ་འདི་ཉམས་ལེན་བྱས་ནས་འཛམ་གླིང་གི་ཞི་བདེ་དང་མིའི་རིགས་ཀྱི་ནང་སེམས་ཀྱི་བདེ་སྐྱིད་ཀྱི་འཚོ་བར་ཞབས་འདེགས་ཆེན་པོ་ཞུས་པ་ཞིག་ཏུ་ངོས་འཛིན་གནང་ཡོད།
ད་དུང་སངས་རྒྱས་ཀྱི་གསུང་གི་སྙིང་པོ་སྟེ། མགོན་པོ་ཀླུ་སྒྲུབ་ཀྱིས་གཙོ་ཆེར་གཏན་ལ་ཕབ་པའི་རྟེན་འབྱུང་གི་ལྟ་གྲུབ་དང་འཚེ་བ་མེད་པའི་སྤྱོད་པ། དཔལ་ནཱ་ལེན་དྲའི་མཁས་པའི་རིགས་པས་གཏན་ལ་ཕབ་པའི་གཏིང་ཟབ་པའི་རྩོད་སྒྲུབ་དང་འབྲེལ་བའི་གཞུང་ལུགས། གྲུབ་པའི་སློབ་དཔོན་ཆེན་པོ་རྣམས་ཀྱིས་ཉམས་ལེན་གྱིས་གཏན་ལ་ཕབ་པའི་སྒོམ་སྒྲུབ་དང་འབྲེལ་བའི་ནང་སེམས་ཀྱི་གནས་ལུགས་ཀྱི་རྙེད་དོན་སོགས་ཀྱིས་གྲུབ་པའི་ནང་ཆོས་ཀྱི་གྲུབ་ཆ་མང་པོ་ཞིག་ནི་ཆོས་ལུགས་དད་མོས་བྱེ་བྲག་པའི་ཁྱབ་ཁོངས་ལས་བརྒལ་ཡོད་པར་མ་ཟད། ཡོངས་ཁྱབ་ཀྱི་བདེན་དོན་ཆེན་པོ་ཡོད་པའི་མཚན་ཉིད་རིག་པ་དང་དངོས་པོའི་གནས་ལུགས་ལ་འཚོལ་སྙེག་བྱེད་པའི་ལྟ་གྲུབ་ཀྱི་གཞུང་ལུགས་ཤིག་དང་། འགྲོ་བ་མིའི་ཡ་རབས་བཟང་སྤྱོད་དང་མ་བྲལ་བའི་འཚོ་བའི་གསོས་སྨན་གལ་ཆེན་ཞིག་ཡིན་པའི་ངོས་འཛིན་གྱི་ཐོག་ནས་རིག་གཞུང་འདིའི་ཆ་ཤས་མང་པོ་ཞིག་འཛམ་གླིང་སྤྱི་དང་མཉམ་སྤྱོད་ཐུབ་པ་ཞིག་ཡིན་པའི་དགོངས་པར་འཁོར་ཡོད་པ་དང་། དེ་ཡང་རྒྱ་གར་ནི་ཆེས་ཐོག་མར་དགོངས་གཞི་འདི་ངོ་སྤྲོད་བྱ་ཡུལ་འོས་ཤོས་སུ་གཟིགས་ཡོད་ལ། མ་ཟད་རིག་གཞུང་ཁྱད་པར་ཅན་འདིའི་མགོ་ཁུངས་ཡིན་པའི་ཆ་ནས་རྒྱ་གར་ལ་རིག་གཞུང་འདིར་བདག་པོ་རྒྱག་རྒྱུའི་དམིགས་བསལ་གྱི་འོས་འགན་ཡོད་པའང་ཐུགས་ལ་འཁྲུངས་ཡོད།
