སྨུག་པ་ལང་ལོང་གཡོ་བའི་གནམ་མཐའ་འདིར།།
རུས་པའི་གསེབ་ལ་འབྲལ་ཁའི་དུང་བ་མཐུག།།
འཁྲེང་སེམས་ཁམས་ན་མཇུག་མཐའི་མཆི་མ་འཁྲུག།
འགྱེལ་མ་ལང་གི་རྣམ་ཤེས་རྡིབ་ལ་ཁད།།
གདང་ལ་རི་བོའི་རྣམ་ཤེས་རྒྱང་ལ་ཤོར།།
ས་སྲོད་མཚན་ལྗོངས་བུ་ཡུག་འཚུམ་མའི་ཁེངས།།
ལྷོ་སྤྲིན་བཤུམ་པའི་གདུང་བ་སེམས་ལ་འཇགས།།
སྐེ་དཀྲིས་དམར་པོའི་སྨེ་གླུ་སེམས་ལ་འཁོར།།
འཁོར་རྩ་མ་རིག་སྲིད་པའི་མཚོ་ཆེན་ངོགས།།
ཟག་བཅས་ཚོར་བས་བསླུས་པའི་བུ་ང་འཁྲུལ།།
ངེས་འབྱུང་ཕྱག་བརྒྱའི་མ་བཏབ་ཆགས་སྡང་རླུང་།།
སྒོ་གསུམ་ལས་ལ་ཞུགས་པའི་བུ་ང་སྐྱོ།།
མ་རིག་གཞན་དབང་སོང་བའི་འཆལ་པོ་ང་།།
ཞི་བྱེད་ཐར་བའི་ལམ་ལ་རྒྱང་དུ་གྱེས།།
ཆོས་རྣམས་མཐར་ཐུག་གཤིས་ལུགས་མ་རྟོགས་པར།།
ཐ་སྙད་ཚིག་ཤག་གསེབ་ནས་མགོ་འཁོར་བྱུང་།།
རང་ཉིད་གཅེས་འཛིན་བྱས་པའི་གྲུབ་དོན་དེས།།
དགའ་སྐྱོའི་ཚོར་བ་ཤ་རུས་གསེབ་ནས་ལུད།།
དོན་དམ་ངེས་པའི་ཐབས་ཚུལ་མ་ཤེས་སོང་།།
ཀུན་རྫོབ་ཁམས་ན་མགོ་བོ་གདུགས་ལྟར་འཁོར།།
སེམས་ཀྱི་ག་བུར་འཁོར་བའི་འདབས་སུ་འཕྱན།།
གཡར་པོ་ལུས་འདི་ཆོས་མིན་གནས་སུ་བྲེལ།།
ལོངས་སྤྱོད་བྲལ་བའི་གྲོང་གི་འཆལ་པོ་ང་།།
སྨྱོན་པའི་བརྟུལ་ཞུགས་སྤྱོད་པའི་ངང་ཚུལ་སྐྱོ།།
རྙེད་དཀའི་དལ་འབྱོར་འཁོར་བའི་གྲོང་ན་འགྲུལ།།
ཞི་བའི་ཐར་ལམ་མི་དགེའི་ལམ་ལ་བསྒྱུར།།
དབུགས་ཀྱི་རྒྱུ་བ་ཟིང་ཟིང་འུར་ལ་བརྗེས།།
རེ་དོགས་སྒྱུ་མའི་ཁམས་འདིར་ཐིམ་ལ་ལྟོས།།
འདོད་གདུང་རྔུལ་ཆུའི་རི་མོ་སེམས་ལ་རྔམ།།
རི་དྭགས་རྨས་མ་བཞིན་དུ་ད་བུར་ལུས།།
ད་ནི་མི་ཚེ་འདི་ལྟར་རྫོགས་སོང་ན།།
སྲོག་གི་རྒྱུ་བ་གནས་རུང་དོན་དགོས་ཆུང་།།
བཏགས་པའི་ཆོས་དེ་སེམས་ལ་མཐུན་ན་ཡང་།།
ངེས་འབྱུང་ཕོ་ཉའི་མེ་ཏོག་རྒྱང་ནས་འཐོར།།
མན་ངག་ཟབ་མོའི་རང་སེམས་མ་འདུལ་བར།།
དད་པའི་འདུན་པ་རིང་མོ་བོར་དེ་སོང་།།
མི་ཡུལ་ཁམས་ན་དུང་བའི་བརྩེ་བ་བསྡེབས།།
བསམ་པའི་རྩིག་སྡེབས་དྲན་གདུང་ཁྲོད་ན་འཚེར།།
ལྷད་མེད་འཚོལ་སྙེགས་རྟོག་ལྗོངས་ཁམས་ན་བཞེངས།།
བདག་གི་ལུས་ཁམས་སྟོང་པའི་ཀློང་ན་བརྗིད།།
ཕ་མཐའ་བྲལ་བའི་སེམས་ཚོར་སྨུག་པར་འཁྱུད།།
མ་བཅོས་བརྩེ་གླུ་གངྒའི་ཀློང་ལ་སྤར།།
དྲི་བསུང་འཐུལ་བའི་བུང་བའི་དགའ་ཚལ་ན།།
ཚོར་བའི་རླབས་ཕྲེང་སྙིང་ཁམས་གཏིང་ན་འཕྱུར།།
འཛུམ་མདངས་སེམས་པར་ཉེ་བའི་ཚེ་སྲོག་ཁམས།།
མིག་ཆུའི་སྨུག་པ་ལྷིང་འཇགས་ཞིང་ལ་འཁྲིས།།
མྱ་ངན་ཁེངས་པའི་བྱེ་མའི་སྒང་གཤོགས་ན།།
སྟོང་གཟུགས་གྲིབ་མའི་རེ་བ་སེམས་ལ་བརྩེགས།།
ལམ་སྣེ་གྲངས་མེད་བརྩེགས་པའི་ཕ་རོལ་ན།།
འཁྱམ་ཉུལ་མང་བའི་ཉིན་མོ་མཚན་ངོགས་གསལ།།
རྡོག་སྒྲའི་དུས་ཚོད་ས་གཞིའི་ཁམས་སུ་བྲིས།།
ཟུངས་ཁྲག་ཕྲ་མོ་གཙང་བོའི་གཞུང་ན་རྩེན།།
བསིལ་གྲིབ་སྡུག་པོ་སྒེའུ་ཁུང་གདོང་ལ་ལྷུང་།།
དལ་འཇམ་ཤུགས་གླུ་རྣ་བའི་མགྲོན་དུ་ཆས།།
མེ་ཏོག་འདབ་མ་བདག་གི་པང་ཁར་ཟགས།།
ལྡུམ་རའི་བརྩེ་བ་སླར་ཡང་གཞན་དུ་བསྡུས།།
བསམ་གཞིག་ཤིང་ལོ་ལྷོ་མོན་ཕྱོགས་སུ་འཕུར།།
ལྷིང་འཇགས་དཀྲོགས་པའི་ལྗོན་རྩེའི་བྱིས་ཆུང་སྐྱོ།།
འབྲུག་ལོའི་སྤྱན་ཆབ་ག་ལའི་གཞོང་ལ་འཐོར།།
སེམས་ཀྱི་ཕམ་ཁ་བྱེ་ཐང་ངོས་ལ་ལྡག །
གྱེས་གདུང་ཕྱིར་མིག་ཁྲོད་ཀྱི་མཚན་ལྗོངས་ན།།
རང་སེམས་མེ་རི་འབར་བའི་སེམས་ཁྲལ་འཚུབ།།
མཚོ་ཁའི་བྱིས་ཆུང་ལག་པའི་གནམ་ལ་བཀྱགས།།
མཚོ་མཐའི་རེ་བ་བདག་གི་སེམས་ལ་འཇགས།།
བསམ་གཞིག་སྦྲང་ཆུང་འཕུར་བའི་ཤུལ་རྗེས་ན།།
རྩྭ་ལོས་ཁེབས་པའི་མེ་ཏོག་སྙིང་ལ་རྗེ།།
འདོད་སྲིད་འཚང་ཁ་བསྡེབས་པའི་ཤུལ་ལམ་ན།།
ཁེར་རྐྱང་སྤྲང་པོའི་མི་ཚེ་གཟིམས་ལ་ལྟོས།།
གདུང་བའི་དབྱངས་རྟ་སྙིང་ཁམས་ཀློང་ན་གདུས།།
བརྩེ་བའི་མཐོངས་ཀ་ཐོལ་གྱིས་གཤགས་འདི་སྐྱོ།།
མི་མངོན་དབྱིངས་ན་གདུང་བའི་གཟུགས་ཕུང་བཞེངས།།
ལས་དབང་ལས་ཀྱི་བསྐོས་པ་འདི་ལྟར་ཡིན།།
སྨྱུག་པའི་ཡལ་གས་བསིལ་རླུང་ཧོབ་སེ་འཐག།།
ལག་པའི་གདུབ་ཆུང་ས་ལ་ཤོར་འདི་ཐལ།།
སེམས་ཀྱི་རེ་བ་སླར་ཡང་རྨས་མ་བྱས།།
གདུང་བའི་ཁམས་ལ་སྐྱོ་བའི་ཤུགས་རིང་རྔམ།།
ཁེར་རྐྱང་གྲོང་ལམ་ཉུལ་བའི་དྲེད་པོ་ང་།།
གྲིབ་མ་ནག་རིལ་ལྷན་དུ་ངེས་མེད་ལྡོམ།།
སེམས་དང་ལྷན་དུ་གནས་པའི་གདུང་བ་དེས།།
མི་ཚེའི་གསང་བ་རྡོལ་བའི་དམ་ཚིག་ཅིག།།
ཞོགས་པའི་ཉི་ཟེར་མཐོན་པོའི་རི་ལ་འཁྱུད།།
ནམ་མཁའི་ཁམས་ལ་དྭངས་བའི་འཇའ་རིས་བཀྲ།།
ས་གཞིའི་གདོང་ལ་ཧ་ལོའི་མེ་ཏོག་འཛུམ།།
བདག་སེམས་ཁམས་ལ་ཚོར་འདུས་སྤྲིན་ཆེན་འཁྲིགས།།
བརྐོས་པའི་ལོ་རྒྱུས་མི་ཡུལ་ཁམས་ལ་བཞག །
སེམས་ཀྱི་རྟོག་ལྗོངས་རི་བོའི་རྩེ་ལ་བཀོད།།
ཆུ་མོའི་གཞུང་ལ་རྐང་རྗེས་ནར་མོ་འཐེན།།
མུན་གསེབ་ཁྲོད་ནས་གདུང་བའི་ཕོ་ཉར་གཏང་།།
དུབ་པའི་ལོ་ཟླ་རྒྱ་མཚོའི་རླབས་དང་མཚུངས།།
ངལ་ཞིང་དུབ་པའི་གདུང་བ་སེམས་ལ་ལུད།།
གཉིད་དང་བྲལ་བའི་སེམས་པ་ཤི་རྨས་བཏང་།།
སྒྱུ་མའི་མཚོ་འགྲམ་འདི་ནས་གཞན་དུ་གྱེས།།
ཟླ་བའི་འོད་འཇམ་ཞོ་གསར་སྤུངས་པ་མཐོང་།།
འཛུམ་པའི་དུང་བ་ཁྱེད་ཀྱིས་གནང་ཚུལ་དྲན།།
མངར་ལྡན་དགའ་སྤྲོས་བརྟས་པའི་ཕྱག་ཟུང་དེས།།
མཁའ་དབྱིངས་ཁམས་སུ་མེ་ཏོག་ཕྲེང་བ་བརྒྱུས།།
སྐྲ་གསེང་མེ་ཏོག་སྐེ་རྒྱན་མཛེས་པ་སོགས།།
བདག་སེམས་གཟེངས་སུ་བསྡད་པའི་སྙན་དངགས་ཕབ།།
སེམས་གཏམ་བཞག་ནས་ལྷིང་འཇགས་གསང་བ་ཉུལ།།
ལག་ཟུང་སྟོང་པའི་དབྱིངས་སུ་བརྡ་ཡིག་གསལ།།
ཁྱེད་ཀྱི་དུང་བརྡ་མི་མངོན་དབྱིངས་ནས་འབུས།།
གདངས་དབྱངས་གཏན་ཚིགས་ང་ཡི་རྣ་རུ་ལྷུང་།།
སྨྱོས་པར་བཟི་བའི་ལྡེབས་རིས་སྣ་ཚོགས་བསྐྲུན།།
རྒུན་ཆང་འདྲ་བའི་སྒྲུང་རིང་སེམས་ན་ཞིམ།།
མ་བཟོས་རྡོ་ཡི་ཕ་བོང་གམ་གྱི་རྩར།།
ཤེས་རབ་ཅན་གྱི་བརྩེ་བའི་ཕྱག་རྗེས་བཞག།།
རླུང་འཚུབ་དྲག་པོ་གཡུག་ན་སྔོན་གྱི་ལས།།
ཕ་བོང་ཕྱོགས་བཞིར་གཏོར་བའི་སྣང་ཚུལ་མཐོང་།།
དགོད་སྒྲའི་བསྒྱུར་བའི་དམ་བཅས་འདུན་མ་སྟོང་།།
དུང་བ་བྱེ་མར་འཐག་པའི་ན་ཟུག་བསླངས།།
བདག་སེམས་དུམ་བུར་གཤགས་པའི་གཏམ་ངན་དེས།།
མི་འདོད་རྒུད་པའི་ཕྱོགས་སུ་ཁད་ཀྱིས་བརྫངས།།
མེ་ཏོག་ཚོམས་ཀྱི་བསྡུས་པའི་ལྷོ་ལམ་ན།།
མིག་ཟུང་མཆི་མར་འཁྱིལ་བའི་དུང་བ་བརྩེགས།།
བརྩེ་བའི་བསྟི་གནས་མེད་པའི་འཆལ་པོ་ཞིག།
བདག་སེམས་ཆུ་འཁྱག་བླུག་པའི་ཚོར་གདུང་ལྗིད།།
སེམས་པའི་ཟིན་ཐོ་གནམ་ལ་བཀྱགས་པ་བྱས།།
ཁྱེད་ཀྱི་གནང་བའི་སྦ་སྙུག་དཀར་པོ་ལ།།
འཐམས་དེ་ལག་ཟུང་མཁའ་ལ་བརྐྱངས་པ་ཤོར།།
དུང་བའི་ལྡང་སྐོར་སྐྱོ་བའི་གསོལ་འདེབས་ཕུལ།།
འབྲི་ཆུའི་དབྱངས་རྟ་གློ་སྙིང་ཁམས་ན་རྩེན།།
སྨུག་པོ་རི་ལ་དྲན་བརྡ་ཐེངས་གཅིག་གཏང་།།
ཁྱེད་ལ་མཁོ་བའི་སེར་ཆེན་མེ་ཏོག་དེ།།
གསེར་ཆུའི་ཁ་ནས་ཁྱེད་ལ་བསྐུར་ཡང་ཆོག།།
སྒྱུ་མའི་འཁྲུལ་སྣང་ཞིག་པའི་ཕོ་བྲང་ནང་།།
མ་དང་མཁའ་འགྲོའི་བྱིན་རླབས་མཇལ་རྒྱུ་ཡོད།།
རང་བྱུང་ལྷན་གཅིག་གནས་པའི་བདེ་ཆེན་ལ།།
མ་བཅོས་སོར་བཞག་ངང་ནས་རོལ་བར་ཤོག །
མི་ཡུལ་འདི་ནས་འཆལ་ཡན་སྣ་ཚོགས་ཤིག།།
རང་སེམས་ཀློང་ལས་ཤར་བ་མ་ཤེས་པར།།
མ་དག་སྣང་བའི་རང་ཉིད་དོག་པར་བྱས།།
ཆོས་ཉིད་བདེན་པའི་གནས་ལུགས་ཐག་མི་རིང་།།
རྒྱ་གར་གྱི་ཆུ་མོ་གངྒའི་ཉེ་འཁྲིས་དྲང་སྲོང་ལྷུང་བ་ཅན་གྱི་ནགས་ཚལ་དུ་འཆལ་པོ་བསོད་སྨྱོན་ནམ་པུར་མིང་གསེར་འབྲོང་སྲས་སུ་འབོད་པས་ཁ་ཐུག་ཏུ་བགྱིས་སོ།། སྤྱི་ལོ2018 ཕྱི་ཟླ་11 ཚེས9
