བཅུ་དྲུག་ལང་ཚོའི་དཔལ་ལྡན་ཞིང་།།
མ་བཅོས་ཚུལ་ཁྲིམས་དྲི་བསུང་ཐུལ།།
ངུར་སྨྲིག་མདངས་འཛིན་མེ་ཏོག་གང་།།
སད་ཀྱིས་བཅོམ་པས་ཀྱེ་མ་ཧུད།།
རྣམ་དཔྱོད་ཟླ་བའི་ཟེགས་མ་རེས།།
ཤེས་རིག་ཀུ་མུད་འདབ་བརྒྱ་བཀྲོལ།།
རྒྱུ་སྐར་ཁྲོད་ཀྱི་འོད་པོ་ཆེ།།
འཆི་བདག་སྤྲིན་གྱིས་བསྒྲིབས་པས་སྐྱོ།།
ལྷན་སྐྱེས་ཡ་༼རབས་རབ་མཚར་སྡུག་འབར།།
གུས་རྟག་སྦྱོར་བའི་གཟི་བྱིན་མཐོ།།
བསམ་ཡོད་ཆུ་སྐྱེས་འབུམ་གྱི་རྒྱན།།
སྒྲ་ཅན་དུག་གིས་བཀུམས་པས་ངུ་།།
ད་ནི་ངུ་དབྱངས་གྱེར་ཙམ་གྱིས།།
བར་དོར་རྒྱུ་བའི་ཁྱེད་ཉིད་ལ།།
ཕན་པའི་འོད་ཅིག་མི་སྲིད་ཀྱིས།།
དགེ་བ་གང་གི་འདུ་བྱེད་རྩོམ།།
སྐྱོ་གདུང་མིག་ཆུ་དྭངས་མ་གང་།།
ཡོན་ཆབ་གཙང་མའི་བྱད་དུ་སྒོམ།།
སྟོན་པའི་དྲུང་དུ་མགོ་བོ་དུད།།
སྨོན་ལམ་སྒྲོན་མེ་རྐང་གཅིག་སྦར།།
རྟེན་འབྲེལ་ཟབ་མོའི་གསང་གནད་འོག།
སྨོན་ལམ་སྒྲོན་མེ་རྐང་གཅིག་འདིས།།
ཁྱེད་ཉིད་བར་དོའི་འཇིགས་སྐྲག་ལས།།
ལན་གཅིག་བསྐྱབས་པར་སླར་ཡང་སྨོན།།
སླད་མའི་དུས་ཀྱི་ཀྱོག་མཚམས་ནས།།
རྣམ་དཀར་ལས་ཀྱི་སྟངས་སྟབས་ཀྱིས།།
ཐར་པའི་རྒྱུ་རུ་མཉམ་བརྩོན་གྱི།།
སྐལ་བཟང་ཉི་གཞོན་འཆར་གྱུར་ཅིག།
ཕྱི་ལོ་ ༢༠༡༧/༩/༨ ཉིན་གུས་རག་ཤུལ་གསང་མྱིག་གིས་སློབ་བུ་ཞིག་ཕྱི་མར་བཞུད་པར་བཅོས་མིན་སྐྱོ་སེམས་ཀྱི་དབྱིངས་ནས་ཤར་མར་བྲིས།
