འབྲོང་གཡག་དར་མའི་དཔྲལ་བ་འདྲ་ཞིང་རབ་ཏུ་ཡངས་པས་ཀླད་རྒྱ་ཆེ།།
སྐྲ་ལོ་རོག་པོ་གྱེན་དུ་ཤད་པས་གཏུགས་ན་ཕྱིར་ནུད་མེད་པར་མཚོན།།
ཤངས་ཀྱི་དཀྱུས་ནི་ཅུང་ཟད་ལེབ་ཅིང་གདང་ལྷ་རི་བོའི་རྒྱུད་དང་འདྲ།།
གཡག་ཀོ་རློན་པ་གྲི་ཡིས་བཅད་ལྟར་མཆུ་ཏོས་ཅི་ཡང་བཤད་པར་ཕོད།།
ཁྱོད་དང་ང་གཉིས་རིཊ་རྒྱུད་གཅིག་ལས་ཤ་ཁྲག་འདྲེས་པའི་གཉེན་ཉེ་མིན།།
ཁབ་སྐུད་ཙམ་གྱིས་འབྲེལ་བ་མེད་ཀྱང་དར་ན་དགའ་ཞིང་རྒུད་ན་སྡུག།།
ཁྱོད་ཀྱི་གཏམ་བཤད་ཞིབ་ཏུ་ཉན་པས་གནས་ལུཊ་རྡར་བའི་བློ་ཁོག་མཐོང་།།
སྐབས་རེར་བྱིས་པའི་རོལ་རྩེད་དགའ་བས་གྲོགས་ཀྱི་དྭངས་མ་སྒྲིག་སྙིང་འདོད།།
ནང་བསྟན་གཙབ་ཧྲལ་དགུ་ལ་གཏོར་ཡང་ཐུབ་ཕུན་ཟླ་ཕོགས་དམའ་རྒྱུ་མེད།།
བོད་པ་ལྐུགས་པ་ལུག་ལྟར་གྱུར་ཡང་ཐུབ་ཕུན་མཁས་པར་གྱུར་ཚར་ཡོད།།
བོད་སྐད་འཇིག་རྟེན་འདི་ནས་ཤི་ཡང་ཐུབ་ཕུན་རྒྱ་སྐད་ཁྲག་ཁྲག་རེད།།
སྤྲུལ་སྐུས་མནའ་མ་སྟོང་ཕྲག་བླངས་ཀྱང་ཐུབ་ཕུན་རྒན་མོ་ཤོར་དོགས་མེད།།
ཤ་ཚའི་ཁ་ལ་གཏམ་སྙན་མེད་པའི་དཔེ་འདིའི་དོན་དག་མ་རྟོགས་པ།།
པཎ་ཆེན་བླ་མ་ཤ་ཚ་ཆེ་བས་ཚོང་དཔོན་རྒྱགས་པའི་གྲལ་དུ་ལྷུངས།།
དགེ་ཆོས་མཁས་པ་སྤྱི་ཇུས་བསམ་ཏེ་གཏམ་སྙན་མེད་པས་སྨྱོན་པར་བརྩིས།།
ས་པཎ་ལུང་ཤར་ལྷག་བསམ་ཅན་ཚོགས་ཐམས་ཅད་ཐུབ་ཕུན་ཤ་ཉེ་ཡིན།།
རལ་གྲི་ལ་སོགས་མཚོན་ཆ་སྣ་ཚོགས་བསྟན་དགྲ་འཇོམས་བྱེད་ལག་ན་མེད།།
ཞེ་སྡང་དྲག་པོས་བསྟན་པ་སྲུང་བའི་ཁྲོས་པའི་ཁ་གདང་མིག་མ་བགྲད།།
འཕྱར་བ་ཙམ་གྱིས་ཐལ་རྡུལ་རློག་པའི་འུད་གཏམ་སྙན་མོ་མེད་ན་ཡང་།།
མི་མངོན་དབྱིངས་ལ་བཞུགས་པ་མ་ཡིན་ཤ་ཁྲག་གྲུབ་པའི་བསྟན་སྲུང་ཞིག།།
མ་ཐུབ་དགྲ་ལ་ཐུག་པའི་ཚེ་ལ་འགའ་རེའི་མཐུ་རྩལ་དུས་མ་བབས།།
ཕྱི་དགྲ་ནང་དགྲ་ནམ་ཞིག་བྱུང་རུང་ཁྱོད་ནི་དུས་ལ་བབ་བབ་རེད།།
ལག་ན་རལ་གྲི་སྙིང་ཁྲག་མི་དགོས་ཁ་པར་ཞིག་དང་སྨྱུ་གུས་འཐུས།།
མཐོ་དང་དམན་གྱི་ས་མཚམས་མི་གདའ་སུ་ཡིས་ནོར་ན་དེ་ལ་རྒོལ།།
ཞྭ་མོ་མདོག་ལ་ཞེན་ཆགས་མི་གདའ་རྒྱལ་བསྟན་སྤྱི་ལ་འགན་འཁུར་འདུག།།
ངོ་སོ་སྤྲེལ་བུའི་ཟློས་གར་མི་ཤེས་ཁམས་རྒོད་དྭངས་མའི་རང་གཤིས་མངོན།།
ཆོལ་གསུམ་ཕྱོགས་ཞེན་དུག་ཆུ་མ་མིད་མི་རིགས་སྤྱི་ལ་ལྷག་བསམ་དཀར།།
བདེན་པའི་དོན་ཞིག་བྱིས་པས་སྨྲས་ན་སྤམ་མདོག་མི་བཟུང་བདེན་ཁ་བྱིན།།
འདི་ལ་སུ་ཡིས་སྨད་པ་བྱས་ན་དེ་ནི་དྲང་བདེན་གནས་ལུགས་འགལ།།
འདི་ལ་གང་གིས་བསྐུར་བ་བཏབ་ན་སངས་རྒྱས་མི་མཉེས་ཐག་གིས་ཆོད།།
འདི་ལ་སུ་ཡིས་ལོག་པར་བསྒྲུབས་ན་ཡང་ན་ཤེས་ཚད་མེད་པའི་རྟགས།།
འདི་ཡིས་བཤད་པ་ཉམས་སུ་ལོན་ན་བོད་པར་ཅུང་ཟད་རེ་བ་འདུག།།
མཇལ་དུ་མེད་པའི་གཟུགས་མེད་མ་རེད་ང་ཚོས་ཕན་ཚུན་བགྲོས་ན་ཆོག། །
ཕར་ལ་བཅོལ་བ་ཁོ་ན་མ་ཡིན་ཚུར་ལ་སློབ་གསོ་སྤྲོད་བཞིན་འདུག། །
གཙང་ཁང་སྦུགས་ཀྱི་འབའ་ཞིག་མ་རེད་ལྕེ་ལེབ་སྒུལ་ནས་རྒྱུ་མཚན་བཤད།།
འདུ་ཤེས་མེད་པའི་འཇེམ་སྐུ་མ་རེད་བླང་དོར་འབྱེད་ལ་མཁས་པ་རེད།།
བག་ཆགས་རྙིང་པའི་སྒེད་རས་ཕྱེས་དང་ཕྱི་ནས་བདེན་པའི་ཉི་མ་ཤར།།
གཟུར་གནས་བློ་ཡིས་ཅུང་ཟད་དཔྱོད་དང་རྫུན་གྱི་གྲིབ་ནག་བསལ་བཞིན་འདུག།
དགག་སྒྲུབ་རྣལ་མས་རྩོད་པ་གྱིས་དང་གུ་ཡངས་གནས་ལུཊ་བརྡར་ས་ཡོད།།
ཁེངས་དྲེགས་ནག་པོས་འགྲན་ཁག་བྱས་ན་དོང་རིམ་དགུ་ལ་རྫོང་ས་རེད།།
བླ་སྤྲུལ་མིང་ཆེན་ཆོས་དང་འགལ་ན་མིག་ཟུང་བཙུམས་ནས་མི་བཀུར་བ།།
དབང་ཆེན་དཔོན་ལ་དྲང་པོ་མེད་ཀྱང་སྐྲག་ནས་རྒྱབ་ལ་མི་ལངས་ཤིང་།།
ཕྱུག་པོ་གཡོ་སྒྱུས་རང་མཚང་འགེབ་པའི་ལྐོག་རྡོས་རྩིབ་མ་གཅོག་ས་མེད།།
བཅུ་ཕྲག་རིག་པའི་གནས་ལ་མཁས་ཀྱང་གནས་ལུཊ་འགལ་ན་སུན་དུ་འབྱིན།།
མཐོ་སྒང་ཡུལ་དུ་མུན་པས་ཁྱབ་ཚེ་འོད་ཞགས་དཀར་པོའི་ཐིག་ལེ་ཡིན།།
གདོང་དམར་བོད་ཀྱི་ཕ་རུས་འཚོལ་བའི་དཔུང་གྲོགས་མེད་པའི་དཔའ་བོ་ཡིན།།
མཁས་བླུན་སྟོང་གི་ཕྲག་དོག་མདའ་ལ་རྒོལ་ལན་བདེན་པའི་གོ་ཆ་བཙན།།
གནས་ལུགས་གསལ་བའི་གད་རྒྱངས་རིང་མོ་ཧི་མ་ལ་ནས་བརྒལ་འོང་གྲག།།
སྤྱི་བྱུས་ལ་ལྷག་བསམ་ཟོལ་མེད་ཀྱིས་རྒྱག་གཅིག་མཆོངས་གཅིག་གིས་སུ་ལ་ཡང་རྒོལ་བ་ཕོད་པའི་རྒན་ཐུབ་བསྟན་ཕུན་ཚོགས་ནི་ཤ་ཁྲག་ལས་གྲུབ་པའི་བསྟན་སྲུང་ངོ་མ་ཞིག་དང་རང་དོན་ཡལ་བར་དོར་ནས་ཁ་ཡོད་ལག་ཡོད་ཀྱིས་བསྟན་དགྲ་ལ་ཁ་གཏད་གཅོག་མཁན་ཞིག་ཏུ་མཐོང་བས་བསྟོད་པ་འདིས་ཁོང་མཉེས་པར་སྨོན།།
