Khampa Writers' Group

དགའ་སྐྱོ་ཟློས་གར་མང་བའི་ལོ་ཟླའི་གསེབ་ནས།།      བརྩེ་སེམས་ཆུ་ཤེལ་དྭངས་མའི་ནང་ལ་གསལ་བའི།། 

རི་ཤོར་འབྲོང་རྒན་ཞིག་ལ།། ལྷས་ར་སེམས་ལ་མེད་ཀྱང་།།

ཚེ་ཡིས་རི་མོ་བྲིས་པའི་གཞིས་ཀ་ལ།། ཡངས་པའི་ལྷ་ལམ་ངུས་སམ་དགོད་པ་ཡིན།།

མདང་དགོང་རྨི་ལམ་དུ། ཧ་ཅང་ཆ་རྒྱུས་ཆེ་བའི་ཡིག་འབྲུ་དེ་དག

བརྩེ་བས་ལམ་སྣ་དྲངས་པའི་རྒྱང་བཞུད་ཀྱི་མགྲོན་པོ།། དུང་བའི་མིག་གིས་འཐམས་ཏེ་རྒྱབ་ཕྱོགས་ནས་སྐྱེལ་ཡོད།།

རྒྱལ་ཀུན་སྙིང་རྗེའི་ངོ་བོ་སྤྱན་རས་གཟིགས།། གཟིགས་པ་དུས་ལས་མི་གཡོལ་འཕྲིན་ལས་ལྷ།།

སེམས་སོང་དངོས་པོ་རེ་མཐོང་ན་འཛུམ་མདངས་ལྷུག་ལྷུག། མི་མཐུན་སྡུག་བསྔལ་རེ་འཕྲད་ན་དབུགས་རིང་ནར་ནར།། བདེ་འདོད་ཀུན་རྟོག་རེའི་སྣེ་ལ་སེམས་པ་འཐམ་སྟེ།། མི་ཚེ་ཟིན་མེད་ཀྱི་ངང་ནས་རིམ་བཞིན་རྫོགས་འགྲོ།།   ལུས་པོ་རི་སྒང་ལ་ཐོན་ན་སྣང་བ་མཐོ་མཐོ།། རྐང་ཆུང་རྡོ་བ་ལ་ཐུག་ན་ཁ་ཤ་འདར་འདར།། སིམ་པ་ཨ་འཐས་རེས་བསྐུལ་བའི་བསླུ་བྲིད་འོག་ཏུ།། མི་ཚེ་དལ་མེད་ཀྱི་ངང་ནས་ལ་མོ་རྒྱག་འགྲོ།།   ཚོར་བ་ཚེར་མ་དང་འདྲ་སྟེ་རྩེ་མོ་ཟིང་ཟིང་།། བདེ་བ་རྨི་ལམ་དང་འདྲ་སྟེ་མྱོང་བ་ཐན་ཐུན།། རྟག་བརྟན་གཡུང་དྲུང་གིས་སྟོང་པ་གྱ་གྱུའི་ངང་དུ།། མི་ཚེ་མཚོ་སྟེང་གི་རླབས་རིས་མཐའ་རུ་ཡལ་འགྲོ།།   ལང་ཚོའི་མེ་ཏོག་རེ་བཞད་དུས་སྤྲོ་བ་སིང་སིང་།། རྒས་གཉེར་ཡ་ཐོད་ལ་འཁྲིགས་དུས་སྐྱོ་བ་དུང་དུང་།། དགའ་སྐྱོ་དྲོ་གྲང་གི་གནམ་ངོ་རེས་མོས་ངང་ནས།། མི་ཚེ་སྤྲིན་གསེབ་ཀྱི་ཉི་མ་ནུབ་ལ་བུད་འགྲོ།།  ...

མདོ་སྔགས་ཉི་ཟླ་ཟུང་གཅིག། འཆད་ཉན་གཟི་འོད་འབར་བའི།། མོན་ཡུལ་དགོན་རྩེ་དགོན་པ།། སྐབས་གསུམ་གཉིས་པའི་ཞིང་རེད།།    ཞིང་མཆོག་དེ་གའི་ཕྱོགས་སུ།། རྐང་གཉིས་སོར་འདབ་སྒུལ་གྱིན།། མ་བཅོས་མཛའ་བའི་དཔལ་ལས།། འཛུམ་ཆུང་འཛུམ་ཁ་གྲོལ་ཡིན།།   ངུར་བའི་མདངས་ཀྱིས་མཛེས་ཤིང་།། རྣམ་རིག་གེ་སར་རྒོད་པའི།། སློབ་ཕྲུག་ཆུ་སྐྱེས་གཞོན་ནུའི།། མིག་འདབ་ང་ལ་ཕྱོགས་བྱུང་།།   བདག་ཡིད་ཀུན་གསལ་དབྱིངས་ནས།། བྱམས་བརྩེ་ཟླ་བ་ཚེས་ཏེ།། གཞན་ཕན་པིར་གྱི་རྩེ་མོས།། འཆད་ཁྲིད་འོད་སྣང་སྤྲོས་ཡོད།།  ...

ལོ་དེ་ཕྱིར་དྲན་ཞིག་གི་མཇུག་མ་མིན།། སྣང་སྲིད་བདོག་ཚད་བཀག་པའི་ཆུ་བོ་ཡིན།། ང་ཡི་ཟླ་ངོ་བསྟུད་མར་ལེན་ཐབས་ཀྱིས།། ཤིན་ཏུ་སྐྱོ་བའི་ངག་ཅིག་བརླན་ཚུལ་ཡིན།།   ལོ་དེ་གྲང་ཅང་ཅང་གི་ནམ་ཟླ་མིན།། ག་རེ་འཐོབ་ཕྱིར་བསྙེགས་པའི་བརྩེ་དུང་ཡིན།། བདག་གི་སྙིང་མི་སྡུག་པའི་ལྷན་པ་འགའ།། གཅིག་ཐོག་གཅིག་ཏུ་བརྩེགས་པའི་ངལ་བ་ཡིན།།   ལོ་དེ་དགའ་སྡུག་བསླེས་པའི་སླེ་བོ་མིན།། ལན་བུ་ཡོད་ཚད་བཏུས་པའི་སྒྲུང་ཐུང་ཡིན།། ཁོ་མོའི་ངག་ལ་བྱིན་རླབས་ཨེ་ཞུགས་ཀྱིས།། རེ་སྒུག་སྣེ་མང་མཐུད་པའི་དུས་ཚིགས་ཡིན།།   ལོ་དེ་རྒྱུ་འབྲས་བསྟན་པའི་གཞུང་ལུགས་མིན།། ཚོར་བའི་གླེགས་བམ་སྤུངས་པའི་རི་བོ་ཡིན།། དར་དཀར་ཕར་ལ་བསྲིངས་པའི་མཇུག་འབྲས་ཀྱིས།། སྐད་ཆ་ག་ལེར་འོང་བའི་དུས་ཤིག་ཡིན།།  ...

རབ་དཀར་ཚོགས་གཉིས་ཟླ་བའི་མ་མ་བསྲུབས་པ་ལས།། མཚན་དཔེའི་དཀྱིལ་འཁོར་ཉི་མ་འབར་བའི་འཕྲིན་ལས་ཀྱིས།། རྣམ་མང་འགྲོ་ལ་དགའ་བཞིའི་དཔལ་སྟེར་བྱམས་བརྩེའི་གཉེན།། སྟོན་མཆོག་མཚུངས་པ་མེད་དེས་ཀུན་ནས་སྲུངས་གྱུར་ཅིག ། ལྷུན་གྲུབ་ནོར་བུའི་མཛོད་ལ་མངའ་བརྙེས་ཀྱང་།། ཐུགས་རྗེས་ཡིད་ཅན་ཁམས་དང་རྗེས་མཐུན་པར།། ཕན་བདེ་ཞི་བའི་ལམ་མཆོག་འདོམས་མཛད་པའི།། ཐུབ༵་བསྟན༵་ཆོས༵་ཀྱི༵་ཉི༵་མ༵ར་རིང་ནས་འདུད།། ཕྲ་རྒྱས་ནད་ཀྱིས་གདུང་བའི་བདག་སོགས་འགྲོ།། མི་ཤིགས་ཐིག་ལེས་སྲུང་བའི་འཁོར་ལོའི་ལྟོར།། བརྩེ་ཆེན་དོན་ཡོད་ཞགས་པས་ཉེར་བཅིངས་ཏེ།། ཕྱོགས་ལས་རྣམ་པར་རྒྱལ་བའི་དཔལ་སྩོལ་ཅིག ། དམ་པ་གང་གི་ཞབས་སེན་སྤྱི་བོའི་རྡུལ།། འགོད་ལ་རིངས་ནས་ཡིད་ལ་བརྣགས་པ་ཡི།། བསོད་ནམས་བསྟན་ལ་དད་པའི་རྣམ་དཀར་གྱི།། སྐལ་བ་ལྡན་དེས་སོར་མོའི་འདུ་ལ་རིངས།། བྱང་ཕྱོགས་ནོར་འཛིན་སྒེག་མོའི་བཞིན་རས་ལ།། སྙན་པར་གྲགས་པའི་ལེགས་བྱས་སྨུག་པོའི་རྩིས།།...