ཡིན་ནའང་། ཕྱོགས་གཞན་ཞིག་ནས་༧གོང་ས་མཆོག་གི་ངོས་ནས་ནང་ཆོས་འདི་ཉིད་སྲོལ་རྒྱུན་རིག་གནས་དང་ལྟ་གྲུབ་ཀྱི་ངོས་ནས་རྒྱ་གར་མི་མང་ལ་མཚམས་སྦྱོར་གནང་རྒྱུ་ནི་སྐུ་སྒེར་གྱི་ངོས་ནས་བཤད་ན་ཡང་། དམིགས་བསལ་གྱི་འགན་འཁྲི་ཞིག་ཡིན་པའི་དགོངས་པ་བཞེས་བཞིན་ཡོད་ལ། འདི་ནི་རྒྱ་གར་མི་མང་ལ་གཞུང་གི་ནོར་བུ་ཞིག་བདག་པོ་ལ་རྩིས་སྤྲོད་ཞུ་བ་ལྟ་བུ་ཞིག་ཏུ་གཟིགས་ཀྱིན་ཡོད།
༧གོང་ས་མཆོག་གིས་རང་ཉིད་ཀྱི་ནང་སེམས་ཁམས་ཀྱི་འཚོ་བ་ཡོད་ཚད་རྒྱ་གར་གྱི་གནའ་བོའི་རིག་གཞུང་དང་བདག་ཉིད་ཆེན་པོ་གྷན་དྷིའི་འཚེ་མེད་ཞི་བའི་ལྟ་གྲུབ་ཀྱི་བློ་འབྱེད་སོགས་དང་ཁ་འབྲལ་ཐབས་མེད་པའི་ཆ་ནས་རང་ཉིད་རྒྱ་གར་གྱི་བུ་ཕྲུག་ལྟ་བུ་ཞིག་ཡིན་པར་ཞལ་གྱིས་བཞེས་ཡོད། དེ་དང་དེ་ལ་སོགས་པའི་རྒྱུ་མཚན་དང་རྒྱབ་ལྗོངས་ཧ་ཅང་མང་པོ་ཞིག་གི་ཐོག་ནས་ཁོང་གིས་ཐུགས་བསྐྱེད་དམ་བཅའ་བཞི་བ་དེ་ཉིད་དངོས་སུ་ཕྱག་ལེན་དུ་བསྟར་མགོ་ཚུགས་ཤིང་། ཁོང་གི་བཀའ་སློབ་དག་གིས་རྒྱ་གར་མི་མང་ལ་གནའ་བོའི་རྒྱ་གར་གྱི་ཤེས་རིག་གི་རིན་ཐང་དང་འབྲེལ་བའི་ནང་པའི་ཆོས་ཀྱི་ལྟ་གྲུབ་དང་ཉམས་ལེན་ལ་འཛིན་པའི་འདུ་ཤེས་ལ་འགྱུར་བ་བཏང་དང་གཏོང་བཞིན་ཡོད།
