བརྩེ་བས་ལམ་སྣ་དྲངས་པའི་རྒྱང་བཞུད་ཀྱི་མགྲོན་པོ།།
དུང་བའི་མིག་གིས་འཐམས་ཏེ་རྒྱབ་ཕྱོགས་ནས་སྐྱེལ་ཡོད།།
འདི་ནས་རིང་དུ་ཁྲིད་པའི་གོམ་ཁ་དེ་ཆུང་ཡང་།།
གྱེས་པའི་གདུང་བ་དམར་པོའི་ན་ཟུག་རེ་ཡིན་སོང་།།
ཉལ་བའི་རྨི་ལམ་ཡུལ་གྱི་གོ་སྐབས་ཀྱང་བཙལ་ནས།།
སེམས་ཀྱི་རྒྱང་བལྟས་བྱེད་འདུག་བདེ་སྐྱིད་ཀྱིས་འཚོ་ཤོག།
འདི་ནས་ལས་ཀྱི་ལུས་པོ་ཕར་ཕར་དུ་ཕྱིན་ཀྱང་།།
ཕར་ནས་སྙིང་མོའི་སེམས་པ་ཚུར་ཚུར་དུ་འཁོར་བའི།།
སྨོན་ལམ་ཁ་གང་ཁུར་བའི་རྒྱང་བཞུད་ཀྱི་རོགས་ལོ།།
རེ་བ་སེམས་ཁང་ཁྱེར་བའི་སྐྱེ་བ་འདིའི་རྒྱབ་རི།།
མཚམས་རེ་ཟླ་བ་དཀར་མོ་ནམ་མཁའ་ན་འཆར་དུས།།
དྲན་པའི་སེམས་གཏམ་རེ་རེ་ཕར་ཚུར་ལ་འབྲི་ཡོང་།།
འདི་ནས་ནུབ་ལ་བཞུད་པའི་ཁ་དཀར་གྱི་སྤྲིན་ལ།།
རྒྱུན་དུ་སྨོན་ལམ་བཟང་པོའི་ཁ་བཏགས་རེ་སྐུར་ཡོད།།
འཚོ་བའི་དར་ལྕེ་རིང་མོ་སྒོ་ཁ་ནས་ལྡེབ་དུས།།
བཤད་པའི་སྙིང་གཏམ་ཚིག་གསུམ་བརྗེད་བཅུག་རང་མ་བཞག།
ད་རེས་སོ་སོར་གྱེས་པའི་ལས་སྐལ་ལས་མེད་ཀྱང་།།
སེམས་པ་རྒྱུས་ཡོད་འདི་ཡིས་ཉེ་ཉེ་རུ་འགྱུར་ཡོད།།
རང་རང་འཚོ་བ་གསར་པའི་མདུན་རྒྱབ་ཀྱི་བར་ནས།།
སེམས་པ་དབྱངས་ལ་བསྐུར་བའི་ཐབས་ཤེས་རེ་བྱེད་དུས།།
ཡུན་རིང་སེམས་ལ་གོམས་པའི་གསུང་སྐད་དེ་ཐོས་བྱུང་།།
དགའ་སྐྱོའི་ཀེམ་པས་བཙིར་བའི་སེམས་ཆུང་གི་ན་ཟུག།
རང་བྱུང་སྙན་ངག་དམར་པོའི་ནང་རོལ་ན་བཏབ་ཡོད།།
༢༠༡༨་༡༠་༣༠ ཉིན་ལས་ཀའི་བར་གསེང་ནས།
