མིའི་ཡོན་ཏན་གོང་སྤེལ་གྱི་ཐུགས་བསྐྱེད་སྐོར་ལ་གླེང་བ། 

སྙིགས་དུས་ཀྱི་སྟོན་པ་༧སྤྱི་ནོར་༧གོང་ས་༧རྒྱལ་དབང་སྐུ་ཕྲེང་བཅུ་བཞི་པ་མཆོག་གི་དགོངས་གཞིའམ་ཐུགས་བསྐྱེད་དམ་བཅའ་གཙོ་བོ་གསུམ་གྱི་ནང་ནས་དང་པོ་འགྲོ་བ་མིའི་ཡོན་ཏན་གོང་སྤེལ་གྱི་ཐུགས་བསྐྱེད་སྐོར་ལ་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་བཀའ་སློབ་ལས། “ངོས་རང་མི་ཞིག་ཡིན་པའི་ཆ་ནས་གཙོ་བོ་ནང་སེམས་ཀྱི་བདེ་སྐྱིད་གལ་ཆེ་བ་དང་། ནང་སེམས་ཀྱི་བདེ་སྐྱིད་དེ་ཡང་ཆོས་དད་ཡོད་ཀྱང་རུང་མེད་ཀྱང་རུང་། གང་ལྟར། ང་རང་ཚོ་ཆུང་བའི་སྐབས་ནས་ཕ་མས་ཇི་ཙམ་གྱིས་བརྩེ་བས་བསྐྱངས་པའི་ཚོད་ཀྱིས་སེམས་པ་དགའ་སྣང་དང་། སྐྱིད་སྣང་ཡོང་གིན་ཡོད་པར་བརྟེན། བྱམས་བརྩེ་ནི་རང་ཆས་སུ་ཡོད་པ་ཞིག་ཡིན་ལ། བར་སྐབས་ཞིག་ནས་ཚན་རིག་པ་ཚོས་ཀྱང་ཚན་རིག་གིས་ཞིབ་འཇུག་གམ་བརྟག་དཔྱད་བྱེད་དུས་བྱམས་བརྩེ་ཞེས་པ་དེ་ལུས་བདེ་བ་དང་། ཁྱིམ་ཚང་སྐྱིད་པ། སྤྱི་ཚོགས་ལ་ཕན་ཐོགས་ཡོང་བ་ཞིག་ཏུ་ཤོད་ཀྱི་འདུག དེར་བརྟེན། མི་ཞིག་ཡིན་ཕྱིན་མིའི་རྣམ་དཔྱོད་ཀྱི་ནུས་པའི་ཐོག་ནས་སེམས་ཀྱི་ཞི་བདེ་བསྒྲུབ་རྒྱུ་དེ་ངོས་ཀྱིས་རིམ་པ་དང་པོ་དེར་རྩི་གིན་ཡོད།” ཅེས་གསུངས་ཡོད། དེ་བཞིན་དུ་༧གོང་ས་རྒྱལ་དབང་མཆོག་གིས་མཛད་པའི་<<ཕྱི་ཡུལ་དུ་རང་དབང་>>ལས། “དོན་དམ་པའི་བདེ་སྐྱིད་ནི་སེམས་རྒྱུད་ཀྱི་ཞི་བ་དང་། འདོད་ཆུང་ཆོག་ཤེས་ནས་འཐོབ་ཀྱི་ཡོད་པའི་ཐོག དེ་རྣམས་ནི་གཞན་ཕན་ལྷག་བསམ་དང་། བྱམས་པ། བརྩེ་བ་སྒོམ་པ་དང་། ཁོང་ཁྲོ་དང་། རང་གཅེས་འཛིན། འདོད་རྔམས་སོགས་སྤངས་པ་ལ་བརྟེན་ནས་ཐོབ་པ་རེད།” ཅེས་གསུངས་ཡོད།