ངོས་གཞན་ཞིག་ནས་བསམ་ན། དེ་ནི་སངས་རྒྱས་ཐུགས་རྗེ་ཅན་གྱི་རྗེས་སུ་འཇུག་མཁན་ཞིག་གི་ངོས་ནས་རང་ཉིད་གང་གི་རྗེས་སུ་ཞུགས་པའི་སྟོན་པ་བཀའ་དྲིན་ཅན་གྱི་གསུང་གི་མཛོད་མཐར་ཐུག་པ་དེ་ཉིད་ལས་ཅན་གྱི་ཕན་བདེའི་དཔལ་དུ་ཡུན་གནས་ཡོང་བའི་ཆེད་དུ་གནང་བའི་འབད་བརྩོན་གནང་བ་ཞིག་ཡིན་ཀྱང་ཆོག་མོད། དེ་ཡང་ངེས་པར་དུ་ཆོས་ལུགས་བྱེ་བྲག་པ་ཞིག་གི་སྐྱབས་འོག་ཏུ་འགྲོ་དགོས་པའི་སྔོན་འགྲོའི་ཆ་རྐྱེན་གྱི་འོག་ནས་སྤེལ་བ་དེ་འདྲའི་རིགས་མ་རེད།
སྐབས་འགར་ང་ཚོས་སངས་རྒྱས་ཀྱི་གསུང་གི་བདུད་བརྩིས་སེམས་ཅན་གྱི་དོན་མཛད་པ་དེ་ཡང་། ལམ་རིམ་ཆེན་མོ་དང་དཔལ་སྤྲུལ་སྔོན་འགྲོ་ལྟ་བུའི་མགོ་སྐྱབས་འགྲོ་ནས་མཇུག་བསྔོ་བའི་བར་གྱི་མ་ལག་ཚང་བའི་སྲོལ་རྒྱུན་གྱི་སྒྲོམ་གཞི་ཉག་གཅིག་གི་འོག་ཏུ་འགྲོ་དགོས་ངེས་ཤིག་ནི་ཅིས་ཀྱང་མིན།
དེ་ཡང་སངས་རྒྱས་ཀྱིས་མདོ་སྡེ་ཟབ་མོ་དག་གི་ནང་དུ་ཡང་སངས་རྒྱས་དང་བྱང་ཆུབ་སེམས་དཔའ་རྣམས་འཇིག་རྟེན་གྱི་ཚངས་པ་དང་ཁྱབ་འཇུག་ལ་སོགས་པའི་ཚུལ་དུ་སྟོན་པ་ནས། ཕྱི་རོལ་པ་དང་སངས་རྒྱས་ཀྱི་བསྟན་པ་དངོས་སུ་མེད་པའི་ཡུལ་དུའང་དྲང་སྲོང་དང་བསམ་གཏན་གྲུབ་པ་སོགས་ཀྱི་ཚུལ་སྟོན་པའི་ཚུལ་མང་པོ་ཞིག་གསུངས་ཡོད་ཅིང་། སངས་རྒྱས་ཀྱི་བསྟན་པ་ནི་འགྲོ་བ་ལ་གནས་སྐབས་དང་མཐར་ཐུག་གི་ཕན་བདེ་བསྐྲུན་པའི་ལས་ཅན་ཁོ་ན་ཞིག་ཡིན་པའི་ངོས་ནས་ཀྱང་ཐབས་སྣ་ཚོགས་པའི་སྒོ་ནས་སངས་རྒྱས་ཀྱི་བསྟན་པ་འདི་གདུལ་བྱ་རྣམས་ཀྱི་མི་ཚེ་དང་འཚོ་བའི་གསོས་སྨན་དུ་ངོས་སྦྱོར་གནང་བ་འདི་རྒྱ་ཆེ་བའི་བྱང་ཆུབ་སེམས་དཔའི་ཐུགས་བསྐྱེད་དང་མཛད་པ་ཆེས་གལ་ཆེན་ཞིག་སྟེ། རྒྱུ་མཚན་དེས་ཀྱང་༧གོང་ས་མཆོག་གིས་རྒྱ་གར་མི་མང་ལ་ཆེད་དུ་དམིགས་ནས་ནང་ཆོས་དང་འབྲེལ་བའི་ལྟ་གྲུབ་དང་ཚད་མ་རིག་པ། སེམས་ཁམས་རིག་པ་དང་སྒོམ་སྒྲུབ། ཡ་རབས་བཟང་སྤྱོད་དང་ལེགས་བྱང་སོགས་དེང་རབས་ཀྱི་རིག་ཚན་བགར་སྟངས་ཀྱི་དབྱེ་སྒོ་དང་མཐུན་པའི་ཐོག་ནས་ངོ་སྤྲོད་གནང་བ་འདི་ཧ་ཅང་རླབས་ཆེན་གྱི་དགོངས་གཞི་ཞིག་རེད།
