འཛུམ།

(སྔ་དུམ།)        

ཡབ་ཟས་གཙང་མ་ཡི་མིག་གི་འབྲས་བུ།།

ཡུམ་སྒྱུ་འཕྲུལ་མ་ཡི་ལུས་ཀྱི་དྲོད་ཁོལ།།

གྲོགས་ས་འཚོ་མ་ཡི་སྙིང་རྡོག་ཆུང་ཆུང་།།

སྲས་རྒྱལ་བུ་དོན་གྲུབ་ཁྱེད་རང་ཡིན་ཨ།།

སྐུ་ཕུང་པོ་ལུམ་བིའི་གནས་སུ་འཁྲུངས་ཤིང་།།

རྩལ་ལུས་སྟོབས་སེར་སྐྱའི་གྲོང་ནས་རྒྱས་ཏེ།།

ཞབས་སྲ་མོས་ཕྱོགས་ཀྱི་ས་ཆེན་བསྐོར་བའི།།

བུ་འགྲན་མེད་དཔའ་བོ་ཤཱཀྱ་ཐུབ་པ།།

དྲིན་མ་ལོའི་ནུ་འོ་མ་རག་གོང་ནས།།

ཡུམ་སྒྱུ་འཕྲུལ་མི་ཡུལ་འདི་ནས་ཕེབས་ཏེ།།

གནས་འཁོར་བའི་གྲོང་དུ་དྭ་བུ་ལྷག་དུས།།

སེམས་བསམ་པའི་གཏིང་ནས་སྐྱོ་ཤས་ཨེ་བྱུང་།།

བྱ་ངང་པའི་ཚེ་སྲོག་བདེན་པས་བསྐྱབས་ཤིང་།།

གཅེན་ལྷས་བྱིན་ངོ་ཚས་ཕམ་པར་མཛད་དེ།།

ཡུལ་ཚོམས་ཆེན་ཕོ་བྲང་སྐྱེ་དགུ་མཐའ་དག།།

ངོ་མཚར་བའི་གནས་ལ་བཀོད་པ་ཡག་བྱུང་།།

ཕྱིའི་དཔལ་ཡོན་བཞད་པའི་མེ་ཏོག་གླིང་དུ།།

གཟུགས་སྐྱེ་ལོ་ཡག་པའི་མཛེས་མ་དཔལ་མེས།།

ཕྱག་མཉེན་མོས་རྒྱུད་དྲུག་པི་ཝང་དཀྲོལ་ཞོར།།

སེམས་སྙིང་གཏམ་གླེང་དུས་ཅི་འདྲ་འདུག་གམ།།

གཉེན་ཨ་ནེའི་རེ་བཞག་མེ་ལ་བསྟབས་ཤིང་།།

གོང་རྒྱལ་པོའི་མག་འདེམས་མཛད་སྒོ་ཞུཌ་ཏེ།།

ནང་སྤུན་ཡའི་གཟུགས་བཞི་ས་ལ་བརྡབས་ནས།།

རོགས་ས་འཚོའི་ངུ་ཁ་ལེན་སྟངས་མཚར་གདའ།།

གྲོང་འཁོར་བའི་རྙོག་འཛིང་རེ་རེར་ཐུག་དུས།།

སེམས་མི་བཟོད་སྐྱོ་ཤས་སྙིང་ལ་ཟུག་ཅིང་།།

ལན་མེད་པའི་དྲི་རྟཌ་གང་མང་ཁུར་བཞིན།།

མཚན་ནགས་ཀླུང་ཉུལ་བ་རེ་གཉིས་མིན་ཨ།།

ཡུལ་ཡངས་པ་ཅན་གྱི་མུ་ཏིག་འབོད་པའི།།

སྨན་མཛེས་མའི་གཙུག་ཏོག་ཨ་མྲ་སྐྱོང་མས།།

ལུས་བདེ་མོའི་འཇོ་སྒེག་གར་སྟབས་ངོམ་དུས།།

ཚེ་སྔ་མའི་འཆར་གཞི་འཁྲུགས་འདྲ་ཨེ་བྱུང་།།

(བར་དུམ།)

སྨག་མུན་པ་འཐུག་པའི་མཚན་མོ་དེ་རུ།།

ཁྱིམ་བཟའ་མི་བུ་ཕྲུག་རྒྱབ་ལ་བསྐྱུར་ཞིང་།།

རྟ་ཆིབས་ལྡན་སྔགས་པ་གྲོགས་སུ་རེ་ནས།།

རྒྱང་ས་མཐའ་བྲོས་དུས་དཀའ་ལས་ཨེ་བྱུང་།།

ཤིང་ལྗོན་པའི་ལོ་མ་རླུང་གིས་སྤུར་ཞིང་།།

ཆུ་གཙང་པོ་བཞུར་བའི་ལུང་མདོ་དེ་རུ།།

མགོའི་ཐོར་ཅོག་སྣུམ་པོ་མཚོན་གྱིས་བྲེག་དུས།།

སེམས་ཡ་ཆུང་ཁོག་ནས་ཕངས་སེམས་བྱུང་ངམ།།

གོས་ཟ་འོག་ན་བཟའ་གཞན་ལ་བསྐོན་ནས།།

ལུས་རྐང་རྗེན་གོས་ཧྲུལ་བས་མཐར་ཉུལ་ཏེ།།

མགོ་རལ་པ་ཅན་གྱི་དྲང་སྲོང་རིང་འཕུར།།

ནམ་ཉིན་མཚན་བསྟེན་པའི་དཀའ་ཐུབ་རྨད་དོ།།

ཡབ་རྒྱལ་པོ་དམ་པའི་མཁར་གྲོང་ནང་ནས།།

སྐུ་ཕེབས་ཤུལ་བློན་ཆེན་ར་མདའ་ཡོང་ཞིང་།།

རོགས་ས་འཚོའི་དྲན་རྟེན་ཕྱག་ཏུ་འབྱོར་དུས།།

སྙིང་དམར་པོའི་འཕར་ལྡིང་ཅི་འདྲ་རེད་དམ།།

ཚེ་རི་ལ་བསྐྱལ་བའི་རྣལ་འབྱོར་རྒན་པོས།།

འཁོར་བུ་སློབ་མང་པོ་མང་པོའི་དབུས་ནས།།

སེམས་ཏིང་འཛིན་འབྲས་བུ་ཁྱེད་འདྲ་མེད་ཅེས།།

གསུང་དབུཌ་དབྱུང་གནང་དུས་ང་རྒྱལ་ཨེ་སྐྱེས།།

ཆུ་ནཻར་ཛྙ་ནའི་གཡས་ཟུར་དེ་ན།།

ཤིང་བྱང་ཆུབ་ལྗོན་པའི་སྔས་འགྲམ་དེ་ན།།

སེམས་བསམ་པའི་དཔལ་ཡོན་ལོངས་སུ་སྤྱོད་དེ།།

ལུས་ཨར་ལ་གཏད་པའི་རྣལ་འབྱོར་ཁྱེད་ཡིན།།

ནམ་ཉིན་མཚན་ཞལ་ཟས་ཁམ་གང་མེད་པར།།

ལོ་ཟླ་བ་མཐུད་ནས་བསམ་གཏན་སྒོམ་དུས།།

ལུས་ཤ་ཁྲག་ཕུང་པོའི་ཟུངས་བཅུད་ཟད་དེ།།

སེམས་དྲན་པ་འཐོར་སྐབས་ཅི་འདྲ་རེད་དམ།།

དབྱར་བྱང་ཆུབ་ཤིང་གི་ལོ་མ་ལྡེམ་པའི།།

ཡུལ་མ་གྷ་དྷ་ཡི་གནས་མཆོག་དེ་རུ།།

ནམ་ཐོ་རེངས་དུས་ཀྱི་ཐོ་རེངས་ཤིག་ལ།།

སེམས་གནས་ལུཌ་རྟོཌ་དུས་ཅི་འདྲ་འདུག་གམ།།

ས་ག་ཟླ་བའི་དུས་ཚེར་བཟང་པོར། 

29/ 5/ 2018 དངོས་མིང་། བསོད་ནམས་ནོར་བུ། སྨྱུག་མིང་། འཛུམ། ཕ་ཡུལ་ཁམས་གོ་འཇོ། སྡོད་གནས་ལྷོ་ཕྱོགས་རྣམ་གྲོལ་གླིང་།