རྒྱ་གར་འཕགས་པའི་ཡུལ་དུ་བདག་ཅག་གི་སྟོན་པ་ཐུགས་རྗེ་ཅན་མངོན་པར་རྫོགས་པ་སངས་རྒྱས་པའི་གནས་མཆོག་རྡོ་རྗེ་གདན་དུ་ྋགོང་ས་ྋསྐྱབས་མགོན་ྋརྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ཆིབས་སྒྱུར་སྐབས་རྒྱ་གར་ཁུལ་དུ་སྔ་རྗེས་འབྱོར་བའི་བོད་མི་སྡོད་སྒར་སོ་སོའི་སྤྱི་འཐུས་རྣམས་འདུ་འཛོམས་ཀྱིས་སྤྱི་མགྲིན་ནས་བརྟན་བཞུགས་༸ཞབས་བརྟན་བསྟར་འབུལ་དང་ཆབས་ཅིག་འབྱུང་འགྱུར་བོད་རིགས་རྣམས་མཐུན་ལམ་རྡོག་རྩ་གཅིག་བསྒྲིལ་གྱི་གན་རྒྱ་འབུལ་ལམ་ཞུས་པ་གཤམ་གསལ།
རབ་བྱུང་བཅུ་དྲུག་པའི་བོད་ས་ཕག་ཟླ་ ༡༢ ཚེས་༧ ལ། དཔལ་མྱུར་མཛད་ཡེ་ཤེས་ཀྱི་མགོན་པོ་ཕྱག་དྲུག་པ་དང་། དཔལ་ལྡན་དམག་ཟོར་གྱི་རྒྱལ་མོ་རེ་མ་ཏི། བསྟན་སྲུང་དམ་ཅན་རྒྱ་མཚོ་དཔང་དུ་བཙུགས། ཕན་བདེའི་འབྱུང་གནས་ལུགས་གཉིས་གོང་མ་ཁྲིམས་བདག་རིན་པོ་ཆེའི་༸ཞབས་དྲུང་དུ། །
བདག་མིང་རྟགས་ཁུངས་གཤམ་གསལ་རྣམས་བློ་ཡིད་གཅིག་ཏུ་མཐུན་པའི་རང་མོས་བློས་བླངས་ནམ་ཡང་འགྱུར་མེད་ཀྱི་གན་རྒྱ་མཐུ་མོ་ཆེ་གཙང་མར་འཇོག་སྙིང་། དོན་རྩ། འཇིག་རྟེན་ཡོངས་ལ་ཕན་བདེ་གང་ལས་བྱུང་བའི་རྩ་ལག་དམ་པ་སངས་རྒྱས་ཀྱི་བསྟན་པ་རིན་པོ་ཆེ་དར་རྒྱས་ཡུན་རིང་དུ་གནས་ཐུབ་པ་དང་། རང་ཅག་སྟོད་མངའ་རིས་སྐོར་གསུམ། བར་དབུས་གཙང་རུ་བཞི། སྨད་མདོ་ཁམས་སྒང་དྲུག ཨ་མདོ། མགུ་ལོག་བཅས་བོད་ཆོལ་ཁ་གསུམ་གྱི་མི་དམངས་ཡོངས་ལ་བདེ་སྐྱིད་ཀྱི་དཔལ་ཡོན་རྟག་ཏུ་བཞད་པའི་ཐབས་ཚུལ་ལ་གངས་ལྗོངས་རྒྱལ་བསྟན་ཆབ་སྲིད་ཡོངས་ཀྱི་བདག་པོ་ྋསྤྱི་ནོར་ྋགོང་ས་ྋསྐྱབས་མགོན་ཆེན་པོས་ཉིན་མཚན་དུས་དྲུག་ཏུ་ཐུགས་འཁུར་ཟབ་བཞེས་བཀའ་དྲིན་མུ་མཐའ་མེད་པ་བསྐྱངས་རུང་། རང་ཅག་བོད་རིགས་མི་མང་ཡོངས་ནས་ད་བར་མཐུན་ལམ་རྡོག་རྩ་གཅིག་ཏུ་བསྒྲིལ་བའི་འཁུར་བབས་སྲི་ཞུ་ལྷག་བསམ་རྣམ་དག་གཅིག་སྒྲུབ་མ་ཐུབ་པའི་ཉེར་ལེན་དང་། བསྟན་པ་སྤྱི་བགེགས་གཉིས་ཀའི་ངན་འབྲས་བཟློག་ཏུ་མེད་པ་རང་ས་དགྲ་ཡིས་ཧམ་བཟུངས་ཀྱིས་བོད་ཆོལ་ཁ་གསུམ་གྱི་ཁུངས་སུ་གཏོགས་ཚད་ཀྱི་མི་རྒྱུ་ཟོག་གསུམ་གང་ལའང་བལྟ་བཟོ་སྤུ་ཙམ་མེད་པ་ད་ཆ་བོད་མི་ཀུན་གྱི་ཡིད་ལ་བཟོད་པར་དཀའ་བའི་སྡུག་བསྔལ་གྱི་ཚོར་བ་དྲག་པོ་མྱོང་མུས་ཀྱང་། ད་དུང་གནས་སྐབས་རང་གི་བདེ་དོན་ཕྲ་མོར་ཞེན་པའི་འཁྲི་བ་མ་བཅད་པར། མཁྲེག་ཆོས་སུ་བཟུངས་ཏེ་བསྟན་པ་སྤྱི་དོན་ལ་རང་ཅག་བོད་རིགས་ཚང་མས་སྔར་མུས་ལྟར་སྤྱི་ཟོམ་ཡལ་ཡོམ་(ཡལ་ཡོལ)འབའ་ཞིག་གིས་དབང་དུ་མ་སོང་བར་སྤྱི་ནོར་ྋགོང་ས་༸སྐྱབས་མགོན་ཆེན་པོ་མཆོག་སྐུ་ངལ་ཁྱད་བསད་ཀྱི་(ཀྱིས)རྒྱ་གར་འཕགས་པའི་ཡུལ་དུ་ཆིབས་བསྒྱུར་བཀའ་དྲིན་ཆེ་སྟེ་བོད་ལྗོངས་ཆོལ་ཁ་གསུམ་གྱི་ཁྱོན་ལ་ཆོས་སྲིད་རང་དབང་བདེ་སྐྱིད་ཀྱི་རྫོགས་ལྡན་གསར་པའི་དགེ་མཚན་གསར་དུ་བཞད་ཐབས་ལ་སྐུའི་གསང་བ་གསུམ་གྱི་ཡོན་ཏན་མ་ལུས་པ་གཅིག་ཏུ་སྤུངས་ཏེ་མཐུ་སྟོབས་ནུས་པའི་རྣམ་འཕྲུལ་ནི་རང་ཅག་སོ་སྐྱེ་རྣམས་ཀྱི་བསམ་བརྗོད་ཀྱི་ཡུལ་ལས་འདས་པའི་མཐའ་ཡས་རྒྱ་ཆེའི་མཛད་འཕྲིན་འོད་སྟོང་འཛམ་གླིང་ཡངས་པའི་གོ་ལར་མངོན་པར་དུ་འཕགས་པ་འདི་ནི་འཛམ་གླིང་ནང་གི་སངས་རྒྱས་པའི་རིང་ལུགས་ལ་བཞུགས་པ་རྣམས་དང་སྒོས་སུ་རང་ཅག་ཁ་བ་རི་པའི་སྐྱེ་འགྲོ་ཡོངས་ལ་བསམ་གཞིགས་དད་པའི་སྤུ་ལོང་དབང་མེད་དུ་གཡོ་བའི་བཀའ་དྲིན་གྱི་ཚད་མཐའ་གཞལ་དུ་མེད་པ་དེ་ལྟ་བུའི་དུས་སྐབས་འདིར་རང་ཅག་བོད་རིགས་ཚང་མས་སྔར་བྱས་ལ་འགྱོད་བསྡོམས་དྲག་པོ་དང་། ཕྱིས་ཀྱི་འཁུར་བབས་ཞུ་བྱའི་ཐད་ྋགོང་ས་ྋསྐྱབས་མགོན་ཐམས་ཅད་མཁྱེན་གཟིགས་ཆེན་པོའི་དགོངས་གཞི་ཟབ་མོ་དང་མཐུན་པའི་བོད་རིགས་ནང་ཁུལ་རང་རང་མིང་གི་རྗེས་སུ་རྙེགས་པའི་ཕྱོགས་འཐེན་ཕྲག་དོག་རྣམས་ཞེ་ནས་སྤངས་ཏེ་མཐུན་བསྒྲིལ་རྡོག་རྩ་གཅིག་བསྒྲིལ་ལྕགས་ཀྱི་གོང་བུ་བཞིན་བྱེད་རྒྱུ་དང་།
