ངས་རྟག་ཏུ་༸གོང་ས་མཆོག་གིས་ང་ཚོར་དུས་རབས་ཉེར་གཅིག་པའི་ནང་པ་ཞིག་བྱ་དགོས་ཀྱི་ཡོད་པ་རེད་ཅེས་གསུངས་པའི་བཀའ་མོལ་དེ་དྲན་གྱི་ཡོད།
དེ་དང་ཆབས་ཅིག ཅི་ཞིག་ལ་དུས་རབས་ཉེར་གཅིག་པའི་ནང་པ་ཞེས་བརྗོད་ཀྱི་ཡོད་པའི་སྐོར་ལ་ཡང་བསམ་བློ་རང་བཞིན་གྱིས་འཁོར་ཡོང་། སྐབས་འདིར་ངས་ལྷོ་བརྒྱུད་ནང་བསྟན་གྱི་མཁས་པ་ཞིག་གིས་རྒྱལ་སྤྱིའི་བགྲོ་གླེང་ཚོགས་འདུ་ཞིག་གི་ཐོག་ཏུ། ཆོས་བརྒྱུད་དང་ཆོས་བརྒྱུད་དག་གི་བར་ལ་གུ་ཡངས་ཀྱི་ཤོང་རྒྱ་ཡོད་པའི་ནང་པ་ཞིག་ལ་དུས་རབས་ཉེར་གཅིག་པའི་ནང་པ་ཟེར་ཞེས་བརྗོད་པ་དྲན། ཁོང་གི་བསམ་ཚུལ་ནི། ཆོས་བརྒྱུད་ཕན་ཚུན་བར་རིག་གནས་དང་ལོ་རྒྱུས་ཀྱི་ཁྱབ་ཁོངས་མི་འདྲ་བའི་འཕེལ་རིམ་དང་འབྲེལ་བའི་རྒྱབ་ལྗོངས་ཀྱི་འོག་ནས་མི་འདྲ་ས་ངེས་ཅན་ཡོད་པ་དག་ལ་འགལ་སྤོང་མཐུན་བསྒྲུབས་ཀྱིས་འོས་ཤིང་འཚམས་པའི་ལྟ་ཚུལ་འཛིན་ཐུབ་པ་ཞིག་ལ་ཟེར་གྱི་ཡོད་པ་འདྲ། ལྟོས་བཅས་ཀྱི་ཆ་ནས་ད་ལྟའི་ཆོས་པ་དག་གི་དཀྱེལ་ཡངས་དང་བསམ་ཤེས་ཀྱི་བསམ་བློ་དེ་ཡར་ཐོན་གྱི་ཕྱོགས་སུ་བསྐྱོད་ཀྱིན་ཡོད་པ་ནི་སྲིད་པ་ཞིག་རེད། དེ་ཡང་རྒྱུ་མཚན་མེད་པ་མ་ཡིན་ཏེ། མིའི་བསམ་བློ་དེ་ཕྱིའི་ཁོར་ཡུག་སོགས་ཀྱི་ངེས་ཅན་བཀག་རྒྱ་ལས་གྲོལ་བ་དང་ཆབས་ཅིག་ནང་གི་བསམ་བློའི་འདུ་ཤེས་ལ་རང་བཞིན་གྱིས་འགྱུར་བ་ཡོང་ངེས་ཡིན།
མཁན་པོ་ཚུལ་ཁྲིམས་བློ་གྲོས་ཀྱིས་དུས་རབས་ཉི་ཤུ་རྩ་གཅིག་པའི་ཆོས་པ་ཞིག་བྱེད་པར། ལྟ་སྤྱོད། གྲུབ་མཐའ། ཕོ་མོ། ཐོས་བསམ་ཉམས་ལེན། ཚེ་སྲོག རིག་གནས་སློབ་སྦྱོང་། སློབ་གསོ་བཅས་ཀྱི་ཐད་འདྲ་མཉམ་ཆེན་པོ་བདུན་གྱི་ལྟ་གྲུབ་དང་ལག་ལེན་གྱི་ཆ་རྐྱེན་ཡོད་དགོས་པའི་བཀའ་སློབ་ཞིབ་ཆ་ཞིག་ལོ་སྔ་མར་རྟའུ་ཉི་མཚོ་དགོན་པའི་འཇང་དགུན་ཆོས་ཆེན་མོའི་སྐབས་སུ་གནང་འདུག
ཡང་། ངས་མཚན་གཞིའི་ཐོག་ནས་དེང་སང་གི་ནང་བསྟན་གྱི་དཀྱིལ་འཁོར་དུ་ཕར་ལྟ་སྐབས། ༸གོང་ས་རྒྱལ་བའི་དབང་པོས་འཚེ་བ་མེད་པའི་ལྟ་གྲུབ་ཀྱི་གླེང་གཞི་དང་ཕྱི་ནང་ཚན་རིག་གི་ཕྲ་རགས་བརྗོད་གཞི་དག་ཅོག་ཙེ་སྒོར་མོ་གཅིག་ཏུ་བཞག་སྟེ། ཤར་ནུབ་རིག་གཞུང་མི་གཅིག་པའི་མཁས་པ་དག་དང་ལྷན་དུ་སེམས་དང་ཚེ་སྲོག་གི་གསང་སྣེ་འཚོལ་དུས་ཁོང་དུས་རབས་ཉེར་གཅིག་པའི་ཆོས་པ་ཞུ་བ་དེ་ཡིན་ནམ་སྙམ།
ཟུར་མང་དྲུང་པ་རིན་པོ་ཆེས་སྙན་ངག་འཇིག་རྟེན་ལ་བསྟིམས་ཤིང་། འཇིག་རྟེན་སྙན་ངག་ལ་བསྟིམས་ནས་ཡེ་ཤེས་སྨྱོན་པའི་ཟློས་གར་གྱི་སྟངས་སྟབས་དང་སྦྲེལ་ཏེ། ཐུབ་པའི་བཀའ་ལུང་གི་ཤིང་རྟ་ནུབ་ཕྱོགས་སུ་དྲངས་པ་ཐོས་དུས་ཁོང་ཡང་དུས་རབས་ཉེར་གཅིག་པའི་ཆོས་པ་ཟེར་བ་དེ་ཡིན་ནམ་སྙམ། ཁོ་བོའི་བླ་མ་རྫོང་སར་མཁྱེན་བརྩེ་རིན་པོ་ཆེས་ལོ་རྒྱུས་ཀྱི་རང་བཞིན་ལྡན་པའི་རྫོང་སར་མཁྱེན་བརྩེའི་མཚན་གནས་རྗེས་འབྲེལ་གྱི་བླ་ཆེན་གྱི་མཛད་པ་སྐྱོང་བའི་ཞོར་དུ། དེང་རབས་ཀྱི་གསར་བུ་གསར་མོ་དག་གི་ཡིད་ལ་འཇུག་པའི་གཏམ་བཤད་དང་འཁྲབ་ཁྲིད་ཀྱི་ལམ་ནས་སྤྱི་ཚོགས་ལ་བཟང་ཕྱོགས་ཀྱི་ཤུགས་རྐྱེན་མཐའ་མེད་དུ་སྐྲུན་པ་མཐོང་སྐབས་ཁོང་ལ་དུས་རབས་ཉེར་གཅིག་པའི་ཆོས་པ་བརྗོད་དགོས་སམ་སྙམ།
༸རྒྱལ་དབང་འབྲུག་ཆེན་པས་ཤར་ནུབ་གླིང་ཆེན་ཁག་གི་དད་ལྡན་བརྒྱ་སྟོང་མང་པོ་མཉམ་དུ་ཁྲིད་ནས་རི་བོ་ཧི་མ་ལ་ཡི་གྲང་རླུང་གི་ཧྲག་བར་ནས་གད་སྙིགས་འཐུ་ཞིང་ལྗོན་ཤིང་འཛུགས་ཀྱིན། རྒྱལ་སྤྱིའི་སྡིངས་ཆ་ཆེན་པོ་དག་ཏུ་གཟི་བརྗིད་ཀྱི་རྟགས་མ་བརྩོན་ལེན་བྱེད་པའི་སྐབས་སུ་ཁོང་ལ་དུས་རབས་ཉེར་གཅིག་པའི་ཆོས་པ་ཞེས་ཟེར་དགོས་སམ་སྙམ།
མཁས་དབང་ཟམ་གདོང་རིན་པོ་ཆེ་དང་། མཁན་ཆེན་ཚུལ་ཁྲིམས་བློ་གྲོས་སོགས་ཀྱིས་ཤར་ནུབ་རིག་པའི་དེ་ཉིད་ལ་ཞིབ་འཇུག་གི་སྡོམ་ཚིག་བཙལ་རྗེས་ཡབ་མེས་རིག་གཞུང་དང་། ཐུབ་བསྟན་གྱི་དེ་ཉིད་ལ་ངེས་ཤེས་ཀྱི་གོམས་ཚུགས་ལྷག་ཏུ་བརྟན་པའི་དབུ་འཁྲེགས་པོའི་ཐུགས་གཤིས་དེ་མཇལ་དུས། ཁོང་དག་ལ་དུས་རབས་ཉེར་གཅིག་པའི་ཆོས་པ་ཞེས་ཟེར་དགོས་སམ་སྙམ། རྣམ་པ་མི་འདྲ་བ་དང་སྣང་ཚུལ་དེ་དང་དེ་དག་གིས་ང་ལ་ཡང་སྙིང་དུས་རབས་ཉི་ཤུ་བའི་ཆོས་པ་མི་མཐུད་དུ་འཚོལ་རྒྱུར་སྤྲོ་སྣང་བྱིན།
འོན་ཀྱང་། ཐ་མ་དེར་སླར་ཡང་ངས་༸གོང་ས་མཆོག་གིས་དུས་རབས་ཉེར་གཅིག་པའི་ཆོས་པ་ནི་དེང་རབས་རིག་པ་གསར་བའི་འགྲོས་ཀྱང་ཤེས་ལ། ནང་བསྟན་བསམ་བློའི་ཉམས་ལེན་གྱི་གནད་ཀྱང་མ་ཤོར་བར་ཟིན་པ་ཞིག་ལ་ཟེར་ཞེས་འགྲེལ་བཤད་གནང་བ་ནི་ངས་ཀྱང་རང་ཉིད་ཀྱི་འདིའི་བསམ་བློའི་གཞི་རྟེན་བཅོལ་སའམ་མཚན་ཉིད་ལྟ་བུ་ཞིག་ཏུ་ངོས་འཛིན་བྱས། དེ་ཡང་འདིའི་གོ་དོན་ནི། དེང་རབས་རིག་པ་གསར་བའི་བསམ་བློ་དང་ཀུན་སྤྱོད་ཀྱི་རིན་ཐང་གི་ལྟ་བ་སྤྱད་ནས་སངས་རྒྱས་ཀྱི་དགོངས་པ་མི་རྣམས་ཀྱི་སེམས་ཁམས་སུ་བརྒྱུད་སྤྲོད་བྱེད་པ་ཞིག་ཡིན་པ་འདྲ།
ཡང་གཅིག་བཤད་ན། དུས་རབས་ཉི་ཤུ་པའི་ཆོས་པ་ཡིན་ནའང་འདྲ། དུས་རབས་ཉེར་གཅིག་པའི་ཆོས་པ་ཡིན་ནའང་འདྲ། སྐབས་དེ་དང་དེའི་ཁོར་ཡུག་དང་རིག་གནས་ཀྱི་སྤྱི་ཚོགས་དང་ཁ་མ་བྲལ་བ་ཞིག་དགོས་ཀྱི་ཡོད་པ་ཙམ་སྟོན་གྱི་ཡོད་པ་རེད་དྲན། རྒྱུ་མཚན་ནི། ཆོས་ལུགས་དང་རིག་གནས་གང་ཞིག་ཡིན་ནའང་འདྲ་སྟེ། འཚོ་བ་དང་སྤྱི་ཚོགས་ཀྱི་དངོས་དང་བསམ་པའི་དགོས་མཁོ་དང་མི་འཚམས་ཚེ་རང་བཞིན་གྱིས་དུས་ཀྱི་རེའུ་མིག་ལས་ལོགས་སུ་བཀར་རྒྱུ་རེད་ལ། དེའི་ཕྱིར། དུས་རབས་ཉེར་གཅིག་པའི་ཆོས་པ་ནི་མཐར་གཏུགས་ན་དུས་རབས་ཉེར་གཅིག་པ་ཡང་རྟོགས་ལ། སྤྱི་ལོའི་སྔོན་གྱི་དུས་རབས་ལྔའི་ཡར་སྔོན་གྱི་མི་བོ་ཆེ་ཞིག་གི་བསམ་བློ་ཡང་རྟོགས་ཐུབ་པར་མ་ཟད། དེ་གཉིས་དངོས་དང་བསམ་པའི་ལོངས་སྤྱོད་ཀྱི་ཆ་ཤས་སུ་ལམ་དུ་འཁྱེར་ཐུབ་པ་ཞིག་དགོས་རྒྱུ་དེ་ཡིན་པ་འདྲ།
